NATO Parlament Assambleyasının Bakıda “Cənubi Qafqaz: Çağırışlar və imkanlar” mövzusunda keçirilən 86-cı Rouz-Rout seminarı başa çatıb

Bakı:

27 °C

39 %

2 m/s

AZ RU EN

Ana səhifə / Siyasət / NATO Parlament Assambleyasının Bakıda “Cənubi Qafqaz: Çağırışlar və imkanlar” mövzusunda keçirilən 86-cı Rouz-Rout seminarı başa çatıb

NATO Parlament Assambleyasının Bakıda “Cənubi Qafqaz: Çağırışlar və imkanlar” mövzusunda keçirilən 86-cı Rouz-Rout seminarı başa çatıb

19.06.2014 [09:46]

NATO Parlament Assambleyasının Bakıda “Cənubi Qafqaz: Çağırışlar və imkanlar” mövzusunda keçirilən 86-cı Rouz-Rout seminarı öz işini iyunun 18-də başa çatdırıb.
AzərTAc xəbər verir ki, seminarın sonuncu iş günündə iki sessiya keçirilib. “İran və regional təhlükəsizlik” mövzusundakı sessiyada çıxışlar olub, müzakirələr aparılıb.
Latviyalı diplomat Oyars Eriks Kalninsin moderatorluğu ilə keçirilən sessiyada Beynəlxalq Böhran Qrupunun İran üzrə baş təhlilçisi Ali Vaez, Almaniyanın Beynəlxalq və Təhlükəsizlik məsələləri İnstitutunun eksperti Valter Poş və başqaları çıxış edərək İranın xarici siyasəti, regionda baş verən hadisələr barədə danışıblar.
Daha sonra sessiya işini müzakirələrlə davam etdirib.
NATO PA-da Azərbaycan nümayəndə heyətinin üzvü Məlahət İbrahimqızının moderatorluğu ilə keçirilən “2014-cü ildən sonrakı Əfqanıstan: Daxili və regional sabitliyin dəstəklənməsi” mövzusunda digər sessiyada Əfqanıstanın Strateji Araşdırmalar İnstitutunun təsisçisi və baş direktoru Davud Moradian ölkəsinin sosial-iqtisadi vəziyyəti, xarici siyasəti barədə məlumat verib.
Seminarın yüksək səviyyədə keçirilməsinə görə iştirakçılar adından təşkilatçılara minnətdarlığını bildirən D.Moradian Azərbaycanın Əfqanıstanda sülhyaratma əməliyyatlarına verdiyi töhfələri yüksək qiymətləndirib. O, Azərbaycan-Əfqanıstan əlaqələrinin dərin tarixi köklərə malik olduğunu vurğulayıb.
NATO-nun Əfqanıstan üzrə yüksək səviyyəli mülki nümayəndəsinin müavini Li Litzenberqer Azərbaycanın 86-cı Rouz-Rout seminarına uğurla ev sahibliyi etdiyini, ölkəmizdə gördüyü inkişaf proseslərinin onda unudulmaz təəssürat oyatdığını qeyd edib. Bu yaxınlarda Əfqanıstanda prezident seçkilərinin keçirildiyini xatırladan Li Litzenberqer təhlükəsizliyin təmininin ölkənin sabitliyinin mühüm tərkib hissəsi olduğunu bildirib.
Azərbaycan Respublikası Müdafiə Nazirliyinin Beynəlxalq Hərbi Əməkdaşlıq İdarəsinin bölmə rəhbəri Murad Zeynalov ölkəmizdə həyata keçirilən irimiqyaslı layihələr, Azərbaycanın Əfqanıstanda sülhməramlı əməliyyatlara verdiyi töhfələr barədə danışıb.
Regionda həyata keçirilən irimiqyaslı layihələrdən danışan M.Zeynalov Bakı-Tbilisi-Qars dəmir yolunun yeni əlaqələrin inkişafına şərait yaradacağını qeyd edib.
Seminara yekun vuran Azərbaycan Respublikası Milli Məclisi sədrinin birinci müavini Ziyafət Əsgərov beynəlxalq münasibətlər sistemində əməkdaşlığın davam etdirilməsinin vacibliyini vurğulayıb, bu seminarın maraqların sıx şəkildə uzlaşdırılmasına, vahid platformaya və inteqrasiyaya müsbət təsir göstərəcəyini söyləyib. O deyib ki, Azərbaycanın seçdiyi strateji kurs Cənubi Qafqazın sabitliyini artırır və ona dönməzlik xarakteri verir. Bu əvəzsiz missiyanın təmin olunmasının başlıca səbəbi isə ölkəmizin müstəqil iqtisadi siyasət yürütməsi, dürüst və etibarlı tərəfdaş olması, mühüm beynəlxalq hüquq prinsiplərini tanımasıdır. Z.Əsgərov ölkəmizin sabitləşdirici rolunun Avropa İttifaqı və NATO kimi beynəlxalq təşkilatlar, o cümlədən regionun əsas dövlətləri tərəfindən yüksək qiymətləndirilməsinin məmnunluq doğurduğunu diqqətə çatdırıb. Milli Məclis sədrinin birinci müavini deyib ki, Azərbaycanın təkcə enerji resurslarının ixracatçısı deyil, həmçinin regional sülhün və təhlükəsizliyin başlıca təminatçısı kimi qəbul olunması indi danılmaz bir faktdır. Lakin bu yolda artıq hər kəsin etiraf etdiyi kimi, ən başlıca təhlükə ərazilərin işğalı, sərhədlərin toxunulmazlığının təmin olunmaması və xarici təcavüzün davam etməsidir. Azərbaycan torpaqlarının Ermənistan tərəfindən işğalı bölgənin Avropa ilə inteqrasiyası yolunda ən başlıca maneədir. Cənubi Qafqazın təhlükəsizliyi isə Avropanın və dünyanın təhlükəsizliyinin ayrılmaz hissəsidir.
NATO PA-nın prezidenti Hu Beylin 86-cı dəfə keçirilən Rouz-Rout seminarında səmərəli müzakirələrin aparıldığını, əsas məqsədin qanunverici orqanlar arasında əməkdaşlığı gücləndirməklə təhlükəsizliyin təminində parlamentlərin rolunun artırılması olduğunu diqqətə çatdırıb.
O, seminara yüksək səviyyədə ev sahibliyi etdiyinə görə Azərbaycana minnətdarlığını bildirib.
Bununla da NATO Parlament Assambleyasının “Cənubi Qafqaz: Çağırışlar və imkanlar” mövzusunda 86-cı Rouz-Rout seminarı öz işini başa çatdırıb.

Paylaş:

Baxılıb: 740 dəfə