Azərbaycanın və İranın hüquq mühafizə orqanları mütəşəkkil cinayətkarlığa qarşı kompleks tədbirlər həyata keçirir

Bakı:

23 °C

68 %

2 m/s

AZ RU EN

Ana səhifə / Siyasət / Azərbaycanın və İranın hüquq mühafizə orqanları mütəşəkkil cinayətkarlığa qarşı kompleks tədbirlər həyata keçirir

Azərbaycanın və İranın hüquq mühafizə orqanları mütəşəkkil cinayətkarlığa qarşı kompleks tədbirlər həyata keçirir

19.08.2014 [09:45]

Azərbaycan Respublikasının daxili işlər naziri, general-polkovnik Ramil Usubov avqustun 18-də ölkəmizdə səfərdə olan İran İslam Respublikasının Sərhəd Qoşunlarının komandanı, general-mayor Qasım Rezayinin başçılıq etdiyi nümayəndə heyəti ilə görüşüb.
Daxili İşlər Nazirliyinin mətbuat xidmətindən AzərTAc-a bildiriblər ki, görüşdə nazir xalqlarımız arasında çoxəsrlik əlaqələrin mövcudluğunu xatırladıb. R.Usubov Azərbaycanın müstəqilliyini bərpa etdikdən sonra təməli 1993-cü ildə Ümummilli liderimiz Heydər Əliyevin İrana səfəri zamanı qoyulmuş möhkəm dostluq və qonşuluq münasibətlərinin iki dövlətin prezidentləri tərəfindən daha da genişlənməkdə olduğunu bildirib. Qeyd edilib ki, ölkələrimiz arasında baş verən inteqrasiya proseslərinin nəticələri bütün sahələrdə - iqtisadiyyatda, təhsildə, mədəniyyətdə və digər sahələrdə özünü büruzə verir. Belə şəraitdə hüquq mühafizə, o cümlədən ictimai təhlükəsizliyi təmin edən daxili işlər orqanlarının üzərinə böyük məsuliyyət düşür.
Nazir R.Usubov belə görüşlərin transmilli mütəşəkkil cinayətkarlıq və beynəlxalq terrorizmlə mübarizədə səylərimizin birləşdirilməsi üçün geniş imkanlar yaratdığını, qlobal xarakter almış transmilli mütəşəkkil cinayətkarlığın təhlükəli növlərinə, xüsusən narkotiklərin qanunsuz dövriyyəsinə və qaçaqmalçılığına qarşı mübarizədə əməkdaşlığın böyük potensiala malik olduğunu, yeni istiqamətlərin müəyyənləşdirilməsinin zəruriliyini qeyd edib.
Prezident İlham Əliyevin İrana müxtəlif vaxtlarda etdiyi rəsmi səfərlərin əlaqələrin keyfiyyətcə yeni səviyyəyə yüksəlməyə imkan verdiyini nəzərə çatdıran general-polkovnik R.Usubov əməkdaşlığın genişləndirilməsində nazirliyin də maraqlı olduğunu vurğulayıb.
Sonra qonaqlara Azərbaycandakı mövcud ictimai-siyasi və kriminogen vəziyyət haqqında məlumat verilib, respublikamızda dövlət müstəqilliyinin, demokratik prinsiplərin möhkəmləndirilməsi, ictimai münasibətlərin hüquqi tənzimlənməsi mexanizminin təkmilləşdirilməsi sahəsində görülən işlər qeyd olunub. Vurğulanıb ki, hüquq mühafizə orqanları mütəşəkkil cinayətkarlığa, beynəlxalq terrorizmə, ekstremizmə, separatizmə, silahların və narkotik vasitələrin qanunsuz dövriyyəsinə qarşı sıx, qarşılıqlı əlaqədə kompleks tədbirlər həyata keçirir.
İranın Sərhəd Qoşunlarının komandanı Qasım Rezayi səmimi qəbula və ətraflı məlumata görə minnətdarlığını bildirib. O, qeyd edib ki, belə səfərlər, imzalanmış sazişlərin müddəalarının yerinə yetirilməsi eyni dinə, oxşar mədəniyyətə və tarixi köklərə malik dost ölkələrimizin mənafelərinə tam uyğundur. Bu, bütün sahələrdə, o cümlədən təhlükəsizlik, hərbi, iqtisadi münasibətlər və digər istiqamətlərdə əlaqələrin daha da inkişaf etdirilməsinə töhfə verir.
Görüşdə tərəfləri maraqlandıran digər məsələlər də müzakirə edilib.

Paylaş:

Baxılıb: 845 dəfə