Azərbaycan-İtaliya əlaqələrinin inkişafında milli xəbər agentlikləri də mühüm rol oynayır

Bakı:

25 °C

54 %

1 m/s

Əlaqə

AZ RU EN

Ana səhifə / Siyasət / Azərbaycan-İtaliya əlaqələrinin inkişafında milli xəbər agentlikləri də mühüm rol oynayır

Azərbaycan-İtaliya əlaqələrinin inkişafında milli xəbər agentlikləri də mühüm rol oynayır

27.09.2014 [10:35]

Azərbaycan ilə İtaliya arasında əlaqələrin inkişafında hər iki ölkənin milli xəbər agentlikləri də mühüm rol oynayır.
Bu fikir sentyabrın 26-da Azərbaycan Dövlət Teleqraf Agentliyində (AzərTAc) İtaliyanın ölkəmizdəki səfiri Ciampaolo Kutillo ilə keçirilən görüşdə səslənib.
Baş direktor Aslan Aslanov görüşdə AzərTAc-ın keçdiyi inkişaf yolu, son illərdə əldə etdiyi uğurlar, dövlət siyasətinin informasiya təminatında agentliyin mövqeyi və beynəlxalq əlaqələri barədə ətraflı məlumat verib. AzərTAc ilə İtaliyanın ANSA və AGİ agentlikləri arasında informasiya mübadiləsinə dair müqavilə imzalandığını qeyd edən A.Aslanov beynəlxalq və regional media qurumlarında da uğurlu əməkdaşlıq həyata keçirildiyini vurğulayıb. Baş direktor 2016-cı ildə Bakıda eyni vaxtda Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyasının və Dünya Xəbər Agentliklərinin V Konqresinin keçiriləcəyini və 2019-cu ilədək bu qurumlara AzərTAc-ın rəhbərlik edəcəyini diqqətə çatdırıb. Qeyd olunub ki, bu, eyni zamanda, İtaliyanın xəbər agentlikləri ilə əməkdaşlığın inkişafına da əlavə imkanlar yaradacaq.
Görüşdə Ümummilli lider Heydər Əliyevin Azərbaycan ilə İtaliya arasında münasibətlərin inkişafında böyük xidmətlərinin olduğu bildirilib, Prezident İlham Əliyevin uğurlu xarici siyasəti nəticəsində əlaqələrimizin müxtəlif sahələrdə, o cümlədən humanitar sahədə daha da genişləndiyi vurğulanıb.
A.Aslanov ölkələrimiz arasında əlaqələrin inkişafında, xüsusilə mədəniyyət sahəsində əməkdaşlığın dərinləşməsində Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın mühüm rolundan da bəhs edib. Belə ki, Mehriban Əliyevanın təşəbbüsü ilə Roma katakombalarının bərpası, Kapitolini Muzeyinin “Filosoflar zalı”nda aparılan təmir işləri, ümumiyyətlə, Heydər Əliyev Fondunun İtaliyada mədəni irsin qorunması istiqamətində həyata keçirdiyi tədbirlər xüsusi məna və əhəmiyyət kəsb edir.
Azərbaycan artıq mötəbər beynəlxalq tədbirlərə uğurla ev sahibliyi edən bir məkandır. Bu barədə danışan A.Aslanov deyib ki, Bakı Beynəlxalq Humanitar Forumu bu tədbirlər sırasında xüsusi yer tutur. Builki Forumda AGİ agentliyinin baş icraçı direktoru Danni Di Giovanninin rəhbərliyi ilə nümayəndə heyəti də iştirak edəcək.
Səfir Ciampaolo Kutillo Azərbaycan ilə İtaliya arasında dərin köklərə əsaslanan dostluq münasibətlərinin son illərdə daha da möhkəmlənməsindən məmnunluğunu ifadə edib. Diplomat ölkələrimiz arasında informasiya sahəsində əlaqələrin inkişaf etdirilməsinin əhəmiyyəti barədə fikirlərə şərik olduğunu diqqətə çatdırıb.
Azərbaycan hökumətinə və Heydər Əliyev Fonduna İtaliyanın mədəni dəyərlərinin dünya irsi kimi qəbul olunmasına verdiyi töhfələrə və dəstəyə görə minnətdarlığını bildirən səfir ölkəmizin “Milan Expo-2015” sərgisində geniş pavilyonla təmsil olunacağı barədə məlumat verib. Diplomat deyib ki, bu sərgidə iştirak Azərbaycanı italiyalılara daha yaxından tanıtmaq imkanı yaradacaq.

Paylaş:

Baxılıb: 698 dəfə