“Uşaqların zərərli informasiyadan qorunması haqqında” qanun layihəsi müzakirə olunub

Bakı:

26 °C

50 %

5 m/s

Əlaqə

AZ RU EN

Ana səhifə / Siyasət / “Uşaqların zərərli informasiyadan qorunması haqqında” qanun layihəsi müzakirə olunub

“Uşaqların zərərli informasiyadan qorunması haqqında” qanun layihəsi müzakirə olunub

16.05.2018 [09:35]

Mayın 15-də Milli Məclisin Ailə, qadın və uşaq məsələləri komitəsinin iclası keçirilib.
AZƏRTAC xəbər verir ki, komitə sədri Aqiyə Naxçıvanlı iclasda “Uşaqların zərərli informasiyadan qorunması haqqında” qanun layihəsinin müzakirə olunacağını deyib. Bildirib ki, sənəd Prezident İlham Əliyev tərəfindən qanunvericilik təşəbbüsü qaydasında Milli Məclisə təqdim olunub.
Qeyd edilib ki, ölkəmizdə uşaq, yeniyetmə və gənclərin fiziki sağlamlığı, sağlam düşüncə tərzi, təhsili prioritet məsələlərdəndir. Məhz bu baxımdan, uşaq hüquqlarının qorunması ilə bağlı qanunvericilik aktları mütəmadi olaraq təkmilləşir və zamanın tələbinə uyğun yeni qanunlar hazırlanır.
Diqqətə çatdırılıb ki, “Uşaqların zərərli informasiyadan qorunması haqqında” qanun layihəsinin hazırlanmasında komitə üzvləri yaxından iştirak ediblər. Sənəd Azərbaycan Konstitusiyasına, “Uşaq hüquqları haqqında”, “İctimai Televiziya və Radio Yayımı haqqında”, “Kütləvi informasiya vasitələri haqqında” qanunlara, Uşaq Hüquqları Bəyannaməsinə, Uşaq Hüquqlarına dair Konvensiyaya və digər beynəlxalq hüquq normalarına uyğun olaraq hazırlanıb.
Beş fəsil, 19 maddədən ibarət olan qanun layihəsi uşaqların yaşına uyğun informasiya əldə etmək hüququnun həyata keçirilməsi ilə əlaqədar olaraq onların zərərli informasiyadan qorunması tədbirlərini müəyyən edir və bu sahədə yaranan münasibətləri tənzimləyir. Qanunda uşaqların zərərli informasiyadan qorunması haqqında Azərbaycan Respublikasının qanunvericiliyi, uşaqların zərərli informasiyadan qorunması sahəsində əsas prinsiplər, uşaqlar üçün zərərli informasiyanın növləri ilə bağlı məqamlar əks olunub.
Sənəddə yaş təsnifatının aparılması məqsədilə informasiya məhsullarının ekspertizasına dair ümumi tələblər, ekspertizanın aparılması qaydaları, ekspert rəyinin verilməsi ilə bağlı məsələlər öz həllini tapıb.
Komitə üzvləri Sahibə Qafarova, Tahir Rzayev, Sədaqət Vəliyeva, Dilarə Cəbrayılova, Ağacan Abıyev, parlament Aparatının sosial qanunvericilik şöbəsinin müdiri Adilə Abasova çıxışlarında bildiriblər ki, qanun müasir dövrün tələblərinə uyğun olaraq mükəmməl hazırlanıb. Uşaqların təhlükəsizliyinin qorunması cəmiyyətin əsas vəzifələrindəndir. İnternetin, müasir texnologiyaların müsbət cəhətləri ilə yanaşı, uşaqların sosial inkişafına ziyan vuran bəzi mənfi məqamlar da var. İnformasiya resurslarının imkanlarından səmərəli istifadə olunmalıdır. Təhlükəli və zərərli informasiyaların qarşısının alınması, bunun uşaqların təlim-tərbiyəsinə mənfi təsiri barədə ictimaiyyət arasında maarifləndirmə işləri aparılmalıdır. Qeyd edilib ki, qanun uşaqların və yeniyetmələrin düzgün formalaşmasında əhəmiyyətli rol oynayacaq.
Müzakirələrdən sonra “Uşaqların zərərli informasiyadan qorunması haqqında” qanun layihəsi Milli Məclisin plenar iclasına tövsiyə olunub.
İclasda komitə sədri Aqiyə Naxçıvanlı diqqətə çatdırıb ki, 15 may dünyada Ailə Günü kimi qeyd edilir. Ailə institutunun qorunması və möhkəmləndirilməsi aktual məsələlərdəndir. Bu baxımdan, “Azərbaycan ailə modeli: dəyərlər və müasirlik” mövzusunda dinləmələrin keçirilməsi nəzərdə tutulub.

Paylaş:

Baxılıb: 2486 dəfə