YAP "Euronews"un qərəzli verilişinə etiraz edir

Bakı:

21 °C

73 %

1 m/s

Əlaqə

AZ RU EN

Ana səhifə / Siyasət / YAP "Euronews"un qərəzli verilişinə etiraz edir

YAP "Euronews"un qərəzli verilişinə etiraz edir

02.12.2009 [09:50]

Yeni Azərbaycan Partiyası “Euronews” televiziya kanalına 28.11.2009-cu il tarixli buraxılışı ilə əlaqədar etiraz məktubu ünvanlayıb. Etiraz məktubunda deyilir: “Qərb ölkələrinin bəzi aparıcı KİV - lərində zaman - zaman Azərbaycan - Ermənistan, Dağlıq Qarabağ münaqişəsi ilə bağlı açıq - aşkar təcavüzkar Ermənistanın mövqeyini müdafiə edən informasiyalar yer alır. “Euronews” televiziya kanalının 28.11.2009 - cu il tarixli buraxılışında “Dağlıq Qarabağda dəyişiklik küləkləri” adlı verilişdə növbəti dəfə qərəzli və qeyri - obyektiv yanaşma əsasında münaqişənin səbəblərini və həqiqətlərini erməni tərəfinin mövqeyinə uyğunlaşdırmaqla dünya və Avropa ictimai - rəyini çaşdırmağa yönələn cəhd göstərilib. Həmin proqramda Dağlıq Qarabağ “müstəqil dövlət”, qondarma qurumun rəhbəri Bako Saakyan isə bu “dövlətin prezidenti” kimi təqdim olunub. Bu az imiş kimi, bütün beynəlxalq sənədlərdə və nüfuzlu dünya təşkilatlarında Azərbaycanın ərazisi sayılan, Ermənistan Respublikası ilə heç bir coğrafi əlaqəsi olmayan Dağlıq Qarabağ Ermənistanın “ürəyi” adlandırılıb.
Yeni Azərbaycan Partiyası tarixi - siyasi faktların aşkar və kobud təhrifinə əsaslanan bu tip iddialara qəti şəkildə etirazını bildirir və telekanal rəhbərliyinin diqqətinə çatdırır ki, yuxarıda adı çəkilən qondarma qurum Ermənistanın Azərbaycana təcavüzü, onun ərazilərinin 20 faizinin (17,2 min kv/km) işğalı nəticəsində süni şəkildə və terrorçu - separatçı rejim kimi yaradılıb. Təbii olaraq, Dağlıq Qarabağ adlı qondarma “dövlət” dünyanın heç bir ölkəsi tərəfindən tanınmayıb və gələcəkdə də onu belə bir perspektiv gözləmir. Qeyd etmək istərdik ki, BMT, ATƏT, Avropa Şurası və bir sıra beynəlxalq təşkilatlar Ermənistanın Azərbaycana təcavüzünü pisləyən qətnamə və qərarlar qəbul ediblər. “Euronews” kimi geniş yayımı olan telekanal rəhbərliyinin bundan xəbərsiz olduğuna inanmaq mümkün deyil.
Qeyd etmək yerinə düşər ki, bu cür qərəzli, qeyri - obyektiv və əslində təxribat xarakterli verilişləri ilə “Euronews” kanalı ATƏT-in Minsk qrupunun vasitəçiliyi ilə aparılan nizamasalma prosesinə ciddi xələl gətirir, regionda sülhün, əmin-amanlığın və qarşılıqlı etimadın yaranmasına ağır yara vurur.
Azərbaycan cəmiyyətinin mövqeyini ifadə edərək, Yeni Azərbaycan Partiyası “Euronews” telekanalının rəhbərliyini belə həssas mövzuda proqram hazırlayarkən obyektiv olmağa dəvət edir və bildirir ki, bu səpkidə obyektivlikdən uzaq verilişlər onun imicinə ciddi xələl gətirir.”

Paylaş:

Baxılıb: 1281 dəfə