Bu gün 118 seçki dairəsinin 4813 məntəqəsində bələdiyyə seçkiləri keçirilir

Bakı:

1 °C

75 %

9 m/s

Əlaqə

AZ RU EN

Ana səhifə / Siyasət / Bu gün 118 seçki dairəsinin 4813 məntəqəsində bələdiyyə seçkiləri keçirilir

Bu gün 118 seçki dairəsinin 4813 məntəqəsində bələdiyyə seçkiləri keçirilir

23.12.2009 [09:23]

Məzahir Pənahov: Seçkilərin azad və şəffaf keçirilməsi üçün bütün imkanlar mövcuddur
Bələdiyyə seçkilərinə hazırlığın yekunları ilə əlaqədar dünən Mərkəzi Seçki Komissiyasının sədri Məzahir Pənahov mətbuat konfransı keçirib. M.Pənahov bildirib ki, seçki komissiyaları seçkilərin keçirilməsinə tam hazırdır. “Dekabrın 23-də bələdiyyə seçkilərinin azad və şəffaf keçirilməsi üçün bütün imkanlar mövcuddur. ölkədə normal seçki mühiti var. Mərkəzi Seçki Komissiyası seçkilərin hazırlanıb keçirilməsi üçün bütün tədbirləri həyata keçirib” deyə MSK sədri vurğulayıb. M.Pənahovun sözlərinə görə, bələdiyyə seçkiləri digər seçkilərlə müqayisədə daha mürəkkəbdir. Bu da seçkilərin konkret bələdiyyə ərazilərində keçirilməsi ilə bağlıdır. MSK sədri xatırladıb ki, ölkə üzrə 1718 bələdiyyəyə seçkilər keçiriləcək. 31 min nəfərə yaxın namizəd 15 min 682 yer uğrunda mübarizə aparacaq. Onun sözlərinə görə, seçkilər 118 seçki dairəsinin ərazisində 4813 seçki məntəqəsində keçiriləcək.
M.Pənahov bildirib ki, dekabrın 23-də “Seçkilər” İnformasiya Mərkəzində səsvermənin gedişi ilə bağlı gün ərzində 5 dəfə ictimaiyyətə məlumatlar çatdırılacaq: “Bələdiyyə seçkiləri əhəmiyyəti baxımından prezident və parlament seçkilərilə müqayisə oluna bilməz. Amma bu seçkiləri keçirmək kifayət qədər mürəkkəb prosesdir. Prezident seçkilərində bir bülletenlə, parlamentdə 125 bülletenlə, bələdiyyə seçkilərində isə 1718 fərqli bülleten üzrə səs veriləcək. Yəni, ictimaiyyətə 1718 müxtəlif bülletenlə bağlı məlumatları açıqlamalıyıq. Seçki keçirilən bələdiyyələrdə ən az 5 üzv, ən çox isə 19 üzv yerləri var. Bələdiyyələrdə ən az 10, bəzilərində isə 100-ə qədər namizəd var. Buna görə də seçki dairələrindən daxil olan məlumatların araşdırılması bir qədər vaxt aparacaq. Amma maksimum dərəcədə ictimaiyyətə səsvermənin nəticələrinin operativ şəkildə çatdırılmasına, səsvermənin nəticələrini MSK-nın saytına yerləşdirməyə çalışacağıq”.
M.Pənahov bildirib ki, bələdiyyə seçkilərini 50 min nəfərə yaxın müşahidəçi izləyəcək. 1160 nəfər MSK-da, 48 min 388 nəfər isə DSK-larda müşahidəçi kimi qeydiyyatdan keçiblər. Seçkiləri, həmçinin, 52 beynəlxalq müşahidəçi izləyəcək. Beynəlxalq müşahidəçilər Avropa Şurasını, Avropa İttifaqını, İFES-i, ATƏT-in Bakı ofisini və ölkəmizdə fəaliyyət göstərən diplomatik korpusları təmsil edirlər.
M.Pənahovun sözlərinə görə, namizədlərin qeydə alınma mərhələsində 33 857 nəfər DSK-lara imza vərəqələrini təqdim edib. Onlardan 953 nəfərin namizədliyini qeydə almaqdan imtina edilib. “Bu isə ümumilikdə çox kiçik bir rəqəmdir. Adətən bələdiyyə seçkilərində seçici fəallığı digər seçkilərlə müqayisədə aşağı olur. Bu, bütün dünyada belədir. Azərbaycanda da bu hal müşahidə olunur. İlk bələdiyyə seçkilərində 33 faiz seçici iştirak etmişdi. 2004-cü ildə bu rəqəm 46 faiz olub”.
M.Pənahov bildirib ki, namizədlərin 16 755-i siyasi partiyalar, 14 073-ü bitərəflər, 147 nəfəri isə təşəbbüs qrupları tərəfindən irəli sürülüb: “Siyasi partiyalar kifayət qədər prosesdə fəal iştirak edirlər və 16 partiya namizəd irəli sürüb”.
Seçici siyahılarına gəlincə, hazırda 4 milyon 600 minə yaxın seçici qeydiyyatdan keçib və onlar bələdiyyə seçkilərində səs vermək hüququna malikdir. M.Pənahov bildirib ki, seçici siyahılarının hazırlanması baxımından Azərbaycanın təcrübəsi Avropa standartlarına tam cavab verir. Onun sözlərinə görə, beynəlxalq təşkilatlar Azərbaycanın bu təcrübəsini yüksək qiymətləndirirlər. MSK sədri qeyd edib ki, səsvermə günü də daxil olmaqla seçici siyahılarının dəqiqləşdirilməsi işi davam etdiriləcək.
MSK sədri seçki kampaniyasının təşviqat mərhələsi ilə bağlı komissiyaya heç bir şikayətin daxil olmadığını da vurğulayıb.

Paylaş:

Baxılıb: 1033 dəfə