Azərbaycan xarici işlər naziri Türkiyədə səfərdədir

Bakı:

18°C

68%

4m/s

Əlaqə

AZ RU EN

Ana səhifə / Siyasət / Azərbaycan xarici işlər naziri Türkiyədə səfərdədir

Azərbaycan xarici işlər naziri Türkiyədə səfərdədir

26.12.2009 [09:51]

Türkiyədə səfərdə olan Azərbaycanın xarici işlər naziri Elmar Məmmədyarov və türkiyəli həmkarı Əhməd Davudoğlu Ankaranın Batıkənt rayonunda Azərbaycan xalqının ümummilli lideri, türk dünyasının dahi şəxsiyyəti Heydər Əliyevin adını daşıyan parka gələrək, Ulu öndərin xatirəsini ehtiramla anıb, abidəsi önünə tər gül dəstələri qoyublar. Sonra Türkiyə Xarici İşlər Nazirliyində Elmar Məmmədyarov və Əhməd Davudoğlunun təkbətək görüşü olub.
Görüşdən sonra nazirlər mətbuat konfransı keçiriblər.
Türkiyənin xarici işlər naziri Əhməd Davudoğlu deyib ki, ikitərəfli və heyətlərarası danışıqlarda qardaş ölkələrimiz arasında müxtəlif sahələrdə əlaqələrin perspektivləri müzakirə olunub. Yeni ilin ilk aylarında Türkiyə-Azərbaycan birgə iqtisadi komissiyasının iclasının Bakıda keçirilməsi qərara alınıb. Bundan başqa, yaxın vaxtlarda dövlət naziri Zəfər çağlayanın başçılıq etdiyi nümayəndə heyəti də iqtisadi əməkdaşlığın perspektivlərini müzakirə etmək üçün Azərbaycana səfər edəcək.
Türkiyəli nazir bildirib ki, müzakirələr zamanı Dağlıq Qarabağ münaqişəsinin nizama salınması və ATƏT-in Misk qrupunun bu istiqamətdə fəaliyyətinin detalları ətrafında geniş fikir mübadiləsi aparılıb. Türkiyə bu məsələdə son zamanlar atılmış addımları tam dəstəkləyir və Azərbaycan torpaqlarının işğaldan azad olunmasının Ermənistan-Azərbaycan, Türkiyə-Ermənistan münasibətlərinin normallaşmasında mühüm rol oynayacağına inanır. İndi bölgədə sülhə daha yaxınıq və bu fürsət əldən buraxılmamalıdır. Ermənistanla imzalanmış protokolların ratifikasiyasının Azərbaycan torpaqlarının işğaldan azad edilməsindən sonra mümkün olduğuna dair mövqe Ankaranın rəsmi mövqeyidir.
Əhməd Davudoğlu danışıqlar zamanı beynəlxalq məsələlərin, habelə enerji sahəsində əməkdaşlığın da müzakirə olunduğunu əlavə etmişdir. Avrasiya məkanında Türkiyə və Azərbaycan strateji baxımından vahid mövqedən çıxış edəcəklər.
Azərbaycanın xarici işlər naziri Elmar Məmmədyarov deyib ki, Azərbaycan-Türkiyə münasibətləri çox yüksək səviyyədədir. İkitərəfli iqtisadi komissiyanın Bakıda keçiriləcək iclasında əməkdaşlığın yeni perspektivləri müzakirə olunacaq. Nümayəndə heyətimizdə ARDNŞ-in vitse-prezidenti də təmsil olunub. Bizim təbii qaz məsələsində danışıqlarımız davam edir. Biz Bakı-Tbilisi-Ceyhan, Bakı-Tbilisi-Ərzurum layihələrində olduğu kimi, gələcəkdə də karbohidrogen ehtiyatlarının nəqli məsələsində uğurlu əməkdaşlığımıza inanırıq. Əlbəttə, danışıqlar zamanı əsas müzakirə mövzusu Ermənistan-Azərbaycan, Dağlıq Qarabağ münaqişəsinin həlli olub. Rəsmi Bakı inanır ki, stabilliyə və regionun iqtisadi inkişafına ən böyük maneə Azərbaycanın işğal olunmuş torpaqları və məcburi köçkünlərdir. Əgər torpaqların 20 faizi işğal altındadırsa, heç bir sülhdən və təhlükəsizlikdən söhbət gedə bilməz. Biz regionda güclü ölkə kimi Türkiyənin dünya ictimaiyyətini bu barədə məlumatlandırmasını istəyirik. öz növbəmizdə isə, biz bu məsələləri tezliklə həll edəcəyimizə inanırıq.
Elmar Məmmədyarov türkiyəli həmkarı ilə beynəlxalq məsələləri, dünyada və Avropada gedən prosesləri də müzakirə etdiklərini söyləyib. O, vurğulayıb ki, Türkiyə və Azərbaycanın bu məsələlərdə mövqeyi üst-üstə düşür. Nazir onu da əlavə etmişdir ki, iki ölkə arasında viza rejiminin ləğv olunmasına dair saziş bəzi hüquqi məsələlərin həll olunmaması səbəbindən imzalanmayıb.

Paylaş:

Baxılıb: 960 dəfə