Müstəqil Azərbaycan mətbuatı tarixində öz imzası olan qəzet

Bakı:

27 °C

47 %

5 m/s

Əlaqə

AZ RU EN

Ana səhifə / Siyasət / Müstəqil Azərbaycan mətbuatı tarixində öz imzası olan qəzet

Müstəqil Azərbaycan mətbuatı tarixində öz imzası olan qəzet

13.01.2010 [09:13]

“Səs” qəzetinin Baş redaktoru cənab Bəhruz Quliyevə,
Hörmətli, Bəhruz müəllim,
Əvvəla, “Səs” qəzetində çalışan əqidədaşlarımı, məsləkdaşlarımı, qəzetin yaranmasında zəhməti olan, bu qəzeti sevən şəxsləri ad günü münasibəti ilə təbrik edirəm. Eyni zamanda, “Səs” qəzetinin ilk baş redaktoru olmuş görkəmli ziyalımız Ağabəy Əsgərovun bu qəzet vasitəsilə müstəqil mətbuatımıza yeni nəfəs gətirdiyini düşünür, onu da səmimi qəlbdən təbrik edirəm. “Səs” qəzeti müstəqil Azərbaycan mətbuatı tarixində özünəməxsus dəsti-xətti, üslubu olan bir kütləvi informasiya vasitəsidir. Bu qəzet, təkcə qəbul olunduğu kimi cəmiyyətin informasiya ilə təmin olunması funksiyasını yerinə yetirməyib, eyni zamanda, Azərbaycanda ictimai fikrin obyektiv əsaslarla formalaşmasında böyük xidmətlər göstərib. Azərbaycanın siyasi sisteminin milli maraqlara uyğun formalaşmasında böyük əhəmiyyətə malik olub. “Səs” qəzeti, 1991-ci ildə müstəqilliyimizin ilk illərində çıxmağa başladı. Bu dövrdə dünyada, regionda və cəmiyyətimizdə baş verən proseslər indiki qədər aydın deyildi. Xüsusilə, monosiyasi bir sistemdən çıxan insanlar üçün çoxşaxəli, mürəkkəb bir sistemə qədəm qoymaq çətin bir məsələ idi. Onun istiqamətini müəyyənləşdirmək, xeyrimizə və ziyanımıza olan məsələləri ayırd etmək çətin proses idi. Belə bir məqamda “Səs” qəzeti öz analitik yazıları ilə insanlara yol göstərdi. “Səs” qəzeti, həmçinin, Azərbaycan cəmiyyətində siyasi fikrin, siyasi plüralizmin bərpa olunmasında böyük xidmətlər göstərib. Bu qəzet böyük müxalifətçilik yolu keçmiş qəzetdir. Həm o dövrdə, həm də indiki iqtidaryönlü mətbuat orqanı kimi çox şərəflə və ləyaqətlə fəaliyyət göstərir. İstər milli maraqlarımızın təhdid altında olduğu, istərsə də qəzetçiliyin və qəzetlərin müstəqil söz deməsinin çətin olduğu bir dövrdə “Səs” qəzeti böyük cəsarətlə öz müxalif sözünü deyib. Daim Ulu öndərimiz Heydər Əliyevin siyasi kursunu müdafiə edib və indi də onun təbliği istiqamətində müstəsna fəaliyyət göstərir. “Səs” qəzeti Ulu öndərin ideoloji tezislərinin, ideyalarının carçısı olub və öz peşəkar, ləyaqətli kollektivi ilə bu işin öhdəsindən gəlib. Sonrakı mərhələdə, ölkəmizin inkişafında da “Səs” qəzeti böyük xidmətlər göstərib.
“Səs” qəzeti, həm də bir sıra tarixi hadisələri işıqlandırmaqla Azərbaycan mətbuatı tarixinə öz imzasını atıb. 1991-1992-ci illərdə Azərbaycan ağır günlərini yaşayırdı. Xalqımızın və ziyalılarımızın üz tutacağı, dərdini bölüşəcəyi mətbuat orqanı yox idi. ölkə mətbuatı müxtəlif marginal qrupların əlində idi və belə bir məqamda 91 nəfər ziyalının Ulu öndər Heydər Əliyevə ünvanladığı müraciətini ilk dərc edən də məhz “Səs” qəzeti oldu. “Səs” qəzetinin işi bununla bitmədi, bu qəzet sonradan ziyalılar üçün tribuna oldu. Qəzetin fəaliyyəti bu gün də bu istiqamətdə davam edir. “Səs” qəzeti Azərbaycan mətbuatı üçün bir məktəbdir. Bu gün “Səs” qəzeti gündən-günə təkmilləşir və inkişaf edir. ölkənin ən aparıcı mətbuat orqanlardan biri olaraq, öz tarixi ənənələrinə və missiyasına sadiq qalaraq, səmərəli fəaliyyət göstərir.
Mən bir daha “Yeni Azərbaycan” qəzetinin rəhbərliyi və bütün yaradıcı heyəti adından “Səs” qəzetinin yaranmasının 19-cu ildönümü ilə əlaqədar kollektivinizi təbrik edirəm, yeni yaradıcılıq uğurları, müvəffəqiyyətlər arzulayıram.
Hikmət Babaoğlu,
dərin hörmət və ehtiramla
“Yeni Azərbaycan”çılar adından

Paylaş:

Baxılıb: 1360 dəfə