Dağlıq Qarabağ münaqişəsinin həlli ilə bağlı Azərbaycanın mövqeyi dəyişməzdir

Bakı:

23 °C

78 %

5 m/s

Əlaqə

AZ RU EN

Ana səhifə / Siyasət / Dağlıq Qarabağ münaqişəsinin həlli ilə bağlı Azərbaycanın mövqeyi dəyişməzdir

Dağlıq Qarabağ münaqişəsinin həlli ilə bağlı Azərbaycanın mövqeyi dəyişməzdir

10.09.2020 [09:12]

Ermənistan beynəlxalq hüquqa və BMT-nin Təhlükəsizlik Şurasının qəbul etdiyi 4 qətnamənin tələblərinə uyğun olaraq qoşunlarını Azərbaycanın işğal edilmiş ərazilərindən çıxarmalıdır
Məlum olduğu kimi, Ermənistan-Azərbaycan Dağlıq Qarabağ münaqişəsinin beynəlxalq hüquq normaları əsasında həlli Azərbaycan Respublikası üçün prioritet təşkil edir. Ölkəmiz bu istiqamətdə qətiyyətli mövqe sərgiləyir: münaqişə mütləq Azərbaycanın ərazi bütövlüyü çərçivəsində və BMT Təhlükəsizlik Şurasının müvafiq qətnamələri əsasında öz həllini tapmalıdır. Azərbaycanın uğurlu xarici siyasətinin qanunauyğun nəticəsi kimi, ölkəmizin ədalətli və haqlı mövqeyi beynəlxalq səviyyədə dəstəklənir, bu mövqe ardıcıl olaraq daha da güclənir. Buna baxmayaraq, düşmənin iyul ayında Tovuz istiqamətində hücum cəhdi və digər təxribatçı hərəkətləri bir daha təsdiqləyir ki, işğalçı Ermənistan münaqişənin həlli ilə bağlı ATƏT-in Minsk qrupu formatında aparılan danışıqların uğurla nəticələnməsində maraqlı deyil.
Məsələyə münasibət bildirən Milli Məclisin üzvü Könül Nurullayeva deyib ki, Ermənistanın sərhəddə və təmas xəttində atəşkəs rejimini son dövrlər mütəmadi olaraq pozması işğalçı ölkənin təxribat planlarının aktual olduğunu göstərir. Onun sözlərinə görə, Ermənistan baş naziri Nikol Paşinyanın Azərbaycanın işğal olunmuş ərazilərinə təxribat xarakterli səfərləri, könüllü hərbi dəstələrin yaradılması cəhdləri, eləcə də müharibəyə hazırlıq barədə çağırışlar açıq şəkildə münaqişə ətrafında gərginliyi artırmağa hesablanıb.
K.Nurullayeva bildirib ki, işğalçıların bütün cəhdlərinə baxmayaraq, regionda güc balansı Azərbaycanın lehinədir: “Bu gün regionda iqtisadi-siyasi sahədə olduğu kimi, hərbi sahədə də vəziyyət Azərbaycanın xeyrinədir. 2016-cı ilin Aprel döyüşlərində, həmçinin Tovuz təxribatı zamanı Azərbaycan Ordusu öz qüdrətini həm düşmənə, həm də dünyaya göstərdi. Eyni zamanda, cəmiyyətimizin orduya dəstəyi vacib məqamlardan biridir. Bir sözlə, Ermənistanın istər diplomatik, istərsə də hərbi müstəvidə törətdiyi təxribatlar işğalçının öz əleyhinə işləyir”.
“Azərbaycan regionda sabitləşdirici amil kimi mövqeyini möhkəmləndirir, lakin ərazi bütövlüyü məsələsində hər hansı güzəştdən söhbət gedə bilməz. Rəsmi Bakının Ermənistan-Azərbaycan Dağlıq Qarabağ münaqişəsi ilə bağlı mövqeyi prinsipial və aydındır. Ermənistan beynəlxalq hüquqa və BMT-nin Təhlükəsizlik Şurasının qəbul etdiyi 4 qətnamənin tələblərinə uyğun olaraq, qoşunlarını Azərbaycanın işğal edilmiş ərazilərindən çıxarmalıdır”, - deyə K.Nurullayeva əlavə edib.
Məsələ ilə bağlı fikirlərini bölüşən “Sağlam Düşüncə” Gənclər Təşkilatı İctimai Birliyinin təsisçisi Ramiz Əliyev isə deyib ki, “Madrid prinsipləri”ndən imtina barədə bəyanat və açıqlamalar Ermənistanın sülh tərəfdarı olmadığını göstərir: “ATƏT-in Minsk qrupunun formatında danışıqlar prosesinin bazası sayılan “Madrid prinsipləri” ilə bağlı açıqlamalar ilk növbədə həmsədrlərin fəaliyyətini şübhə altına almaqdır”.
R.Əliyev deyib ki, N.Paşinyanın işğal edilmiş Dağlıq Qarabağa son səfərindən dərhal sonra separatçıların başçısı Araik Arutyunyan erməniləri müharibəyə hazırlaşmağa çağırması rəsmi İrəvanın “sifarişi” əsasında atılan addımdır: “A.Arutunyanın vaxtilə Gəncəni vurmaqla hədələməsi kimi, müharibəyə çağırış barədə son çəfəng açıqlamaları da qondarma rejimin başçısının Ermənistan rəhbərliyindən aldığı tapşırıqların əsasında əl atdığı növbəti təxribatdır”.
Ermənistanda hərbi könüllü dəstələrin yaradılması cəhdlərinə də münasibət bildirən R.Əliyev qeyd edib ki, “Müdafiə haqqında” qanuna dəyişikliklərin ictimai müzakirəyə çıxarılmasını Paşinyan rejiminin növbəti “şousu” kimi də dəyərləndirmək olar: “Çünki əslində indiki məqamda Ermənistan cəmiyyətində könüllü ordu yaratmaq üçün münbit zəmin mövcud deyil. İşğalçı ölkədə nə insan resursu, nə də vətənpərvərlik ruhu mövcuddur. Bu cəhd sadəcə Azərbaycanın hər keçən gün güclənən və müasirləşən Silahlı Qüvvələrinin xofu qarşısında işğalçıların uğursuz cəhdlərindən biridir”.
Qaşqay RAMAZANOV

Paylaş:

Baxılıb: 378 dəfə