Əlisahib Hüseynov: Ali Baş Komandanın qətiyyəti və ordumuzun döyüş əzmi Ermənistan rəhbərliyinin bütün işğalçılıq planlarını alt-üst edib

Bakı:

31 °C

34 %

2 m/s

AZ RU EN

Ana səhifə / Siyasət / Əlisahib Hüseynov: Ali Baş Komandanın qətiyyəti və ordumuzun döyüş əzmi Ermənistan rəhbərliyinin bütün işğalçılıq planlarını alt-üst edib

Əlisahib Hüseynov: Ali Baş Komandanın qətiyyəti və ordumuzun döyüş əzmi Ermənistan rəhbərliyinin bütün işğalçılıq planlarını alt-üst edib

02.10.2020 [09:24]

“Məlum olduğu kimi, Azərbaycan sentyabrın 27-də işğalçı Ermənistanın növbəti hücumuna məruz qalıb. Azərbaycan Ordusu erməni təxribatlarına son qoymaq məqsədilə əks-hücuma keçməyə məcbur olub”. Bu fikirləri Milli Həmrəylik Partiyasının sədri Əlisahib Hüseynov deyib.
Onun sözlərinə görə, Prezident İlham Əliyevin BMT tribunasından bəyan etdiyi kimi, işğalçı ölkənin rəhbərliyi son aylarda davamlı şəkildə müharibəyə hazırlaşırdı, məhz bunun nəticəsi olaraq Ermənistan silahlı qüvvələri gah münaqişə zonasında, gah da Azərbaycan-Ermənistan dövlət sərhədində tez-tez müxtəlif təxribatlar törədir, silahlı toqquşmalara şərait yaradırdı.
Partiya sədri vurğulayıb ki, ordumuzun döyüş uğurları ilk növbədə Ali Baş Komandan İlham Əliyevin həyata keçirdiyi məqsədyönlü siyasətin nəticəsidir: “Milli Həmrəylik Partiyası olaraq Ali Baş Komandanın yürütdüyü siyasəti və keçirilən uğurlu döyüş əməliyyatlarını yüksək qiymətləndiririk. Qeyd edim ki, bu, bizim ərazi bütövlüyümüzün bərpası uğrunda apardığımız mübarizədir. Azərbaycan Ordusunun bir-birinin ardınca qazandığı döyüş nailiyyətləri onu deməyə əsas verir ki, torpaqlarımız tezliklə işğaldan azad olunacaq. Çünki ordumuzun döyüş əzmi, savaş ruhu kifayət qədər yüksəkdir. Bütövlükdə, Ali Baş Komandanın qətiyyəti və ordumuzun döyüş əzmi Ermənistan rəhbərliyinin bütün işğalçılıq planlarını alt-üst edib”.
Hazırda Azərbaycan cəmiyyətində böyük ruh yüksəkliyi olduğunu qeyd edən Ə.Hüseynov bildirib ki, vətəndaşlar dövlətimizə, ordumuza dəstək verirlər: “Bu gün ordu ilə xalq arasında sarsılmaz vəhdət mövcuddur. Ölkənin əksər siyasi partiyaları ilk gündən Ali Baş Komandanımızın və ordumuzun yanında yer alıblar. Məlum oldu ki, ölkəmiz üçün taleyüklü məsələlərdə siyasi partiyalar siyasi və ideoloji fərqləri bir kənara qoyub iqtidarla, dövlətlə bir araya gəlməyə, birlik nümayiş etdirməyə qadirdir. Xüsusi qürur hissi ilə bildirmək istəyirəm ki, sözügedən birgə bəyanatı imzalayan 50 partiyanın arasında biz də varıq. Radikal müxalifət partiyalarının bu bəyanatı imzalamaması isə onların düşmən dəyirmanına su tökdüklərini bir daha sübut edib”.
Ə.Hüseynov deyib ki, indiki məqamda milli həmrəyliyin təmin olunmasında ölkədə siyasi dialoqun genişləndirilməsi amilini də xüsusi qeyd etmək lazımdır: “Məhz hazırkı situasiyada ölkədə milli həmrəylik mühitinin formalaşmasında 2020-ci ilin əvvəlindən daha da dərinləşən siyasi dialoq prosesinin rolunu yüksək qiymətləndirirəm. Bütün bu uğurlar, ilk növbədə, Prezident İlham Əliyevin rəhbərliyi ilə həyata keçirilən islahatların nəticəsidir. Təsadüfi deyil ki, bu gün ölkəmiz düşmən təxribatı ilə üz-üzə qalanda həm siyasi partiyalar, həm də QHT-lər dövlətin, dövlət başçısının və ordumuzun yanında yer aldılar”.
Qaşqay ZİYƏDDİNOĞLU

Paylaş:

Baxılıb: 395 dəfə