İqbal Ağazadə: Vətənin bütövlüyü uğrunda mübarizədə siyasi maraqlar ola bilməz

Bakı:

23 °C

78 %

6 m/s

Əlaqə

AZ RU EN

Ana səhifə / Siyasət / İqbal Ağazadə: Vətənin bütövlüyü uğrunda mübarizədə siyasi maraqlar ola bilməz

İqbal Ağazadə: Vətənin bütövlüyü uğrunda mübarizədə siyasi maraqlar ola bilməz

02.10.2020 [09:28]

“Dağlıq Qarabağın işğaldan azad olunması uğrunda hərbi əməliyyatların başlanması çoxdan arzuolunan idi. Başlanan əməliyyatlar Azərbaycan xalqının yekdil mövqeyidir. Xalqımız bu yöndə aparılan siyasəti dəstəkləyir”. Bu fikirləri Ümid Partiyasının sədri İqbal Ağazadə deyib.
Onun sözlərinə görə, hər bir vətəndaşın arzusudur ki, sərhədlərimiz bütövləşsin, işğalçılar torpaqlarımızdan qovulsun, qaçqın və məcburi köçkünlər öz yurdlarına qayıtsın və bununla da ərazi bütövlüyümüzün tamlığı fonunda həyat normal ritmə düşsün: “Əgər beynəlxalq təşkilatlar və dövlətlər bizə hansısa tövsiyə vermək istəyirlərsə, əvvəlcə 26 illik atəşkəs dönəmində Azərbaycanın ərazi bütövlüyünün təmin olunması üçün hansı addımlar atdıqlarını desinlər. BMT Təhlükəsizlik Şurasının qəbul etdiyi dörd qətnamə icra olundumu? Xeyr. Azərbaycan 30 ilə yaxın səbr etdi. Bu müddətdə üzləşdiyi haqsızlığa baxmayaraq, danışıqlar masasında əyləşdi. Ölkəmiz erməni işğalı nəticəsində humanitar fəlakətlə qarşılaşanda, mədəni-tarixi abidələrimiz dağıdılanda, Dağlıq Qarabağda qanunsuz məskunlaşma siyasəti aparılanda həmin beynəlxalq təşkilatlara və dövlətlərə israrla müraciət etdik. Çox təəssüf ki, heç kim bizi eşitmək istəmədi, heç bir tədbir görülmədi. Bundan sonra Azərbaycan o zaman masa arxasında əyləşməlidir ki, işğalçılar torpaqlarımızdan çıxsınlar. Dağlıq Qarabağda yaşayan etnik erməni icması Azərbaycan Konstitusiyasını, vətəndaşlığını qəbul edəcəksə, dövlətimiz onlara bütün təminatı verəcək. bunlar baş verməyənə qədər hərbi əməliyyatlar dayanmamalıdır. Əks təqdirdə, yenə də danışıqlar başlasa, uzanacaq. Əgər bir ölkənin başçısı “Qarabağ Ermənistandır” deyirsə, dövlət sərhəddində yerləşən Tovuza hücum edirsə, demək ki, danışıqlara getməyəcək. Bizə bir yol qalır ki, torpaqları işğaldan azad edək. Bəzən deyirlər ki, müharibə ölüm, fəlakət gətirir. Onsuz da, bu hallar var. Torpaqlarımız işğal olunandan bu günə kimi öz yurdlarını itirən yüzminlərlə soydaşımız mənəvi-psixoloji sarsıntılar keçirir, atəşkəs elan olunmasına baxmayaraq, xeyli sayda hərbçilərimiz şəhid olub. Biz bu məsələni birdəfəlik həll etməliyik ki, gələcək nəsillər təhlükəsiz yaşasın”.
Bu məsələdə siyasi partiyaların mövqeyinə gəlincə, İqbal Ağazadə deyib ki, Vətənin bütövlüyü uğrunda mübarizədə siyasi maraqlar ola bilməz: “Bütün siyasi partiyalar, QHT-lər, vətəndaşlar mövqeyindən asılı olmayaraq bu gün özünü əsgər hesab edir. Ümid Partiyasının sədri kimi mən və bütün üzvlərimiz əsgər funksiyasını yerinə yetiririk. Döyüşdə əsgər kimi, arxa cəbhədə təbliğatçı kimi bu vəzifəni yerinə yetirməyə hazırıq. Bu, bizim şüarımızdır. Kimsə düşünməsin ki, müharibə uzanarsa, başqa vəziyyət yarana bilər. Xeyr. İstəyimiz odur ki, müharibə dayanmasın və bütün torpaqlar işğaldan azad olunsun. Bu yolda hər birimiz əsgərik”.
NARDAR

Paylaş:

Baxılıb: 409 dəfə