Tural Gəncəliyev: Ermənistan təkcə hərb meydanında deyil, həm də diplomatik cəbhədə məğlubiyyətə uğrayıb

Bakı:

33 °C

34 %

5 m/s

AZ RU EN

Ana səhifə / Siyasət / Tural Gəncəliyev: Ermənistan təkcə hərb meydanında deyil, həm də diplomatik cəbhədə məğlubiyyətə uğrayıb

Tural Gəncəliyev: Ermənistan təkcə hərb meydanında deyil, həm də diplomatik cəbhədə məğlubiyyətə uğrayıb

20.10.2020 [09:31]

“Ermənistanın hərbi cinayətlərinin qarşısının alınması və torpaqlarımızın işğaldan azad edilməsi istiqamətində Azərbaycan Ordusunun şanlı qələbələri xalqımız tərəfindən qürurla və sevinclə qarşılanır. Qısa zaman ərzində soydaşlarımız həmrəylik nümayiş etdirərək düşmənə qarşı vahid cəbhədə birləşməyi bacardı. Xalq Ali Baş Komandan İlham Əliyevin ətrafında səfərbər olub. Bütün dünya hər bir azərbaycanlının bir əsgər olduğunu görüb”.
Bu fikirləri qəzetimizə açıqlamasında Azərbaycanın Dağlıq Qarabağ bölgəsinin azərbaycanlı icmasının rəhbəri, Milli Məclisin deputatı Tural Gəncəliyev səsləndirib.
T.Gəncəliyev deyib ki, Prezident İlham Əliyev vaxtında atılan diplomatik addımlar və düzgün xarici siyasət nəticəsində ölkəmizə qarşı təzyiqləri dəf edib: “Əminliklə deyə bilərəm ki, əməliyyatların davam etdiyi günlərdə Ermənistan və onun havadarlarının bir araya gələrək Azərbaycana qarşı diplomatik cəbhə formalaşdırılmasının qarşısı alınıb”.
Deputatın sözlərinə görə, əgər Ermənistan yenə də əvvəlki siyasətini davam etdirəcəksə, işğal olunmuş ərazilərimizdən öz qoşunlarını çıxarmayacaqsa, hərbi əməliyyatlar davam edəcək. T.Gəncəliyev bildirib ki, Ermənistan təkcə hərb meydanında deyil, həm də diplomatik cəbhədə məğlubiyyətə uğrayıb: “Ermənistan uzun illər idi ki, danışıqların formatını dəyişdirməyə və Dağlıq Qarabağdakı qondarma rejiminin danışıqlar prosesində üçüncü tərəf kimi iştirakına nail olmağa çalışırdı. Amma Azərbaycanın uğurlu hərbi əməliyyatları Ermənistanın bu iddiasının üzərindən birdəfəlik xətt çəkdi. Ermənistan etiraf etdi ki, bu münaqişədə tərəf olan Dağlıq Qarabağdakı qondarma rejim deyil, məhz bu ölkənin özüdür. Ermənistan hakimiyyəti onlara diktə edilən şərtləri qəbul etmək məcburiyyətindədir. Bu gün danışıqlar prosesində diktə edən tərəf Azərbaycandır”.
Millət vəkili onu qeyd edib ki, Ermənistanın 30 il ərzində qurduğu ordu darmadağın edilib: “Aparılan hərbi əməliyyatlar zamanı yaşayış məntəqələrimiz, strateji yüksəkliklər işğaldan azad olunub. Ermənistanın xeyli sayda hərbi texnikası, silah-surastı məhv edilib və ələ keçirilib. Hesab edirəm ki, bundan sonra Ermənistan hələ uzun illər bu itkilərin yerini doldura bilməyəcək”, - deyə T.Gəncəliyev bildirib.
Qaşqay

Paylaş:

Baxılıb: 408 dəfə