Naqif Həmzəyev: Ali Baş Komandanın rəhbərliyi ilə Azərbaycan Ordusu düşməni doğma torpaqlarımızdan birdəfəlik qovacaq

Bakı:

26 °C

57 %

7 m/s

AZ RU EN

Ana səhifə / Siyasət / Naqif Həmzəyev: Ali Baş Komandanın rəhbərliyi ilə Azərbaycan Ordusu düşməni doğma torpaqlarımızdan birdəfəlik qovacaq

Naqif Həmzəyev: Ali Baş Komandanın rəhbərliyi ilə Azərbaycan Ordusu düşməni doğma torpaqlarımızdan birdəfəlik qovacaq

04.11.2020 [09:33]

“Azərbaycan Prezidenti, Ali Baş Komandan İlham Əliyevin rəhbərliyi ilə şanlı ordumuzun qələbə yürüşü davam edir, döyüş meydanında tarixi ədalət bərpa edilir. 1988-1993-cü illərdə erməni işğalçıları tərəfindən zəbt edilmiş yaşayış məntəqələrimiz düşmən tapdağından azad olunur. Erməni vandalları tərəfindən torpaqlarımızda, yurd yerlərimizdə 27 il ərzində güclü müdafiə-istehkam sistemi yaradılsa da, işğal altında olan ərazilərimizin böyük hissəsinin qısa müddətdə azad olunması Azərbaycan Ordusunun qüdrətinin göstəricisidir”.
Bu fikirlər Milli Məclisin deputatı Naqif Həmzəyevə məxsusdur.
Deputat deyib ki, bu gün xalqımızın böyük ruh yüksəkliyi, orduya inamı, qələbəyə əminlik hissi rəşadətli Azərbaycan Ordusunu yeni-yeni qələbələrə ruhlandırır: “Hazırda Azərbaycanda Vətən müharibəsi gedir. Artıq hər kəs əmindir ki, Ali Baş Komandanın rəhbərliyi ilə Azərbaycan Ordusu düşməni doğma torpaqlarımızdan birdəfəlik qovacaq, xalqımıza illərdən bəri gözlədiyi Böyük Qayıdışın sevincini yaşadacaq”.
N.Həmzəyevin sözlərinə görə, müzəffər Azərbaycan Ordusu Ermənistan tərəfindən işğal olunan ərazilərimizi beynəlxalq hüququn bütün norma prinsiplərinə əsaslanaraq azad edir: “Kürəkçay, Gülüstan, Türkmənçay sülh müqavilələrindən sonra dədə-baba torpaqlarımıza gətirilən, qonaqpərvərliyimizdən istifadə edərək torpaqlarımıza sahib çıxmaq istəyən erməni tör-töküntülərindən, vandallarından doğma ocağımızı, yurd yerimizi qurtarırıq. Azərbaycan Prezidenti İlham Əliyev çıxışlarında da geniş beynəlxalq auditoriyaya çatdırıb ki, ermənilər torpaqlarımıza məqsədyönlü şəkildə gətirilib və ölkəmizin ən dilbər guşələrindən olan Qarabağda yerləşdirilib. Ötən ilin oktyabrında “Valday” Beynəlxalq Diskussiya Klubunun XVI illik iclasının plenar sessiyasında Prezident İlham Əliyev “Qarabağ tarixi, əzəli Azərbaycan torpağıdır. Beləliklə, Qarabağ Azərbaycandır və nida işarəsi” deyərək, qəti fikrini bildirib”.
“Prezidentimizin “Qarabağ Azərbaycandır” kəlməsi ilə yağı düşmən, onların havadarları anlamışdılar ki, Azərbaycanın səbir kasası artıq daşıb, illərdir torpaqlarını işğal altında saxladıqları Azərbaycan xalqı Ermənistanın fitnəkar bəyanatlarına sözlə deyil, işlə cavab verməyə qərarlıdır. Bəli, bu gün Azərbaycan Ordusunun qarşısında tab gətirə bilməyən erməni işğalçıları hərbi maşınlarını, silah-sursatlarını, hətta bayraqlarını döyüş meydanında qoyub qaçırlar. Haqq işi uğrunda mübarizəyə qalxan Azərbaycan isə tutduğu yoldan dönmək fikrində deyil. Qarabağ Azərbaycandır!”, - deyə N.Həmzəyev bildirib.
Qaşqay RAMAZANOV

Paylaş:

Baxılıb: 577 dəfə