"Səs" qəzetinin redaksiyasında Ulu öndərin anadan olmasının 87-ci ildönümü ilə bağlı dəyirmi masa keçirilib

Bakı:

10 °C

87 %

2 m/s

AZ RU EN

Ana səhifə / Siyasət / "Səs" qəzetinin redaksiyasında Ulu öndərin anadan olmasının 87-ci ildönümü ilə bağlı dəyirmi masa keçirilib

"Səs" qəzetinin redaksiyasında Ulu öndərin anadan olmasının 87-ci ildönümü ilə bağlı dəyirmi masa keçirilib

06.05.2010 [13:03]

Dünən “Səs” qəzetinin redaksiyasında ümummilli lider Heydər Əliyevin anadan olmasının 87-ci ildönümü ilə bağlı dəyirmi masa keçirilib. SİA-nın məlumatına görə, dəyirmi masada Prezident Administrasiyasının Beynəlxalq əlaqələr şöbəsinin müdiri Novruz Məmmədov, Milli Məclisin komitə sədri, Yeni Azərbaycan Partiyasının (YAP) İdarə Heyətinin üzvü Eldar İbrahimov, millət vəkilləri Məlahət İbrahimqızı, Gülər Əhmədova, YAP İdarə Heyətinin üzvü Kərim Kərimov, YAP Siyasi Şurasının üzvləri Aydın Hüseynov, Vilayət Əliyev, “Yeni Azərbaycan” qəzetinin baş redaktoru Hikmət Babaoğlu, “Azərbaycan fermeri” qəzetinin baş redaktoru Nuhəli Kərimov iştirak ediblər.
Dəyirmi masanı giriş sözü ilə açan “Səs” qəzetinin baş redaktoru Bəhruz Quliyev Ulu öndər Heydər Əliyevin 1969-cu ildən - Azərbaycana rəhbərliyə gəldiyi dövrdən həyatının sonuna qədər millət və dövlət üçün gördüyü xeyirli, gərəkli işlər barəsində konkret faktlara söykənərək çıxış edib. Baş redaktor Ulu öndərin hakimiyyətdə olduğu illəri müxtəlif dövrlərə ayıraraq, bu dövrlərin hər biri haqqında geniş və əhatəli məlumat verib. Bildirib ki, ümummilli liderimiz Heydər Əliyevin müstəqil respublikamıza rəhbərliyi dövründə Azərbaycanda dövlət idarəçiliyi sistemi tamamilə yenidən qurulub, vətəndaş cəmiyyəti quruculuğunda, demokratik proseslərin sürətlənməsi istiqamətində, əhalinin sosial rifah halının yaxşılaşmasında, ordu quruculuğunda, təhsil, səhiyyə, mədəniyyət və digər sahələrdə inqilaba bərabər islahatlar həyata keçirilib.
B.Quliyev dəyirmi masa iştirakçılarına Ulu öndər Heydər Əliyevin anadan olmasının 87-ci ildönümü ilə bağlı diskussiya xarakterli müzakirələrin aparılmasının vacibliyini söyləyib.
Daha sonra çıxış edən Prezident Administrasiyasının Beynəlxalq əlaqələr şöbəsinin müdiri Novruz Məmmədov dəyirmi masanın keçirilməsinə görə, qəzetin baş redaktoru və onun kollektivinə minnətdarlığını bildirib. Müzakirələri faydalı hesab edən N.Məmmədov Ulu öndəri insan qalaktikasında parlaq ulduza bənzədib. O söyləyib ki, Onun şəffaf parıltısı və istiliyi daim qəlbimizdə qalacaq. “Mən Ulu öndərlə dünyanın 60 ölkəsinin rəhbərləri ilə tanış olmuşam, söhbətlər aparmışam. Həmin söhbətlərdə iştirak etməyimin mənim üçün çox böyük faydası olub. XX-XXI yüzilliklərdə dünyanın heç bir ölkəsində Ulu öndər Heydər Əliyev kimi şəxsiyyətə rast gəlməmişəm. Mübaliğəsiz deyirəm ki, onların hamısı Heydər Əliyev simasının, zəkasının, dühasının kölgəsində qalıblar. Bunu zaman özü artıq sübut edib. ümummilli lider Heydər Əliyev elə bir şəxsiyyət idi ki, Onun yaşadığı zaman tarixə çevrildi. O, həyatının böyük qərinəsini xalqına xidmət edib. Bununla Ulu öndər göstərdi ki, xalqa xidmət etmək yolu var və hər kəs bu yolla getməlidir”, - deyə o qeyd edib.
Tədbirdə çıxış edən Milli Məclisin komitə sədri, Yeni Azərbaycan Partiyasının (YAP) İdarə Heyətinin üzvü Eldar İbrahimov Ulu öndər Heydər Əliyevin fəaliyyəti haqqında danışıb. O bildirib ki, Azərbaycanı keçmiş SSRİ-də də tanıdan məhz Heydər Əliyev olub.
Daha sonra müzakirələrə qatılan YAP Siyasi Şurasını üzvu Vilayət Əliyev söyləyib ki, ümumilli lider Heydər Əliyev Azərbaycançılığın yaradıcısı, ilhamçısı və müdafiəçisidir: “Azərbaycançılıq fəlsəfəsini dərk etməyən şəxs Azərbaycan vətəndaşı ola bilməz! Azərbaycançılıq nədir? Bu sualın ən kamil cavabını Ulu öndər Heydər Əliyev verib: “Azərbaycançılıq öz milli mənsubiyyətini, milli-mənəvi dəyərlərini qoruyub saxlamaq, eyni zamanda onların ümumbəşəri dəyərlərlə sintezindən, inteqrasiyasından bəhrələnmək və hər bir insanın inkişafının təmin olunması deməkdir”.
Qeyd edək ki, dəyirmi masa müzakirələr əsasında davam edib.

Paylaş:

Baxılıb: 1087 dəfə