Azərbaycanın istehsal etdiyi hərbi sənaye məhsullarına tələb artır

Bakı:

20°C

60%

5m/s

Əlaqə

AZ RU EN

Ana səhifə / Siyasət / Azərbaycanın istehsal etdiyi hərbi sənaye məhsullarına tələb artır

Azərbaycanın istehsal etdiyi hərbi sənaye məhsullarına tələb artır

07.05.2010 [10:20]

SOFEX-2010 Beynəlxalq Müdafiə Sənayesi Sərgisində respublikamıza məxsus ən modern hərbi təyinatlı məhsullar nümayiş etdiriləcək
Azərbaycanın müdafiə sənayesi sektorunun yüksək inkişafı və ölkəmizə məxsus hərbi təyinatlı məhsulların istehsalının çeşidinin artması xarici dövlətlərin bu sahəyə olan marağının daha da yüksəlməsinə səbəb olmaqdadır. Yaranmasından qısa bir müddət ötməsinə baxmayaraq, davamlı islahatların həyata keçirilməsi nəticəsində ən modern hərbi məhsullar istehsalı ilə diqqəti cəlb edən Azərbaycanın bu sahədə xarici tərəfdaşları ilə əlaqələri də dərinləşməkdədir. ölkəmizə məxsus müdafiə sənayesinin istehsal məhsullarının beynəlxalq sərgilərdə nümayiş etdirilməsi də intensiv xarakter almaqdadır.
ötən il İDEF-2009 Beynəlxalq Müdafiə Sənayesi Sərgisində nümayiş etdirilən hərbi təyinatlı məhsulları ilə bir çox dövlətlərin dərin marağına səbəb olan Azərbaycana xarici dövlətlərdən gələn təkliflərin sayı durmadan artır. Qeyd edək ki, həmin tədbirdə respublikamızın 27 adda müdafiə təyinatlı məmulatları nümayiş etdirilib. Beynəlxalq təşkilatlar ölkəmizin hərbi təyinatlı məhsullarının sərgi və digər tədbirlərdə nümayiş etdirilməsi üçün təkliflərlə çıxış edirlər. Artıq Yaxın Şərqin ən böyük hərbi sərgilərindən olan və Əmmanda səkkizinci dəfədir ki, təşkil olunan SOFEX beynəlxalq sərgisində iştirak etmək üçün Azərbaycana müraciət olunub. İordaniya hökumətinin təşəbbüsü ilə keçirilən bu tədbirdə respublikamızın yüksək səviyyədə təmsil olunması üçün hər cür şəraitin yaradılacağı əmin olunur. SOFEX-2010 Beynəlxalq Müdafiə Sənayesi Sərgisində dünyanın 34 ölkəsindən 319 şirkətin iştirakı nəzərdə tutulub. Xatırladaq ki, tədbirin rəsmi tərəfdaşları kimi dünyanın müdafiə sektorunun nəhənglərindən hesab olunan “Orange”, “NP Aerospace”, “CNS Primus”, “FLİR”, “Northrop Grumman”, “General Dynamics” və “Raytheon” kimi şirkətləri çıxış edir. Sərgidə ABŞ, İordaniya, Türkiyə, Böyük Britaniya, Fransa, çexiya və Rusiyanın nüfuzlu şirkətlərinin də təmsil olunacağı müəyyənləşib. Azərbaycan SOFEX-2010 sərgisində ən son nəsil texnologiyalarla hazırlanmış hərbi məhsullardan “İstiqlal” tipli 14,5 və 12,7 mm çaplı snayper tüfənglərini, müxtəlif təyinatlı tapançaları, iriçaplı güllələri, minaatanları, qumbaraatanları, aviabombalar, uzaqdan idarə olunan mina partladıcı məhsulları, “Paramount Group” şirkəti ilə birgə istehsal edilən zirehli texnikaları, radioelektron məmulatları, elektron çap lövhələrini və digər texnikaları nümayiş etdirəcək. Bundan başqa, respublikamız indiyədək dünya ölkələrinə təqdim olunmayan “İqlim” və “Dalğa” elm-istehsalat müəssisələrində hazırlanmış ən modern və analoqu olmayan hərbi təyinatlı məhsullarını sərgiyə çıxaracaq.
Qeyd edək ki, Azərbaycanın istehsal etdiyi bir sıra hərbi məhsullar bütün texniki parametrlərinə görə, dünya dövlətlərinin analoji texnikalarından üstünlüyü ilə fərqlənir. Məsələn, “Zəfər”, “Zəfər-K”, “İnam” tapançaları, PKT, PKM, “İstiqlal-1” pulemyotları və digər məhsullar hərbi-texniki və keyfiyyət göstəricilərinə görə, dünya müdafiə sənayesi sektorunda ən qabaqcıl silahlardan hesab olunur. “İqlim”də istehsal olunan “Boran” artilleriya qurğusu, iriçaplı yarımavtomat “İstiqlal” snayper tüfəngi, piyadalar əleyhinə minalar və digər məhsulların da dünyada analoqu yoxdur. Həmin texnikalar ən çətin coğrafi-fiziki şəraitlərdə döyüş tapşırığının yerinə yetirilməsinə və qarşıya qoyulan tələblərə yüksək səviyyədə nail olmağa imkan verir. Xüsusilə də, “İnam”, “Qürur” tapançaları və “İstiqlal” snayper tüfəngi hava temperaturunun ən aşağı olduğu şəraitlərdə belə atəş dəqiqliyinə görə böyük üstünlüyə malikdir. 3 km məsafədə hədəfi dəqiqliklə vurmağa imkan verən bu unikal silah bəzi dövlətlərin anoloji silahını geridə qoyur. 20 kq çəkisi olan “İstiqlal” snayperi, hətta -50 və + 50 dərəcə temperaturlarda belə rahat istifadə oluna bilir və yağmur, palçıq, qar, toz təsirinə qarşı davamlılığı ilə fərqlənir. ölkəmizə məxsus motodor və morodor tipli zirehli texnikanın ilk nümunələri də hərbi parametrlərinə görə xüsusi üstünlüyə malikdir. Eləcə də, digər müxtəlif növ döyüş sursatları, artilleriya minaları və optik cihazlar xarici ölkələrin istehsal məhsulları ilə rəqabət aparmaq imkanlarına malikdir.
Azərbaycanın beynəlxalq müdafiə sənayesi sərgilərində iştirakının intensivləşməsi respublikamızın hərbi sənaye sahəsində ən inkişaf etmiş dövlətlərlə sıx əməkdaşlığının artmasına səbəb olacaq. Bu isə Azərbaycanın regionda və xarici bazarlarda hərbi təyinatlı məhsullar ixracatçısı kimi tanınmasına imkan verəcək.
ELBRUS

Paylaş:

Baxılıb: 1177 dəfə