İki qardaş ölkə daim birlikdə!

Bakı:

23 °C

64 %

7 m/s

Əlaqə

AZ RU EN

Ana səhifə / Siyasət / İki qardaş ölkə daim birlikdə!

İki qardaş ölkə daim birlikdə!

30.10.2021 [10:23]

Azərbaycan nə deyirsə, Türkiyə də onu deyir! Türkiyə nə deyirsə, Azərbaycan da onu deyir!

Son zamanlar sosial şəbəkədə virtual siyasətlə məşğul olan və xaricdən idarə olunan internet kanallarında siyasi moizələr söyləyən bəzi “siyasətçi”lər, “jurnalist-ekspert”lər Azərbaycan-Türkiyə münasibətlərini hədəfə almağa çalışırlar. İki ölkə arasında dostluq, qardaşlıq və strateji tərəfdaşlığın zirvədə olduğu indiki məqamda dövlətlərimizin guya birlikdə hərəkət etmədiyini iddia etmək absurd və gülüncdür. “Fake news” (saxta məlumat, dezinformasiya) yaymaq taktikası ilə ictimai rəyi yanıltmağa çalışan belələrinin özlərinə də yaxşı məlumdur ki, bu gün dünyada Türkiyə və Azərbaycan qədər bir-birinə yaxın olan ölkələr tapmaq mümkün deyil. Azərbaycan-Türkiyə dostluğu və strateji tərəfdaşlığı dünya üzrə unikal bir nümunəyə çevrilib.

Dostluq, qardaşlıq və strateji tərəfdaşlıq münasibətləri ən yüksək zirvədə

Azərbaycan və Türkiyə daim bir-birini ən yüksək səviyyədə dəstəkləyir, milli maraqlarının qorunmasında qətiyyətli mövqe nümayiş etdirirlər. Daha dəqiq desək, Türkiyə və Azərbaycan nəinki regionda, eləcə də beynəlxalq miqyasda bir-birini ən sıx və yaxından dəstəkləyən ölkələr kimi çıxış edirlər. Xüsusilə də, İkinci Qarabağ müharibəsi Azərbaycan-Türkiyə qardaşlığının sarsılmaz olduğunu və möhkəm təməllərə əsaslandığını bir daha bütün dünyaya nümayiş etdirdi. İki ölkə, sözün əsl mənasında, yeni bir dostluq və qardaşlıq dastanı yazdı, tarixi salnamə yaratdı.

Postmüharibə dövrünün reallıqları - elə son günlər müşahidə olunan proseslər də bu gerçəkliyi bir daha təsdiqləyir. Yeri gəlmişkən, Türkiyə Respublikasının Prezidenti Rəcəb Tayyib Ərdoğanın oktyabrın 26-da ölkəmizə səfəri, səfər çərçivəsində Füzuli Beynəlxalq Hava Limanının açılış mərasiminin olması, Zəngəzur dəhlizinin - Horadiz-Cəbrayıl-Zəngilan-Ağbənd avtomobil yolunun təməlinin qoyulması və digər mühüm tədbirlər Azərbaycan-Türkiyə birliyinin bariz nümunəsi - əyani təzahürüdür. Eyni zamanda, Zəngilanın Ağalı kəndində Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğanın mətbuata birgə bəyanatlarla çıxışları zamanı səsləndirilən fikirlər bir daha bu qənaətə gəlməyə imkan verir: Azərbaycan və Türkiyə birlikdədir, Azərbaycan nə deyirsə, Türkiyə də onu deyir, Türkiyə nə deyirsə, Azərbaycan da onu deyir! Dövlətimizin başçısı bəhs olunan çıxışı zamanı “Bu gün regional işlərdə, hətta dünya çapında Türkiyə və Azərbaycan əməkdaşlığı, qardaşlığı önəmli amilə çevrilib”, - deyə vurğulayıb. Prezident Rəcəb Tayyib Ərdoğan isə deyib: “Bir millət, iki dövlət olmağın verdiyi ortaq şüur və ruhla hərəkət edirik”.

Regionda yeni geostrateji konfiqurasiyanın formalaşmasında Azərbaycan-Türkiyə müttəfiqliyi aparıcı faktor kimi

Xüsusi vurğulamaq gərəkdir ki, postmüharibə dövründə bölgədə qlobal əhəmiyyətli yeni geostrateji konfiqurasiyanın formalaşmasında Azərbaycan-Türkiyə müttəfiqliyi aparıcı faktor kimi çıxış edir. Heç şübhəsiz, postmüharibə dövründə yaranmış yeni reallıqların fonunda Azərbaycan-Türkiyə dostluğu və strateji tərəfdaşlığı regionda dayanıqlı sülhün, etibarlı təhlükəsizliyin və çoxtərəfli əməkdaşlığın təmin olunması baxımından strateji önəm kəsb edir.

İki ölkənin sıx əməkdaşlığı və birgə təşəbbüsləri regionda çoxşaxəli qarşılıqlı faydalı işbirliyinin dərinləşməsində, strateji inteqrasiyanın daha intensiv xarakter almasında vacib rola malikdir. Bir sözlə, iki dövlət birgə addımlayaraq regionun strateji gələcəyini birlikdə inşa edirlər. Prezident İlham Əliyevin qeyd etdiyi kimi: “Tam əminəm ki, bundan sonra da Türkiyə və Azərbaycan iki qardaş ölkə kimi bir yerdə irəli gedəcək, xalqlarımız bir-birinə daha da yaxın olacaq, dövlətlərimiz bundan sonra da uğurlu əməkdaşlıq edəcək. Beləliklə, Türkiyə ilə Azərbaycanın birgə gücü daha da təsirli olacaq”.

Nurlan QƏLƏNDƏRLİ

Paylaş:

Baxılıb: 693 dəfə