Uşaqların müdafiəsi və onların bütün problemlərinin həlli dövlətimizin əsas prioritetlərindəndir

Bakı:

25 °C

54 %

4 m/s

Əlaqə

AZ RU EN

Ana səhifə / Siyasət / Uşaqların müdafiəsi və onların bütün problemlərinin həlli dövlətimizin əsas prioritetlərindəndir

Uşaqların müdafiəsi və onların bütün problemlərinin həlli dövlətimizin əsas prioritetlərindəndir

29.09.2010 [09:41]

Mehriban xanım Əliyeva: Uşaqları aclıqdan, xəstəliklərdən, müharibələrdən və böyüklərin laqeydliyindən qorumaq lazımdır
Hər bir millətin gələcəyi sayılan uşaqların sosial müdafiəsi, təhsillə bağlı problemlərinin həlli, məktəbəqədər yaş dövründə təlim-tərbiyəsi və sağlamlığı dövlətin xüsusi diqqət ayırdığı məsələlərdəndir. Əsas fəaliyyət istiqamətlərindən biri elm, təhsil, mədəniyyət, səhiyyə, idman, ekoloji sahələrə aid proqram və layihələr hazırlayıb həyata keçirmək, sağlam mənəvi dəyərlərin qorunması ilə bağlı aparılan işlərdə iştirak etmək, uşaq və gənclərin hərtərəfli biliklərə malik vətəndaş kimi yetişdirilməsi işinə xidmət etmək, uşaq müəssisələrinin infrastrukturlarını, səhiyyə və tibbi təsisatları inkişaf etdirmək olan Heydər Əliyev Fondunun təşkilatçılığı və dəstəyi Azərbaycanda təhsil, səhiyyə sahəsində bir sıra layihələr həyata keçirilib. Bu işdə Azərbaycanın birinci xanımı, YUNESKO və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsü ilə görülən işləri xüsusilə qeyd etmək lazımdır. Heydər Əliyev Fondunun təşəbbüsü ilə həyata keçirilən “Yeniləşən Azərbaycana yeni məktəb” layihəsi çərçivəsində 2005-2009-cu illərdə 283 yeni məktəb binası inşa olunaraq lazımi avadanlıqlarla təchiz edilib. “Təhsilə dəstək” layihəsi çərçivəsində bir çox məktəblər yenidənqurma, təmir-bərpa işlərindən sonra istifadəyə verilib.
Fondun internat məktəbləri və uşaq evləri ilə bağlı hazırladığı proqram bu istiqamətdə həyata keçirilən ən mühüm tədbirlərdəndir. Heydər Əliyev Fondu kimsəsiz, valideyn himayəsindən məhrum, əqli və fiziki cəhətdən qüsurlu körpələrə, habelə Ermənistanın Azərbaycana hərbi təcavüzü nəticəsində məcburi köçkün həyatı yaşayan uşaqlara qayğısını heç vaxt əsirgəmir. Fondun “Diabetli uşaqlara ən yüksək qayğı” və “Talassemiyasız həyat naminə” layihələri çərçivəsində görülən tədbirlər, ürək xəstəliyindən əziyyət çəkən körpələrin xarici ölkələrdə cərrahiyyə əməliyyatına kömək göstərməsi böyük əhəmiyyət kəsb edir.
Yeri gəlmişkən, sentyabrın 27-də Moskvada YUNESKO-nun və Rusiya Federasiyası hökumətinin təşkilatçılığı ilə kiçikyaşlı uşaqların tərbiyəsi və təhsili məsələlərinə həsr edilmiş “Millətlərin sərvətinin yaranması” mövzusunda ümumdünya konfransının açılış mərasimində çıxış edən Azərbaycanın birinci xanımı, YUNESKO və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban Əliyeva çıxış yuxarıda qeyd edilən məsələrə bir daha toxunub.
Konfransın kiçikyaşlı uşaqların təhsilinə və tərbiyəsinə yüksək səviyyədə həsr edilmiş ilk nüfuzlu beynəlxalq forum olduğunu vurğulayan Mehriban xanım Əliyeva çıxışı zamanı uşaqların ilkin tərbiyəsi, təhsili, fiziki və əqli cəhətdən qüsurlu olan uşaqlara qayğı, müharibədən, aclıq, xəstəlik və yoxsulluqdan əziyyət çəkən körpələrin vəziyyəti məsələlərinə bir daha diqqət yönəldib.
İrqçilik, yoxsulluğun insanlar arasında sədd olmadığını xatırladan Mehriban xanım Əliyeva BMT-nin 1989-cu ildə qəbul edilmiş Uşaq Hüquqları Haqqında Konvensiyasının müddəalarını əsas gətirərək bildirib ki, bütün uşaqlar dərisinin rəngindən, sosial vəziyyətindən, dini mənsubiyyətindən asılı olmayaraq yaşamaq, sağlamlıq, inkişaf və təhsil almaq üçün bərabər hüquqlara malikdirlər: “Lakin balaca uşaqlar öz hüquqları barədə heç nə bilmirlər. Onlar bütünlüklə bizə - yaşlılara ümid edir və inanırlar. Təəssüf ki, biz, yaşlılar bu etimadı heç də həmişə doğrultmuruq”.
Bu gün dünyada müharibə və münaqişələr, texnogen və təbii fəlakətlər baş verməkdə, onların özü ilə gətirdiyi aclıq və yoxsulluq hökm sürməkdədir. Bunlar azmış kimi xəstəliklər, dərman çatışmazlığı və vaxtında tibbi yardım göstərilməməsi milyonlarla uşağın həyatına son qoyur. Mehriban xanım Əliyevanın da qeyd etdiyi kimi, inkişaf etməkdə olan ölkələrdə 10 milyondan çox uşaq qarşısı alına biləcək xəstəliklərdən ölür. O, əqli və fiziki cəhətdən qüsurları olan uşaqların da cəmiyyətin bir parçası və sağlam gələcəyin təminatçısı ola biləcəyini xüsusi vurğulayıb: “Bizimlə yanaşı, imkanları məhdud və xüsusi ehtiyacları olan uşaqlar yaşayır. Paradoksal da olsa çox vaxt məhz onlar cəmiyyət tərəfindən qəbul edilməməyin nə demək olduğunu öz nümunələrində hiss edirlər”.
Mehriban xanım Əliyeva ölkəmizdə azyaşlı uşaqların sosial müdafiəsinin gücləndirilməsi, təhsillə bağlı problemlərinin həlli istiqamətində addımların atıldığını vurğulayıb: “Bu gün Azərbaycanda məktəbəqədər təhsilin inkişafına dövlət tərəfindən də lazımi diqqət yetirilir. Məktəbəqədər təhsil sisteminin təkmilləşdirilməsinə yönəlmiş xüsusi dövlət proqramı qəbul edilmişdir, ümumtəhsil məktəblərində məktəbəqədər yaşlı uşaqlar üçün hazırlıq qrupları şəbəkəsi inkişaf etdirilir. Əlbəttə, problemlər də vardır və hələ görüləsi işlər çoxdur. ümid edirəm ki, bu konfransın nəticələri mövcud problemlərin həllinə kömək edəcək və bu sahədə novator ideyalarla, dünyada qazanılmış nailiyyətlərlə tanış olmağa imkan yaradacaqdır.
Burada ümumi məxrəc kiçik insan və onun gələcəyidir. Bu gələcək bu gün bizim əlimizdədir və ona görə biz məsuliyyət daşıyırıq. Uşaqların rifahı, onların xoşbəxt həyatı naminə öz qüvvələrini, biliklərini, səbrini, diqqətini və məhəbbətini əsirgəməyən insanların hamısına bir daha təşəkkür etmək istərdim”.
SEVİNC

Paylaş:

Baxılıb: 1116 dəfə