Ermənistan Rusiyaya “əvəzedici” axtarır

Bakı:

24 °C

88 %

6 m/s

Əlaqə

AZ RU EN

Ana səhifə / Siyasət / Ermənistan Rusiyaya “əvəzedici” axtarır

Ermənistan Rusiyaya “əvəzedici” axtarır

29.03.2022 [10:42]

Düşmən ölkə Fransa və ya ABŞ sülhməramlıları “ideyası”nı ortaya atmağa çalışır

P.İsmayılov

İllərdir başqa ölkələrin kölgəsində və hesabına yaşamağa öyrənmiş Ermənistan özünün “siyasi xətti”ndə dəyişiklik etməyə hazırlaşır. Belə ki, Rusiya sülhməramlılarının yerləşdiyi ərazilərdə törətməyə çalışdıqları təxribatları “daşa dəyən” ermənilər bundan “möhkəm inciyib”. Bunun nəticəsidir ki, sülhməramlı missiya üçün Rusiyanın “əvəzedicisi” axtarılmaqdadır. Daha doğrusu, Ermənistan mətbuatı ictimai rəydə “Rusiyadan imtina” fikrini formalaşdırmaq üçün hərəkətə keçib. Bu ölkənin tanınmış siyasətçiləri və analitikləri açıq kontekstdə Rusiyanın onların arxasında dayanmadığını və bunun üçün də sülhməramlı “vəzifəyə layiq olmadıqlarını” bildirirlər. Bununla yanaşı isə, siyasi meyidə çevrilmiş ATƏT-in Minsk qrupunu yenidən diriltmək və bu çərçivədə - ABŞ və Fransadan ibarət sülhməramlı kontingent formalaşdırılmasını, onun Qarabağa gəlməsini arzulayırlar. Hətta rəsmi İrəvana yaxınlığı ilə seçilən siyasi ekspertlər onların “öz işlərini daha məsuliyyətlə yerinə yetirəcəklər”inə əminlik ifadə edirlər. Bu isə onu deməyə əsas verir ki, Ermənistan yenidən öz xislətinə uyğun olaraq rəng dəyişməkdədir.

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev son zamanlar, daha doğrusu Rusiya ilə Ukrayna arasında hərbi gərginlik yaranan dövrdən Ermənistanın bir sıra manevrlər etdiyini bildirib. Rəsmi İrəvan, hətta humanitar yardım adı altında Gürcüstan vasitəsilə Ukraynaya yardım göstərmək də istəyib: “Ermənistan anlayır ki, Rusiyanın qarşıdakı dövrdə iqtisadiyyatı zəifləyəcək və onlara tam dəstək ola bilməyəcək. Bu baxımdan indidən “yarınma siyasəti” yolu ilə müxtəlif xarici dövlətlərə müxtəlif səpkili müraciətlər ünvanlayırlar. Sülhməramlı məsələsi ilə bağlı manevr də bunun tərkib hissəsidir. Ümumiyyətlə, Rusiya sülhməramlılarının özünümüdafiədən başqa atəş açmaq ixtiyarı yoxdur. Onların əsas məqsədi iki münaqişə tərəfinin arasında dayanmaqdır. Ermənilər isə sülhməramlılardan istifadə etməklə Azərbaycan ordusuna qarşı təxribat törətməyə çalışır. Sonradan isə guya atəşkəsin Azərbaycan tərəfindən pozulması ilə bağlı dünyaya car çəkmək istəyirlər. Hər hansı bir sülhməramlı yaralanacağı təqdirdə bunu da Azərbaycanın ayağına yazmağa çalışacaqlar. Bunlar sadəcə bir manevrdir”.

Ermənilərin ATƏT-in Minsk qrupunun digər iki üzvünün Rusiyanı əvəz etməsi ilə bağlı “planlarına” gəldikdə isə, A.Nağıyev belə bir əvəzetmədə hər iki tərəfin razılığının vacib olduğunu söyləyib. Onun fikrincə, hər kəs anlamalıdır ki, Azərbaycan öz ərazisində ortaya çıxa bilən istənilən problemin öhdəsindən gəlmək iqtidarındadır. “Bunun isə Ermənistana və ya başqa ölkələrə dəxli yoxdur. Qondarma qurum yaranan kommunal problemlərdən istifadə etməklə guya fövqəladə hal yaratmaq istəyir. Rusiya sülhməramlılarının fikri isə gələcəkdə yarana biləcək “münaqişəni” yatırtmaqdır. Çünki Araik Arutyunyana məxsus bəzi separatçı silahlılar orada yaşayan erməni vətəndaşlara qarşı hər hansı bir addım ata bilərlər. Onlar gah qazla, gah da sülhməramlı problemi adı altında status-kvonu saxlamaq istəyirlər”, - deyə millət vəkili əlavə edib.

Paylaş:

Baxılıb: 1345 dəfə