Ermənistandan ikili oyun

Bakı:

21 °C

64 %

3 m/s

Əlaqə

AZ RU EN

Ana səhifə / Siyasət / Ermənistandan ikili oyun

Ermənistandan ikili oyun

07.04.2022 [10:03]

Terrorçu ölkə regionda təhlükəsizliyin bərpasına imkan vermir

P. SADAYOĞLU

2020-ci ildə qəti məğlubiyyətə uğrayan Ermənistan yenidən məkrli planlar axtarışındadır. Belə ki, iki ilə yaxın müddət keçməsinə baxmayaraq, üçtərəfli Bəyanatın şərtlərinə əməl etməyən bu ölkə regionda davamlı sülhün bərpasına mane olur. İllərdir ki, özünü dünyaya məzlum obrazda təqdim etməyə çalışan Ermənistan terrorçu zehniyyətdən əl çəkmir. Sosial problemlərin əlində əsirə çevrilmiş bu ölkə özünün əsassız iddiaları ilə regional inkişafın qarşısını alır, o cümlədən də regionda təhlükəsizliyə təhdid yaradır. Məsələn, hələ də gizlincə Qarabağa çağırışçı göndərən Ermənistan müharibə təhlükəsini yenidən aktuallaşdırır. Yeri gəlmişkən, bu faktı “Ermənistan” müxalifət blokunun deputatı Qeqam Manukyan bildirib. O deyib ki, bir çox erməni anaları ümid edirdilər ki, müharibə bitəndən sonra oğulları Qarabağda xidmət etməyəcək. Amma indi orada və daha pis şəraitdə xidmət edirlər: “Hakimiyyət bizə yalan danışıb, çağırışçıları döyüş mövqelərinə göndərməmək vədini yerinə yetirməyib. Amma reallıqda valideynlər övladlarının əslində cəbhə bölgəsinə göndərildiyini görürlər”.

Digər tərəfdən, bir müddət öncə baş nazir Nikol Paşinyan da bildirmişdi ki, Qarabağdan erməni silahlı qüvvələri çıxsa, orada əhali qalmayacaq”. Yəni qanunsuz erməni silahlı dəstələrinin ərazimizdə qalmasına o, həm də bu cür haqq qazandırmağa çalışıb.

Məsələ ilə bağlı fikirlərini bölüşən politoloq İbrahim Babayev bildirib ki, Ermənistan açıq şəkildə 10 noyabr üçtərəli Bəyanatı ilə məsuliyyət daşıdığı müddəaları həyata keçirməkdən boyun qaçırır. Bu isə həmin dövlətin regionda stabilləşməyə maraq göstərmədiyini bir daha təsdiqləyir: “Ermənistan Qarabağla bağlı köhnə siyasətini yeni şəraitdə aparmağa köklənib. Başqa sözlə desək, onlar II Qarabağ müharibəsidə biabırcasına məğlub olmalarına baxmayaraq, 30 illik işğal siyasətlərini davam etdirmək istəyirlər. Bu gün iki dövlət arasında əsas məsələ delimitasiya və demarkasiya da daxil olmaqla beş bənddən ibarət problemlərin həll edilməsidir. Azərbaycan Ermənistanın bu məsələdə müsbət davranışlarına ümid edir. Amma görünən budur ki, Ermənistan heç bir müsbət addım atmaq niyyətində deyil. Azərbaycan bütün məsələlərdə beynəlxalq hüquqa, suverenliyə hörmət məsələsinə istinad edir. Ermənistan da eyni mövqeni paylaşmalıdır. Bu, qarşıdakı mərhələdə danışıqların çoxvektorlu inkişafına və effektivliyinə yaxından kömək edə bilər”.

İ.Babayevin fikrincə, Ermənistanın şərtlərlə danışması yolverilməzdir. Azərbaycan işğaldan azad edilmiş regionlarda, o cümlədən sərhəd ərazilərimizdə son bir ildə kifayət qədər möhkəm və etibarlı infrastruktur yaradıb. Orada bizim postlarımız qurulub, yollar çəkilib, müxtəlif kommunikasiyalar formalaşdırılıb. Bu, Azərbaycanın beynəlxalq aləm tərəfindən tanınmış sərhədləridir: “Biz heç kimin topağını zəbt etməmişik və atılan bütün addımlar beynəlxalq qanunlarla tanınan sərhədlərimiz çərçivəsində həyata keçirilir. Paşinyan və onun komandası anlamalıdır ki, Ermənistanın tutduğu yol onu dalana aparır. Onsuz da Azərbaycan qarşısına qoyduğu bütün hədəflərə çatacaq. Rəsmi Yerevan real situasiyanı dəyərləndirərək davamlı sülhün bərqərar olması üçün addım atmalıdır. Bu, onların yeganə xilasıdır. Qarabağa çağırışçı göndərməklə və ya orada bir neçə başıpozuq silahlı dəstə saxlamaqla heç bir uğur əldə edə bilməyəcəklər. Həmin dəstələri də digərlərinin taleyi gözləyir”, - deyə İ.Babayev əlavə edib.

Paylaş:

Baxılıb: 657 dəfə