Anti-NATO koalisiyası yaradılır?

Bakı:

23 °C

56 %

5 m/s

Əlaqə

AZ RU EN

Ana səhifə / Siyasət / Anti-NATO koalisiyası yaradılır?

Anti-NATO koalisiyası yaradılır?

16.04.2022 [11:13]

M.ABDULLAYEV

Rusiya-Ukrayna müharibəsi uzandıqca ortaya yeni təfərrüatlar və versiyalar çıxır. Bunlardan biri də Şimali Atlantika Alyansına (NATO) qarşı koalisiyanın formalaşdırılması ilə bağlıdır. Belə bir iddianın ortaya çıxması heç də təsadüfi deyil. Məsələ burasındadır ki, ABŞ başda olmaqla, əksər NATO dövlətləri müharibə tərəflərindən birinə - Ukraynaya qarşı hücuma keçən və burada bir sıra yaşayış məntəqələrində ciddi dağıntılar törədən Rusiyaya qarşı vahid koalisiyada birləşiblər. Əslində, müharibənin başlamasına rəvac verən amillərdən biri də NATO-nun genişlənmə siyasəti oldu. Rusiya Alyansın nüfuz dairəsini onun sərhədlərinə doğru genişləndirmək istiqamətindəki səylərini qəbul etmədi.

Müharibə başlayandan sonra isə ABŞ və Avropa dövlətləri Rusiyaya qarşı, necə deyərlər, ikinci cəbhə açıblar. “Qoca qitə”dən Ukraynaya dəstəyin miqyası kifayət qədər əhatəlidir və getdikcə daha da genişlənir. İndiyədək buradan Rusiyaya qarşı beş mərhələdə sərt sanksiyalar gəlib. Hədəf şimal qonşumuzun iqtisadi-maliyyə sistemini tamam çökdürməkdən və bu imkanlarını məhdudlaşdırmaqdan ibarətdir. Son günlərdə isə artıq NATO dövlətlərinin açıq şəkildə müharibə tərəfinə çevrildiyi müşahidə edilir. Belə ki, sözügedən ölkələr Ukraynaya silah tədarükünü artırıblar. Həm də Ukraynaya ötürülən hərbi texnika yalnız müdafiə xarakterli silahlar deyil. NATO ölkələrinin yüksəksəviyyəli rəsmilərindən ard-arda Ukraynaya hücum və yaxud daha dağıdıcı silahların verilməsinin zəruriliyini əsaslandıran açıqlamalar gəlməkdədir. Məhz NATO ölkələrindən tədarük olunan müasir silahlar sayəsində Ukrayna Rusiya qoşunlarına qarşı ciddi müqaviməti təşkil etməyə, hətta bir sıra yaşayış məntəqələrini geri qaytarmağa müvəffəq olub. Bu günlərdə isə sosial şəbəkələrdə NATO-nun hərbi karvanının Ukrayna ərazisinə keçdiyini əks etdirən videomaterial paylaşılıb. Həmçinin NATO-nun təlimçi kimi fəaliyyət göstərən bir qrup zabiti Mariupolda mühasirəyə düşdü və döyüş bölgəsindən çıxmaq üçün Rusiya hərbçilərindən humanitar dəhliz istədi.

Alyansın Ukraynaya belə açıq dəstəyinin müqabilində Rusiya tərəfində anti-NATO koalisiyasının formalaşdırılması barədə fikirlər müzakirə mövzusuna çevrilib. Bu barədə Rusiya dövlət dumasının deputatı Mixail Şeremet danışıb. O, beynəlxalq anti-NATO koalisiyasının yaradılmasının nəhayət zamanının yetişdiyini bildirib. Deputat vurğulayıb ki, Şimali Atlantika Alyansı bütün hədləri aşıb, qurum Rusiyaya hücum üçün Ukraynada platsdarm hazırlamağa çalışır. M.Şeremetin ehtimallarına görə, təklif olunan yeni koalisiyaya KTMT-nin sıralarında yer alan ölkələr (Ermənistan, Belarus, Qazaxıstan, Qırğızıstan, Rusiya, Tacikistan və Özbəkistan ) qoşula bilərlər. O əlavə edib ki, Hindistanın və Çinin də anti-NATO koalisiyasına qoşulmaları yaxşı olardı.

Rusiyada anti-NATO koalisiyasının yaradılması ideyasının yenidən gündəmə gətirilməsinə səbəb olan başqa amillər də var. Məlumata görə, Finlandiyanın da NATO-ya üzvlüyə qəbul olunması müzakirə mövzusudur. Bəs bu dəfə necə, Rusiya əzəli rəqibinin onun digər istiqamətdən sərhədlərinə yaxınlaşmasına seyirçi qalacaqmı?

Paylaş:

Baxılıb: 632 dəfə