Azərbaycan anti-terror əməliyyatı keçirə bilər

Bakı:

25 °C

50 %

1 m/s

Əlaqə

AZ RU EN

Ana səhifə / Siyasət / Azərbaycan anti-terror əməliyyatı keçirə bilər

Azərbaycan anti-terror əməliyyatı keçirə bilər

29.07.2022 [10:10]

Ermənilərin artan təxribatları nəyə hesablanıb?

N.BAYRAMLI

Son günlər Ermənistanla sərhəddə və Rusiya sülhməramlı kontingentinin müvəqqəti yerləşdirildiyi ərazilərimizdə təxribatlar artmaqda davam edir. Bu günlərdə isə bu təxribatlara tuş gələn ərazilərimizin miqyası daha da genişlənib. Buna nümunə olaraq Azərbaycan Müdafiə Nazirliyinin iyulun 26-da açıqladığı məlumatı xatırlada bilərik. Həmin məlumatda qeyd olunurdu ki, ötən sutka ərzində erməni silahlı birləşmələri tərəfindən ümumilikdə 9 dəfə təxribat xarakterli silahlı insident törədilib. Bunlardan 2-si Azərbaycan-Ermənistan dövlət sərhədinin Qarakilsə rayonunun Saybalı yaşayış məntəqəsi istiqamətində yerləşən mövqelərdən ordumuzun Laçın rayonunun Minkənd yaşayış məntəqəsi istiqamətində yerləşən mövqelərini atəşə tutmaqla baş verib. Digər 7 insident isə Rusiya sülhməramlılarının müvəqqəti yerləşdiyi Azərbaycan ərazisindəki qanunsuz erməni silahlı dəstəsinin üzvləri tərəfindən Azərbaycan Ordusunun Tərtər, Ağdam, Xocavənd və Xocalı rayonları istiqamətlərində yerləşən mövqelərini fasilələrlə müxtəlif çaplı silahlardan atəşə tutmaqla qeydə alınıb. Bütün hallarda ordumuzun bölmələri tərəfindən görülən adekvat cavab tədbirləri nəticəsində qarşı tərəf susdurulub.

Ümumiyyətlə, ermənilərin bu təxribatı hansı məqsədlərə hesablanıb? Bu barədə qəzetimizə açıqlama verən hərbi ekspert Emin Həsənli bildirib ki, Azərbaycan, Ermənistan və Rusiya liderləri arasında imzalanmış 10 noyabr 2020-ci il tarixli Birgə Bəyanatından sonra erməni tərəfi mütəmadi olaraq təxribatlar törətməkdə davam edir. Onun sözlərinə görə, 44 günlük Vətən müharibəsi Azərbaycanın gücünü bütün dünyaya nümayiş etdirdi: “Müharibə nəticəsində erməni ordusu tamamilə məhv edildi. Bu səbəbdən də, 2020-ci il noyabrın 10-da kapitulyasiya aktını imzalamağa məcbur oldu. Amma görünən odur ki, ermənilər ağıllarını başlarına yığmayıblar. Son hadisələr bunu deməyə əsas verir. Ümumiyyətlə, Ermənistan heç vaxt beynəlxalq hüquq normalarına əməl etməyib. Ona görə də, Azərbaycan BMT Təhlükəsizlik Şurasının müvafiq qətnamələrini öz gücünə icra etdi. 10 noyabr razılaşmasında tərəflərin öhdəliyi var. Bölgəyə rus sülhməramlılarının gəlməsi ilə yanaşı işğalçı-terrorçu qoşunlar çıxmalıdır. Üçtərəfli bəyanatda bu, konkret əksini tapıb. Rus sülhməramlıları bunu təmin etməlidir”.

Hərbi ekspert qeyd edib ki, sülhməramlıların missiyası yalnız Azərbaycan maşınlarını yoxlamaqdan ibarət deyil. Həm də bölgədəki erməni təxribatlarına son qoymaqdır. Separatçılar dəfələrlə təxribatlar törədiblər. Belə vəziyyət uzun sürə bilməz. Problemlər birdəfəlik həll olunmalıdır, biz bundan sonra da 30 il gözləyə bilmərik. Qarabağdakı ermənilər ya dinc yaşamalıdırlar, ya da Azərbaycan lazımi tədbirlər görəcək. Bu gün Azərbaycan Ordusu çox güclüdür, qarşıya qoyulan bütün tapşırıqları yerinə yetirir. Bundan sonra da istənilən tapşırığı yerinə yetirməyə hazırdır. Əgər ermənilər təxribatlara davam etsələr, dəmir yumruq yenə də başlarına dəyəcək”.

E.Həsənlinin fikrincə, Azərbaycan qanunsuz silahlı birləşmələrin olduğu ərazilərdə anti-terror əməliyyatları keçirə bilər. Çünki dövlətimizin öz sərhədləri çərçivəsində bu əməliyyatları keçirmək hüququ var. Dövlət sərhədində təxribatların törədilməsinə gəlincə, ekspert hesab edir ki, Ermənistan regionda vəziyyəti gərginləşdirməyə çalışmaqla münasibətlərin normallaşdırılması təşəbbüslərinə qarşı çıxır. Onun sözlərinə görə, belə təxribatlar rəsmi İrəvanın özü üçün problemlər yaradacaq: “Ermənistan müharibədə məğlub olub, ona görə də mövcud reallıqlarla barışmalı, razılaşmalara, o cümlədən beynəlxalq hüquq normalarına və götürdüyü öhdəliklərə əməl etməlidir. Azərbaycan öz təhlükəsizliyini yüksək səviyyədə təmin edir. Dövlət sərhədində Ermənistanın hərbi təxribatlarının qarşısının necə alındığını görürük. Bu mənada, erməni tərəfinin bütün təxribatları layiqli cavabını alacaq”.

Paylaş:

Baxılıb: 647 dəfə