BMT Baş Assambleyasının 77-ci sessiyasında...

Bakı:

24 °C

55 %

6 m/s

Əlaqə

AZ RU EN

Ana səhifə / Siyasət / BMT Baş Assambleyasının 77-ci sessiyasında...

BMT Baş Assambleyasının 77-ci sessiyasında...

20.09.2022 [09:52]

Ermənistanın təxribatları haqqında məlumatlar dünya ictimaiyyətinin diqqətinə çatdırılacaq

N.BAYRAMLI

Nyu-Yorkda Birləşmiş Millətlər Təşkilatının (BMT) Baş Assambleyasının 77-ci sessiyası öz işinə başlayıb. İclası təşkilatın baş katibi Antonio Quterreş və sessiyanın sədri, macar diplomatı Çaba Kyorosi açıblar. Sessiya ərzində diplomatlar gündəliyi, görüşlərin cədvəlini, nümayəndə heyətlərinin səlahiyyətlərini təsdiq etməli və işçi komitələr yaratmalı olacaqlar. Bir il ərzində davam edəcək yeni sessiyanın gündəliyinə iqlim dəyişikliyi, koronavirus və digər infeksiyalarla mübarizə, davamlı inkişaf məsələləri, inkişaf etməkdə olan ölkələrin borcları, müasir münaqişələr və böhranlar da olmaqla, bütün əsas beynəlxalq mövzular daxildir. Əsas toplantı müxtəlif ölkələrin dövlət, hökumət başçıları və xarici işlər nazirlərinin iştirak edəcəyi yüksək səviyyəli həftə (20-26 sentyabr) olacaq. İclas çərçivəsində çoxlu sayda ikitərəfli və çoxtərəfli görüşlər keçiriləcək.

Sessiyada Azərbaycanı xarici işlər naziri Ceyhun Bayramov təmsil edəcək. Artıq C.Bayramovun rəhbərlik etdiyi nümayəndə heyəti ABŞ-ın Nyu-York şəhərindədir. Səfər zamanı nazirin sessiya çərçivəsində keçiriləcək tədbirlərdə iştirak, habelə xarici dövlətlərin rəsmiləri ilə ikitərəfli görüşlərin keçirilməsi nəzərdə tutulur.

Sessiyanın əhəmiyyətindən danışan politoloq Yalçın Hacızadə qəzetimizə açıqlamasında bildirib ki, BMT yarandığı 1945-ci ildən Nizamnaməsinə uyğun olaraq hər il Baş Assambleyanın sessiyası keçirilir. 77-ci sessiyanın gündəliyinə bir sıra məsələlər daxildir. Onun sözlərinə görə, hazırda dünyanı iqlim dəyişikliyi, koronavirus pandemiyası ciddi narahat edir ki, sessiyanın gündəliyinə bu məsələlər daxil edilib. Çünki iqlim dəyişikliyinin fəsadları göz önündədir və qlobal istiləşmə bu fəsadları daha da artırır. Digər tərəfdən COVID-19 pandemiyası iki ildir ki, dünya birliyinə, xüsusilə ölkələrin iqtisadiyyatına və insanların sağlamlığına böyük zərbə vurdu. Eləcə də, davamlı inkişaf məsələləri, müasir münaqişələr və böhranlar daxil olmaqla bütün önəmli qlobal mövzular sessiya çərçivəsində müzakirə olunacaq.

Politoloq qeyd edib ki, müxtəlif ölkələrin dövlət, hökumət başçıları və xarici işlər nazirlərinin iştirak edəcəyi yüksək səviyyəli sessiyada iştirakçı şəxslər öz ölkələrinin də problemini yüksək tribunadan səsləndirəcəklər: “BMT dünyanın 200-ə yaxın ölkəsini özündə cəmləşdirsə də, dünyada mövcud problemlərin qarşısının alınmasında təsirsiz bir quruma çevrilib. Bunun da əsas səbəbi fərqli maraqları olan ölkələrin BMT-nin Təhlükəsizlik Şurasında təmsil olunmasıdır. BMT Nizamnaməsinə görə dünyada təhlükəsizliyin və sülhün təminatçısı Təhlükəsizlik Şurasıdır. Amma bu gün yaranan və davam edən münaqişələrin hər birinin arxasında müxtəlif maraqları olan BMT Təhlükəsizlik Şurasına daxil olan ölkələr dayanır”.

Y.Hacızadə deyib ki, Baş Assambleyanın sessiyasında Azərbaycanı təmsil edən xarici işlər naziri C.Bayramov toplantının gündəliyində olan məsələlərlə yanaşı, ölkəmizin əsas problemi olan erməni təcavüzü barədə də iştirakçıları məlumatlandıracaq: “Bildiyimiz kimi üçtərəfli Bəyannamə əsasında Ermənistan Azərbaycan münasibətləri sülh prosesinin tənzimlənməsi mərhələsinə keçsə də, Ermənistanın qeyri-konstruktiv fəaliyyəti və təxribatları nəticəsində regionda sülh təmin oluna bilmir. Ermənistan həm Rusiyanın, həm də Avropa İttifaqının vasitəçiliyi çərçivəsində həyata keçirilən danışaqlarda əldə olunan razılaşmalarla bağlı imitasiya yaradır. Son təxribatları nəticəsində müzəffər ordumuz tərəfindən cavab alsa da, 80 hərbi qulluqçumuz şəhid olub. Bütün bunlar Ermənistanın dövlət terrorunun davam etməsini göstərir. Təbii ki, BMT tribunasında erməni təxribatları və onların nəticələri dünya ictimaiyyətinə çatdırılacaq”.

Paylaş:

Baxılıb: 677 dəfə