Ötən il torpaq qanunvericiliyinin pozulması ilə bağlı 1370 fakt müəyyən edilib

Bakı:

11 °C

82 %

4 m/s

Əlaqə

AZ RU EN

Ana səhifə / Siyasət / Ötən il torpaq qanunvericiliyinin pozulması ilə bağlı 1370 fakt müəyyən edilib

Ötən il torpaq qanunvericiliyinin pozulması ilə bağlı 1370 fakt müəyyən edilib

08.02.2011 [10:04]

Dünən Dövlət Torpaq və Xəritəçəkmə Komitəsində (DTXK) ötən ilin yekunlarına həsr olunmuş kollegiya iclası keçirilib. DTXK-nın sədri, akademik Qərib Məmmədov bildirib ki, 1999-cu ildə hüquqi status almış 2667 bələdiyyənin torpaqları və 1999-cu ildən 2009-cu ilədək yeni hüquqi status almış bələdiyyələrin torpaqları zəruri yerquruluşu xəritələri tərtib edilməklə özlərinə təhvil verilib. Yeni qanunvericiliyə müvafiq olaraq, bələdiyyələrin birləşməsi nəticəsində yenidən formalaşmış 1718 bələdiyyənin torpaqları əvvəlki bələdiyyələrdən təhvil alınıb. Respublika üzrə mövcud 1959 inzibati ərazi dairəsindən və 4593 ərazi vahidindən 47 rayon üzrə 403 inzibati ərazi dairəsinin və 846 ərazi vahidinin sərhədlərinin döngə nöqtələrinin koordinatlarının müəyyən edilməsi, mərz nişanlarının basdırılması və xəritələşdirilməsi işlərinə başlanılıb. Bundan başqa 200 inzibati ərazi dairəsinin və 344 inzibati ərazi vahidinin dövlət reyestrinin aparılması və onlara şəhadətnamənin verilməsi məqsədi ilə xəritələri hazırlanıb, təsdiq edilərək digər sənədlərlə birlikdə Milli Məclisə təqdim olunub.
Komitə sədri vurğulayıb ki, 2010-cu ildə 30398 vətəndaşın adına fərdi qaydada yaşayış evi və bağ sahələrinə görə plan və ölçü sənədləri hazırlanıb təqdim olunub. İndiyədək Komitə tərəfindən 2637 yaşayış məntəqəsi üzrə 801688 vətəndaşın adına kompleks və fərdi qaydada şəhadətnamə, 551 yaşayış məntəqəsi üzrə 190635 vətəndaşın adına isə kompleks qaydada plan və ölçü sənədi hazırlanıb verilib. Hesabat ilində, həmçinin, Bakı və Sumqayıt şəhərləri üzrə fərdi yaşayış evi və bağ sahələrinə görə 4695 vətəndaşın adına plan və ölçü sənədləri hazırlanıb.
Komitə sədri bildirib ki, ötən il torpaq qanunvericiliyinin pozulması ilə bağlı 1370 fakt müəyyən edilib. Bundan başqa 451 hal xəbərdarlıq (bildiriş) edilməklə aradan qaldırılıb, 919 inzibati xəta halı ilə bağlı protokol tərtib edilib. Kəsilmiş 43485 manat cərimənin 14046 manatı ödənilib, ödənilməmiş 29439 manat cərimə ilə bağlı müvafiq sənədlər tədbir görülmək üçün məhkəməyə göndərilib. İnzibati xəta hallarının 2-si vəzifəli, 93-ü hüquqi və 1275-i isə fiziki şəxslər tərəfindən törədilib. 2010-cu ildə kartoqrafiya sahəsində fəaliyyət göstərməsi üçün (lisenziya alınmasına) Komitəyə edilmiş 6 müraciət əsasında təqdim olunan sənədlər ekspertizadan keçirilməklə müvafiq komissiyanın qərarı ilə onlara lisenziya verilib və dövlət büdcəsinə 6600 manat vəsait ödənilib. Komitə tərəfindən 2010-cu ildə respublikanın ayrı-ayrı bələdiyyələri üzrə 1773 hərrac və müsabiqə təşkil olunub.
Q.Məmmədov diqqətə çatdırıb ki, ötən il “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” və “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”na uyğun olaraq Komitə tərəfindən mühüm işlər görülüb. Torpaq məsələləri ilə əlaqədar hesabat ilində 2 min 768 ərizə-şikayətə və 278 xüsusi nəzarətə alınmış şikayətə baxılıb müvafiq tədbirlər görülüb.
Dövlət sərhədlərinin delimitasiyası və demarkasiyasından danışan Komitə sədri qeyd edib ki, ötən il Azərbaycan ilə Rusiya arasında uzunluğu 390 km olan dövlət sərhədinin delimitasiyası işləri başa çatdırılıb və “Sərhəd müqaviləsi” imzalanıb. Həmçinin, Azərbaycan ilə Gürcüstan arasında 480 kilometrlik dövlət sərhədinin delimitasiyası ilə bağlı işlər davam edir. Sərhədin təxminən 300 km-i hər iki tərəfin dövlət komissiyaları tərəfindən razılaşdırılıb. Sərhədin qalan hissələrində hər iki ölkənin ekspertləri tərəfindən torpaqların faktiki istifadə vəziyyətinin dəqiqləşdirilməsi, arxivlərin öyrənilməsi və digər zəruri tədbirlər həyata keçirilir.
Komitə tərəfindən daşınmaz əmlakın qeydiyyatı, Azərbaycanda torpaq kadastr sisteminin təkmilləşdirilməsi və digər layihələrlə bağlı mühüm işlər həyata keçirilib. DTXK-nın sədri ötən il torpaq-kadastr xəritələri, yerquruluşu, mərzçəkmə və mərz nişanları haqqında, o cümlədən, geodeziya və kartoqrafiya işləri barədə də məlumat verib. Tədbirdə ötən il görülən işlərlə bağlı hesabatlar dinlənilib, qarşıda duran vəzifələrdən danışılıb, müzakirələr aparılıb və tapşırıqlar verilib.

Paylaş:

Baxılıb: 934 dəfə