“Detallı təkliflər” nədən ibarətdir?

Bakı:

23 °C

60 %

5 m/s

Əlaqə

AZ RU EN

Ana səhifə / Siyasət / “Detallı təkliflər” nədən ibarətdir?

“Detallı təkliflər” nədən ibarətdir?

15.04.2023 [10:45]

Laçın yolu ilə bağlı Azərbaycanın prinsipial mövqeyi var

Rusiya Xarici İşlər Nazirliyinin rəsmi nümayəndəsi Mariya Zaxarova aprelin 12-də keçirdiyi brifinqdə Laçın yolu ilə bağlı vəziyyətə münasibət bildirib. “Biz Laçın yolunun tam açılmasının tərəfdarıyıq”, - deyən Zaxarovanın sözlərinə görə, bunun üçün müvafiq səylər Müdafiə Nazirliyi, sülhməramlı kontingentin komandanlığı və XİN-lə əməkdaşlıq çərçivəsində atılır. O deyib ki, Laçın yolunun açılması ilə bağlı Azərbaycan və Ermənistan tərəfinin detallı təklifləri var. M.Zaxarova qeyd edib ki, bölgədə sülhməramlılar Qarabağ ermənilərinin ərzaq və zəruri mallarla təminatı məsələlərini həll edir. “Hər gün onlarla ton humanitar yük daşınır. Biz kompleks üçtərəfli razılaşmalar əsasında Ermənistan-Azərbaycan münasibətlərinin normallaşması məqsədi ilə vəziyyətin tezliklə həllini gözləyirik”, - deyə, Rusiya XİN sözçüsü vurğulayıb.

Ermənistanın Azərbaycanda həyata keçirdiyi təxribatlara və qeyri-qanuni fəaliyyətlərə son qoymaq məqsədilə Laçın yolunun başlanğıcında sərhəd nəzarət-keçid məntəqəsinin yaradılması barədə Azərbaycanın təklifinə müsbət cavab vermək əvəzinə, Ermənistan tərəfi Beynəlxalq Ədalət Məhkəməsinin Laçın yolu ilə bağlı qərarını da təhrif etməkdən çəkinmir. Xarici İşlər Nazirliyinin mətbuat katibi Ayxan Hacızadə Ermənistanın baş naziri Nikol Paşinyanın Laçın yolu ilə bağlı səsləndirdiyi iddiaları şərh edərkən bildirib ki, Azərbaycan hökumətinin Laçın yolunda baş verən etirazların təşkilatçısı olduğu iddiası məhkəmə tərəfindən rədd edilib, “yolun bağlandığı” və “ərazinin blokadada” saxlandığı barədə iddiaların heç bir əsası yoxdur: “Ermənistan tərəfini əsassız bəyanatlar vermək əvəzinə, ötən ilin dekabr ayından bəri imtina etdikləri sülh sazişi üzrə danışıqlara geri qayıtmağı, kommunikasiyaların açılması, qüvvələrini Azərbaycan ərazilərindən tam çıxarılması daxil olmaqla, üçtərəfli Bəyanatdan irəli gələn öhdəliklərə riayət etməyi, Azərbaycanın ərazi bütövlüyü və suverenliyinə qarşı addımlardan çəkinməyi tələb edirik”.

Maraqlıdır ki, Zaxarovanın dediyi “Laçın yolunun açılması ilə bağlı Azərbaycan və Ermənistan tərəfinin detallı təklifləri” nə ola bilər? Məsələ ilə əlaqədar qəzetimizə açıqlama verən politoloq Tural İsmayılovun fikrincə, Rusiya Laçın dəhlizi mövzusunda manipulyasiyalar edir: “Bizə bəllidir ki, separatçılığın kökünün kəsilməməyinin ən böyük səbəbkarı Rusiyadır. Rəsmi Moskva daim prosesin müsbət məcraya keçməsinə şərait yaratmır. Bu günə qədər Ermənistanın bütün sabotaj və şıltaqlıqları sakit izlənilir”. Onun sözlərinə görə, Azərbaycan ən qısa zamanda Laçın yolunda nəzarət-buraxılış məntəqələrinin olmağında israrlıdır. Hazırda yolda ekoaktivistlərin aksiyaları davam edir. Aksiyaçılar hansısa humanitar yüklərə əsla əngəl olmur.

“Xəlfəli-Turşsu yolunu nəzarətə götürməyimizdən sonra separatçılara gedən silah-sursatın kökü tam kəsilib. Bu da Ermənistan havadarlarını əməllicə narahat edən məqamdır. Zaxarova həm də etiraf edir ki, Ermənistanın Rusiyaya yalvarışları artıb. Hər halda öz səhvlərinə və təxribatlarına görə Laçın yolundakı aksiyalar start götürüb”, - deyə T.İsmayılov vurğulayıb.

Politoloq Ramiz Alıyev isə hesab edir ki, Laçın yolu ilə bağlı tərəflərin təklifləri reallığı əks etdirməlidir. Onun sözlərinə görə, erməni tərəfinin detallı təklifləri haqqında konkret nəsə demək çətindir. Çünki Zaxarova bu təklifləri açıqlamayıb, ermənilərin təklifləri yalnız onlara məlumdur. “Amma onu deyə bilərəm ki, Ermənistan Laçın yolundan tam sərbəst istifadə etməyə çalışır. Yəni ermənilər istəyirlər ki, bu yola heç bir nəzarət olmasın, onlar Qarabağ separatçılarını silah-sursatla təmin edə bilsinlər. Amma bizim üçün bu, qəbulolunmazdır. Azərbaycan tərəfinin çoxsaylı müraciətlərinə və bu xüsusda aparılmış müzakirələrə baxmayaraq, silah-sursat və digər hərbi təyinatlı vasitələrin daşınmasının qarşısının alınması üçün heç bir zəruri tədbir görülmürdü. Ermənistan tərəfinin sözügedən hərbi təxribatları, həmçinin hakimiyyət nümayəndələrinin təcavüzkar ritorikası ilə müşayiət olunub. Ona görə də, Azərbaycan Ordusu bu halların qarşısını almaq üçün bəzi torpaq yolları da nəzarətə götürdü. Üçtərəfli bəyanatda da qeyd olunur ki, bu yoldan yalnız humanitar məqsədlər üçün istifadə olunmalıdır”, - deyən politoloq bildirib ki, Ermənistanın məkrli niyyətlərinin gerçəkləşməsinə bundan sonra da imkan vermək olmaz.

Azərbaycanın mövqeyinə gəlincə, həmsöhbətimiz deyib ki, Laçın yolunun girişində nəzarət-buraxılış məntəqəsi yaradılmalıdır. Çünki burada ölkəmizin suveren ərazisində baş verən proseslərdən söhbət gedir. Qarabağdakı erməni separatçılarının silahlandırılmasının qarşısını almaq üçün belə bir addımın atılması şərtdir. Bu, Azərbaycanı daha çox maraqlandıran və öz iradəsilə gerçəkləşdirəcəyi prosesdir. Son hadisələr də bu zərurəti bir daha təsdiqləyir.

NARDAR

Paylaş:

Baxılıb: 611 dəfə