Azərbaycan manatı bölgədə ən sabit və dəyərli valyutadır

Bakı:

11°C

87%

3m/s

Əlaqə

AZ RU EN

Ana səhifə / Siyasət / Azərbaycan manatı bölgədə ən sabit və dəyərli valyutadır

Azərbaycan manatı bölgədə ən sabit və dəyərli valyutadır

23.07.2011 [02:44]

ABŞ-ın nüfuzlu “Gallup” təşkilatının keçirdiyi sorğunun nəticələrinə görə, postsovet ölkələri içərisində ən etibarlı valyuta manatdır
Dünya üzrə insan resurslarını öyrənən və təfərrüatlı statistik araşdırma xidmətləri göstərən ABŞ-ın nüfuzlu “Gallup” təşkilatının keçmiş SSRİ ölkələrinin ictimaiyyəti arasında keçirdiyi növbəti sorğunun mövzusu iqtisadi sahəyə aid olub. Daha doğrusu, maliyyə-kredit, pul siyasəti və monetar sahə ilə bağlı araşdırma geniş auditoriyanı əhatə edib. Qurumun bu günlərdə açıqladığı məlumatda sorğunun Azərbaycanla bağlı bölməsi daha çox diqqəti cəlb edir. “Gallup”un sorğu mərkəzinin yekun rəyinə əsasən, postsovet məkanında ən yaxşı iqtisadi nəticələr Azərbaycanda müşahidə olunur.
“Gallup”un keçirdiyi sorğuda iştirak edən respublikamızın vətəndaşlarının böyük əksəriyyəti ölkəmizin sosial-iqtisadi inkişafının ilbəil yüksəldiyini bildiriblər. Onların qənaətinə görə, ölkəmizdə həyata keçirilən ardıcıl islahatlar sosial vəziyyətin yaxşılaşmasına səbəb olur, aylıq gəlirlərin yüksəlməsinə imkan yaradır. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində davamlı olaraq əməkhaqlarının artımı baş verir, insanların aylıq gəlirləri yüksəlir. Sosial siyasətin gücləndirilməsi və dövlətin insanların gəlir əldə etmək imkanlarının yaxşılaşmasına stimul verən addımlar atması vətəndaşların maddi rifah halının yüksəlməsinə əlverişli zəmin yaradıb.
Sorğuda iştirak edən vətəndaşlar yaşayış imkanlarının yaxşılaşdığını və aylıq gəlirlərinin bir hissəsini banklara yerləşdirdiklərini qeyd ediblər. Onlar banklara qoyduqları depozitlərin böyük bir hissəsini milli valyuta olan manata yerləşdirdiklərini də diqqətə çatdırıblar. Azərbaycan vətəndaşlarının 75 faizi öz əmanətlərini banka yerləşdirərkən depozit portfelində manata üstünlük verirlər. Onlar manatın daha etibarlı və dəyərli pul aləti olmasını nəzərə alaraq valyuta strukturunda manatı seçdiklərini ifadə ediblər. Son illərdə banklara yerləşdirilən əmanətlərin həcminin çoxalması tendensiyası müşahidə edilir ki, bu da ümumilikdə, depozit portfelində manatın yığımının artım dinamikasının müşahidə olunduğunu şərtləndirir.
“Gallup”un digər postsovet ölkələrinin bank bazarındakı vəziyyətlə bağlı sorğusu da maraq doğurur. Digər dövlətlərin vətəndaşlarının banklara yerləşdirdiyi əmanətlərin dinamikası və valyuta səbətində milli valyutaların çəkisi ilə bağlı statistika maraqlı nəticələrdən xəbər verir. Sorğuya cəlb olunmuş ölkələrin vətəndaşları öz dövlətlərinin milli valyutalarına o qədər də etibar etmədiklərini ifadə edirlər. Belə ki, iqtisadi cəhətdən əsas ölkələrdən sayılan Rusiya vətəndaşlarının cəmi 56 faizi banka pul qoyarkən rubla etibar etdiklərini bildiriblər. Onlar son illər rublun dəyərinin aşağı düşməsini nəzərə alaraq avro və dollara üstünlük verirlər. Qonşu Gürcüstanda isə əhali banklara pul yatırdıqda laridən daha çox dolları və digər xarici valyutaları seçirlər. Onların cəmi 28 faizi öz milli pullarına etibar edirlər. Belarus vətəndaşları da banka depozit qoymağa üz tutarkən milli valyutalarına 22 faiz etibar edirlər, onların böyük bir qismi xarici valyutalarda pul qoyurlar. Digər postsovet ölkələrində də yuxarıdakı tendensiya müşahidə olunur, ölkə vətəndaşları milli pul vahidlərindən daha çox xarici valyutalara etibar etdiklərini qeyd edirlər. Sorğunun ümumi yekununa görə, həmin ölkələrin əhalisi arasında dollar hələ də ən populyar pul vahidi olaraq etibarını saxlayır.
Göründüyü kimi, Azərbaycan vətəndaşları öz milli valyutamıza daha dərin inam və etibar etməklə manatın dünya valyutaları sırasında güclü maliyyə aləti olmasını qəti şəkildə bildiriblər. Respublikamızda dərin makroiqtisadi təməllərin yaradılması, maliyyə sabitliyinin möhkəmlənməsi istiqamətində çevik iqtisadi addımların atılması, Mərkəzi Bank tərəfindən həyata keçirilən pul-kredit siyasətinin səmərəliliyi milli valyutanın bazarda aktiv pul aləti kimi çəkisinin artırılmasına səbəb olub. Bütün dövlətlərin milli valyutası dəyərini itirdiyi halda, hökumətin həyata keçirdiyi siyasət nəticəsində Azərbaycan manatının məzənnəsi əhəmiyyətli dərəcədə möhkəmlənib. ölkəmizdə həyata keçirilən pul siyasətinin makro və mikroiqtisadi diaqnostikasının gücləndirilməsi, makromodellər vasitəsilə iqtisadiyyatın gözlənilən vəziyyəti üzrə zəruri simulyasiyalar aparılması, eləcə də, monetar siyasətin balanslaşdırılmış sistem üzrə aparılması manatın davamlılığını möhkəmləndirib. Azərbaycan manatı bölgədə ən sabit və dəyərli valyuta kimi daha da möhkəmlənməkdə davam edir.

Paylaş:

Baxılıb: 926 dəfə