Əli Həsənov: Redaksiyaların istifadə etdiyi suya, qaza görə güzəşt tətbiq oluna bilər

Bakı:

23 °C

54 %

1 m/s

Əlaqə

AZ RU EN

Ana səhifə / Siyasət / Əli Həsənov: Redaksiyaların istifadə etdiyi suya, qaza görə güzəşt tətbiq oluna bilər

Əli Həsənov: Redaksiyaların istifadə etdiyi suya, qaza görə güzəşt tətbiq oluna bilər

23.07.2011 [02:47]

Dövlət son üç ildə çap mətbuatının maddi texniki bazasının gücləndirilməsi istiqamətində artıq sistemli şəkildə işə başlayıb. Məsələn, ötən illərdə, ayrı-ayrı zamanlarda mətbu orqanların “Azərbaycan” nəşriyyatına olan borcu dayandırılıb, onlara bu və ya digər formada birdəfəlik yardım göstərilirdi və yaxud vergidən azad olma halları həyata keçirilirdi. SİA-nın xəbərinə görə, bunu Prezident Administrasiyasının İctimai-siyasi məsələlər şöbəsinin müdiri Əli Həsənov deyib. O, qeyd edib ki, bunların həyata keçirilməsi böyük vəsait və dövlətin mediaya böyük dəstək iradəsini tələb edirdi: “Bildiyiniz kimi dünya dövlətlərində media ilə hakimiyyət müəyyən qədər yola getmir. Media çalışır ki, maksimum şəkildə ictimaiyyəti özünə yaxın göstərsin və dövləti tənqid etsin. Dövlət isə çalışır ki, maksimum şəkildə mediaya daha ütülü və daha ölçülü-biçili informasiya buraxsın. Ona görə burada həmişə müəyyən ziddiyyətlər olur. Amma dövətin iradəsi olanda ki azad media inkişaf etsin və dövlət onunla bağlı sistemli şəkildə siyasət yürüdürsə, konsepsiya qəbul edirsə, fond yaradırsa, bu, artıq dövlətin sözün həqiqi mənasında sağlam məqsədindən xəbər verir”.
Bununla belə, PA rəsmisi vurğulayıb ki, Azərbaycan hakimiyyəti gələcəkdə mediaya daha artıq dəstək verəcək: “Bu gün lazımı qədər dəstək vermək üçün dövlət öz imkanlarını ölçüb-biçir. Amma gələcək illərdə biz bu istiqamətdə yardımları artıracağıq. Məsələn, hazırda dövlət qəzetlərə sifariş verir. O sifariş, əslində formal xarakter daşıyır. Biz qəzetlərin marağında olan məsələlərin yazılması üçün onlara pul veririk. Bu, çox sivil bir yoldur. Bu yolu biz xarici ölkələrin təcrübəsindəndə bilirik və onlara baxaraq bunu tətbiq edirik. Eyni zamanda, ən yaxşı jurnalistləri hər il bir-iki dəfə fərqləndiririk. Hazırda isə mətbuat işçiləri üçün yaşayış kompleksi tikilir, 154 mətbuat işçisi dövlətdən ev alacaq. Bunların hamısı dövlətin azad medianın inkişafına marağı deməkdir. Bundan sonrakı perspektiv getdikcə yaxşılaşacaq”.
Ə.Həsənov, həmçinin, vurğulayıb ki, hazırda yazılı mediaya dövlət reklamlarının verilməsi məsələsinin üzərində də iş aparılır: “Yəni hər bir dövlət orqanının büdcəsində bilirsiniz ki, ictimaiyyətlə əlaqələrə, marketinq işinə, öz fəaliyyətinin işıqlandırılmasına müəyyən qism vəsait ayrılır. Bu vəsaitlərin sistemli olaraq yazılı mediaya elanlar şəklində və yaxud başqa sifarişlər şəklində verilməsi işi ilə bağlı biz Mətbuat Şurası və Prezident yanında Kütləvi İnformasiya Vasitələrinin İnkişafına Dövlət Dəstəyi Fondu ilə birgə təklifləri dəyərləndiririk. Yəqin ki, gələcəkdə bunun da üzərinə gedəcəyik. Eyni zamanda büdcəmiz artdıqca Kütləvi İnformasiya Vasitələrinin İnkişafına Dövlət Dəstəyi Fondunun büdcəsi də artacaq. Ev tikintiləri də bundan sonra davam etdiriləcək. Redaksiyaların istifadə etdiyi suya, qaza görə güzəşt tətbiq oluna bilər. Bu istiqamətdə işlər görülür. Bunlar sistemləşdirilir. Dövlət başçısına məruzə olunub, rəy alındıqca addımlar atılacaq. Əsas məsələ odur ki, təkrar edirəm Azərbaycan cəmiyyəti ilə media arasında, Azərbaycan dövlətçilik maraqları ilə media arasında ziddiyyətlər, neqativ hallar aradan qaldırılsın. Azərbaycan jurnalistikası üçün 50 min adamın buradan dolanması çox çətindir. Bu insanların çoxu peşəkar deyil və ayrı-ayrı sahələrdən gəlib. İndi ayrı-ayrı sahələrdə iş yerləri açılıb və bu insanlar ən yaxşı hallarda öz peşələrinə getsələr peşəkar jurnalistlər də media sahəsində fəaliyyət göstərərək maddi məsələlərini həll edib sosial vəziyyətini yaxşılaşdıra bilərlər. Medianı ən çox nüfuzdan salan məsələ isə “reket” jurnalistikası, mediadan sui-istifadə halları, mediadan hələ də ayrı-ayrı insanlarla haqq hesab çəkmək, ayrı-ayrı insanlarla şəxsi məsələləri həll etmək vasitəsi kimi istifadə etməkdir. Bunlar aradan qalxandan sonra azad medianın əhatəsi, dairəsi də genişlənəcək və media heç kəsdən asılı olmayacaq”.

Paylaş:

Baxılıb: 1061 dəfə