“Türk Evi”nə hücumu kim təşkil edib?

Bakı:

21 °C

56 %

2 m/s

Əlaqə

AZ RU EN

Ana səhifə / Siyasət / “Türk Evi”nə hücumu kim təşkil edib?

“Türk Evi”nə hücumu kim təşkil edib?

24.05.2023 [10:41]

N.BAYRAMLI

Türkiyənin BMT yanında daimi nümayəndəliyinin və Nyu-York Baş konsulluğunun yerləşdiyi “Türk Evi”nin binası hücuma məruz qalıb. Belə ki, iki gün öncə gecə saatlarında naməlum şəxslər binanın birinci mərtəbəsində pəncərə şüşələrini sındırıb. Ondan çox pəncərə şüşəsinin sındığı binanın fotosunu nümayiş etdirən TGRT telekanalı hücumun terrorçuların tərəfdarları tərəfindən həyata keçirildiyini bildirib. Türkiyə tərəfi Nyu-York polisi ilə əlaqə saxlayıb. Binanın ətrafında təhlükəsizlik kordonu qurulub, araşdırmalara başlanılıb.

Qeyd edək ki, “Türk Evi” Nyu-Yorkun Manhetten rayonunda, BMT-nin mənzil-qərargahı ilə üzbəüz yerləşən 36 mərtəbəli göydələndir. Türkiyənin sifarişi ilə tikilən bina 2021-ci ildə istifadəyə verilib. Burada, həmçinin müxtəlif türk təşkilatları yerləşir. Hadisə ilə bağlı Türkiyənin xarici işlər naziri Mövlud Çavuşoğlu tviter hesabında “ABŞ-dan Nyu-Yorkdakı “Türk Evi”nə hücumun səbəbkarlarını tezliklə müəyyənləşdirməsini gözləyirik”- deyə yazıb. O bildirib ki, Nyu-Yorkdakı “Türk Evi”nə mənfurcasına hücum nəticəsində birinci mərtəbənin pəncərələrinin şüşələri sınıb: “Biz ABŞ-dan hücumun səbəbkarlarını tezliklə müəyyənləşdirməsini və ev sahibi ölkə kimi diplomatik nümayəndəliklərimizə lazımi müdafiəni təmin etməsini gözləyirik”.

ABŞ Dövlət Departamenti də Nyu-Yokda “Türk Evi”nə qarşı törədilmiş vandalizm aktını qınayıb. Dövlət Departamentinin sözçüsü Metyu Miller keçirdiyi brifinqdə qeyd edib ki, Departamentin Diplomatik Təhlükəsizlik Xidməti yerli hüquq mühafizə orqanları ilə birlikdə məsələni araşdırır. “Biz Nyu-York şəhərindəki “Türk Evi”nə qarşı törədilmiş vandalizm xəbərlərini görmüşük. Sizə deyə bilərəm ki, Dövlət Departamentinin Diplomatik Təhlükəsizlik Xidməti yerli hüquq-mühafizə orqanlarının rəsmiləri ilə təhqiqat aparırlar. Biz vandalizmi qınayırıq. ABŞ-da zorakılıq, diplomatik cinayətlərin cəzası var”, - deyə Miller vurğulayıb.

Məsələ ilə bağlı qəzetimizə açıqlama verən politoloq Ramiz Alıyev bildirib ki, hazırda Türkiyə üçün həssas bir dönəmdir. Ölkə prezident seçkilərinin ikinci turuna hazırlaşır və bu seçkilər dünyanın diqqət mərkəzindədir. Onun sözlərinə görə, belə bir dönəmdə PKK terrorçuları və onların tərəfdarları fəallaşıb. Türkiyədə seçki kampaniyasının qızğın dövrü olduğu üçün terrorçular və onların xaricdəki havadarları türklərə qarşı təxribatlar törədilməsini özləri üçün fürsət bilirlər. Bu baxımdan, Nyu-Yorkdakı “Türk Evi”nin hücuma məruz qalması ciddi suallar doğurur. “Biz seçki kampaniyası dövründə PKK-çıların hansısa açıqlamalarının və təhdidlərinin şahidi oluruq. Bir neçə gün öncə Türkiyə Silahlı Qüvvələrinin hərbçiləri arasında şəhid olanlar var. Onlar terrorçular tərəfindən öldürülüb. Onu da nəzərə almaq lazımdır ki, Türkiyədəki seçkilərin nəticələrinə təsir etmək istəyən xarici qüvvələr də var. Bu qüvvələr türk xalqının milli iradəsinə təsir etmək iqtidarında deyil. Bu səbəbdən də, müəyyən təxribatlarla təhdid xarakterli addımlar atmağa çalışırlar”, - deyən politoloq hadisənin törədilməsində erməni izinin ola biləcəyini də istisna etməyib.

Həmsöhbətimiz deyib ki, ABŞ-da güclü erməni diasporu mövcuddur. “Türk Evi”nə təşkil edilən hücumda ermənilərlə PKK terrorçularının tərəfdarlarının sinxron fəaliyyət göstərməsi mümkündür. “Bütün hallarda türk diplomatlarının təhlükəsizliyini təmin etmək, təxribatların qarşısını almaq məsuliyyəti ABŞ-ın üzərindədir. Ona görə də, bu ölkənin müvafiq qurumları hadisəni araşdırıb müvafiq ölçülər götürməlidir. Eyni zamanda, yeni təxribatlar, cinayətlər törədilə bilər. ABŞ-ın hüquq-mühafizə orqanları qabaqlayıcı tədbirlər görməlidir. Dövlət Departamentinin hadisəni pisləməsi kifayət deyil. Hadisəni törədən tapılıb məsuliyyətə cəlb olunmalı, onun arxasında dayanan qüvvələr aşkara çıxarılmalıdır”, - deyə politoloq vurğulayıb.

Paylaş:

Baxılıb: 585 dəfə