M.V.Lomonosov adına Moskva Dövlət Universitetinin Bakı filialına daxil olmuş tələbələrlə görüş keçirilib

Bakı:

11 °C

82 %

5 m/s

AZ RU EN

Ana səhifə / Siyasət / M.V.Lomonosov adına Moskva Dövlət Universitetinin Bakı filialına daxil olmuş tələbələrlə görüş keçirilib

M.V.Lomonosov adına Moskva Dövlət Universitetinin Bakı filialına daxil olmuş tələbələrlə görüş keçirilib

03.08.2011 [10:40]

Nərgiz Paşayeva: Bizim başlıca vəzifəmiz sizi müdrikliyə, biliklərə yaxınlaşdırmaqdır. Bizim məqsədimiz mükəmməl insan yetişdirməkdir
Dünən M.V.Lomonosov adına Moskva Dövlət Universitetinin (MDU) Bakı filialının rektoru professor Nərgiz Paşayeva bu nüfuzlu ali məktəbə daxil olmuş tələbələr və onların valideynləri ilə görüşüb.
AzərTAc xəbər verir ki, bu il MDU-nun Bakı filialının tətbiqi riyaziyyat, kimya, filologiya və psixologiya fakültələrinə 290-dan çox abituriyent imtahan verib, tələbə adına isə 100 nəfər layiq görülüb.
Görüşdə qəbul komissiyasının üzvləri, MDU-nun tanınmış alimləri və professorları da iştirak ediblər.
Tədbirdə çıxış edən rektor Nərgiz Paşayeva tələbələri təbrik edərək vurğulayıb ki, bu gün onların həyatında çox əlamətdar günlərdən biridir. Tələbə adına layiq görülmüş gənclərin elmin çətin və şərəfli yoluna qədəm qoyduğunu söyləyən N.Paşayeva qəbul imtahanlarının yüksək səviyyədə keçirilməsinə görə qəbul komissiyasının üzvlərinə təşəkkür edib. Rektor deyib: “Qəbul komissiyasının bütün üzvləri imtahanların obyektiv və vicdanla keçirilməsi, məhz ən yaxşı abituriyentlərin seçilməsi üçün səy göstərmişlər. Həqiqətən ən yaxşı abituriyentlər seçilmişlər”.
MDU-nun Bakı filialının tələbəsi adının şərəfli və eyni zamanda, məsuliyyətli ad olmasını vurğulayan N.Paşayeva təhsil dövrünü bu tədris müəssisəsinə qəbul edilmiş gənclərin həyatında ən mühüm mərhələ adlandırıb. Rektor deyib: “Biz sizə sadəcə universiteti bitirmək haqqında sənəd vermirik, biz sizə bilik veririk və siz bu bilikləri qəbul etməlisiniz”.
“Universitet böyük sosial təsisatdır, burada təkcə mütəxəssislər deyil, həm də şəxsiyyətlər formalaşır”, - deyən Nərgiz Paşayeva vurğulayıb: “Bizim başlıca vəzifəmiz sizi müdrikliyə, biliklərə yaxınlaşdırmaqdır. Bizim məqsədimiz mükəmməl insan yetişdirməkdir. Bu, uzun və çətin prosesdir, lakin biz buna çalışacağıq”.
N.Paşayeva görüş iştirakçılarının nəzərinə çatdırıb ki, tələbələrə M.V.Lomonosov adına MDU-nun yüksək ixtisaslı pedaqoqları dərs deyəcəklər.
Mərasimdə MDU-nun rus dili kafedrasının böyük müəllimi, pedaqoji fəaliyyətinə görə Lomonosov mükafatı laureatı Valeriya Baqryantseva, fizika-riyaziyyat elmləri doktoru, professor Yuri Sadovniçi, psixologiya elmləri namizədi Andrey Kiselnikov, qəbul komissiyasının məsul katibi, kimya elmləri doktoru Sergey Karlov çıxış ediblər. Onlar qeyd ediblər ki, bu ali məktəbə daxil olmuş bütün abituriyentlər yüksək bilik, qabiliyyət və əzmkarlıq nümayiş etdiriblər. Vurğulanıb ki, M.V. Lomonosov adına Moskva Dövlət Universitetində və MDU-nun Bakı filialında tələbələr eyni tədris proqramlar üzrə təhsil alırlar.
Müəllimlər tələbələri MDU-nun Bakı filialında yaradılmış geniş imkanlardan maksimum səmərə ilə istifadə etməyə çağırıblar. Ali məktəbdə tədris prosesinin yüksək səviyyədə təşkil olunmasında, onun maddi-texniki bazasının möhkəmlənməsində rektor Nərgiz Paşayevanın xidmətləri yüksək qiymətləndirilib.
Qeyd edilib ki, filiala daim diqqət göstərilməsi Azərbaycanda humanitar sahənin inkişafı üçün yaxşı zəmin yaradır.
çıxış edənlər Azərbaycanda rus dilinə marağın yüksək olmasından razı qaldıqlarını da bildiriblər. Bu il MDU-nun Bakı filialında ən böyük müsabiqə filologiya fakültəsində olub. Filialın ən gənc fakültəsi olan psixologiya fakültəsinə də diqqət ilbəil artır.

Paylaş:

Baxılıb: 1017 dəfə