"İlham Əliyev. İnkişaf - məqsədimizdir" çoxcildliyinin yeddinci cildi çapdan çıxıb

Bakı:

8 °C

87 %

0 m/s

Əlaqə

AZ RU EN

Ana səhifə / Siyasət / "İlham Əliyev. İnkişaf - məqsədimizdir" çoxcildliyinin yeddinci cildi çapdan çıxıb

"İlham Əliyev. İnkişaf - məqsədimizdir" çoxcildliyinin yeddinci cildi çapdan çıxıb

20.09.2011 [10:46]

“ölkəmiz müxtəlif istqamətlərdə çox böyük uğurlar əldə edib.1993-cü ildən bu günə qədər ölkəmizdə hökm sürən ictimai-siyasi sabitlik, asayiş bizim iqtisadi nailiyyətlərimizin əsas səbəblərindən biridir. Tarixdən bəllidir ki, sabitlik hər bir inkişafın təməlidir. O ölkədə ki sabitlik yoxdur, orada iqtisadi, yaxud hansısa başqa istiqamətdə inkişafdan söhbət gedə bilməz. Azərbaycanın müasir tarixi buna əyani sübutdur”. AzərTAc xəbər verir ki, bu sözlər Azərbaycan Respublikasının Prezidenti İlham Əliyevin yenicə çapdan çıxmış “İnkişaf - məqsədimizdir” çoxcildliyinin 7-ci cildindən, “Prezident Heydər Əliyev” tankerinin istismara verilməsinə həsr olunmuş mərasimindəki nitqindən götürülüb.
Nəşrin buraxılışına məsul Azərbaycan Prezidenti Administrasiyasının rəhbəri, akademik Ramiz Mehdiyevdir.
Bakıda “Prezident Heydər Əliyev” tankerinin istismara verilməsinə həsr olunmuş mərasimdə Prezident İlham Əliyevin nitqi ilə açılan bu cilddə Ulu öndər Heydər Əliyev tərəfindən təməli qoyulmuş siyasətə, müstəqil Azərbaycan dövlətinin daha da qüdrətləndirilməsi üçün aparılan siyasi və iqtisadi islahatlara, dost və qonşu ölkələr arasında bütün sahələrdə qarşılıqlı faydalı əlaqələrin daha da möhkəmləndirilməsi və genişləndirilməsinə dair materiallar - nitqlər, çıxışlar, bəyanatlar, müsahibələr, məktublar, məruzələr, müraciətlər, fərmanlar əksini tapıb. Azərbaycanın daha da inkişaf etdirilməsinə, insanların sosial həyat şəraitinin yaxşılaşmasına, ölkəmizin iqtisadi və siyasi cəhətdən daha müasir dövlətə çevrilməsinə, xüsusilə neft və qaz yataqlarının işlənməsi ilə yanaşı, iqtisadiyyatın digər sahələrinə sərmayələrin cəlb edilməsinə, mədəniyyət ocaqlarının yenidən qurulmasına aid çıxışları, nitqləri, ayrı-ayrı dövlət və hökumət başçılarına məktubları toplanıb. Bu materiallar 2004-cü ilin noyabrından 2005-ci ilin yanvarınadək olan dövrü əhatə edir. Həmçinin, cilddə Qətər Dövlətinə rəsmi səfəri zamanı iki ölkə arasında iqtisadi-siyasi və digər sahələrdə əlaqələrin möhkəmlənməsi, gələcəkdə münasibətlərin genişləndirilməsi üçün bütün imkanlardan istifadə olunmasından bəhs edən materiallar da öz əksini tapıb.
Prezidentin Böyük Britaniyaya səfəri zamanı tanınmış dövlət xadimləri ilə görüşlərində söylədiyi nitqlər, “Azərbaycanda ticarət və sərmayə” konfransında çıxışı, kütləvi informasiya vasitələrinə verdiyi müsahibələr və Ermənistan-Azərbaycan, Dağlıq Qarabağ probleminə dair bəyanatları da bu cildin əsas mövzularından birini təşkil edib.
Yeni cilddə Prezident İlham Əliyevin dünyanın görkəmli dövlət və hökumət başçılarına, beynəlxalq təşkilatlara, məşhur şəxsiyyətlərə məktubları, xarici nümayəndə heyətləri ilə görüşləri zamanı apardığı söhbətlərin mətni yer alıb.
Burada, həmçinin, Prezident İlham Əliyevin “Regionların sosial-iqtisadi inkişafı Dövlət Proqramı”nın icrası ilə əlaqədar respublikanın cənub bölgəsinə, eləcə də Siyəzən rayonuna səfəri zamanı əhali ilə görüşlərində Azərbaycanın sürətli inkişafına, xalqımızın rifahı və tərəqqisi naminə aparılan geniş iqtisadi və siyasi islahatlara həsr olunmuş çıxış və nitqləri də verilib.
Daim Azərbaycanda elmə, təhsilə, mədəniyyətə, incəsənətə yüksək dəyər verən Prezident İlham Əliyevin bu istiqamətdə gördüyü işlər nəşrin yeddinci cildində bir daha öz əksini tapıb. Burada ölkə başçısının Azərbaycan Milli Elmlər Akademiyasının Azərbaycan Tarixi və Nizami Gəncəvi adına Azərbaycan Ədəbiyyatı muzeyləri ilə tanışlıq zamanı söylədiyi dəyərli fikirlər, xalqımızın milli-mənəvi dəyərlərinə olan sonsuz sevgi bir daha özünü göstərir.
Kitaba “Qeydlər”, “Şəxsi adlar göstəricisi”, “Coğrafi adlar göstəricisi” də daxil edilib.
“Azərnəşr” tərəfindən buraxılmış cildin hazırlanmasında Azərbaycan Dövlət Teleqraf Agentliyinin (AzərTAc-ın) materiallarından istifadə olunub.

Paylaş:

Baxılıb: 956 dəfə