Azərbaycanın birinci xanımı Mehriban Əliyeva Heydər Əliyev Fondunun təşəbbüsü ilə Xəzər rayonunda inşa olunmuş bir neçə təhsil müəssisəsinin yeni binalarının açılışlarında iştirak edib

Bakı:

31 °C

42 %

4 m/s

AZ RU EN

Ana səhifə / Siyasət / Azərbaycanın birinci xanımı Mehriban Əliyeva Heydər Əliyev Fondunun təşəbbüsü ilə Xəzər rayonunda inşa olunmuş bir neçə təhsil müəssisəsinin yeni binalarının açılışlarında iştirak edib

Azərbaycanın birinci xanımı Mehriban Əliyeva Heydər Əliyev Fondunun təşəbbüsü ilə Xəzər rayonunda inşa olunmuş bir neçə təhsil müəssisəsinin yeni binalarının açılışlarında iştirak edib

20.10.2011 [16:22]

Azərbaycanın birinci xanımı, Heydər Əliyev Fondunun prezidenti Mehriban Əliyeva dünən Bakının Xəzər rayonunda yenidən qurulmuş üç təhsil müəssisəsinin açılışlarında iştirak edib.
Əvvəlcə Binə qəsəbəsindəki S.Abbasov adına 117 saylı tam orta məktəbin açılışına gələn Mehriban xanım Əliyevaya gül dəstəsi təqdim olunub. Sonra açılışı bildirən rəmzi lent kəsilib.
Məktəblə tanış olan Azərbaycanın birinci xanımına məlumat verilib ki, yararsız vəziyyətdə olan məktəb binası 2010-cu ilin dekabrında sökülərək Fondun “Yeniləşən Azərbaycana yeni məktəb” layihəsi çərçivəsində yenidən tikilib. 3 hektar ərazini əhatə edən məktəb 2040 şagird, 81 sinif, 4 kompyuter otağı, akt və idman zalları, laboratoriyalar, kitabxana, həkim kabineti, əmək emalatxanalarından ibarətdir. Binanın foyesində Ulu öndər Heydər Əliyev və Prezident İlham Əliyevin təhsilə qayğısını əks etdirən fotostend qurulub. Məktəbin həyətində süni örtüklü yeni idman meydançası var. Təhsil müəssisəsində 140 müəllim çalışır. Kompyuter otaqlarının avadanlığı məktəbə Fond tərəfindən hədiyyə edilib.
Mehriban xanım Əliyeva məktəbin sinif və kompyuter otaqları, yeməkxanası, laboratoriyasına baxıb, binanın istilik təchizatı ilə maraqlanıb. Bildirilib ki, bütün otaqlarda ən müasir istilik sistemi quraşdırılıb.
Həmin gün Mehriban xanım Əliyeva Xəzər rayonunun Türkan qəsəbəsində əsaslı təmirdən sonra istifadəyə verilmiş D.Cəbrayılov adına 119 saylı məktəbə gəlib. Rəmzi açılış lentini kəsən Heydər Əliyev Fondunun prezidentinə gül dəstəsi təqdim olunub.
Heydər Əliyev Fondunun təşəbbüsü ilə əsaslı təmir edilmiş məktəb binası və ibtidai siniflər üçün inşa olunmuş yeni korpusla tanış olan Azərbaycanın birinci xanımı musiqi kabineti, siniflər, yeməkxana, akt və idman zallarına baxıb.
Məlumat verilib ki, 550 yerlik məktəb binası 1966-cı ildə tikilib. Heydər Əliyev Fondunun “Yeniləşən Azərbaycana yeni məktəb” layihəsi çərçivəsində əsaslı təmir olunan məktəb yüksək keyfiyyətli avadanlıqla təchiz edilib. Əlavə olaraq ibtidai sinif şagirdləri üçün tikilmiş 300 yerlik yeni korpusda isə 238 uşaq təhsil alır. Məktəbə Fond tərəfindən 40 kompyuter hədiyyə edilib. Binada Ulu öndər Heydər Əliyev, Prezident İlham Əliyev, həmçinin, Mehriban xanım Əliyevanın təhsilə qayğısını əks etdirən fotoguşə, müxtəlif tədbirlərin keçirilməsi üçün nəzərdə tutulan 120 nəfərlik akt zalı, 18 min kitabın saxlanıldığı kitabxana, bufet var. Məktəb binası mərkəzləşdirilmiş kamera-nəzarət sistemi ilə təchiz olunub.
Azərbaycanın birinci xanımı dünən Zirə qəsəbəsində Heydər Əliyev Fondunun “Təhsilə dəstək” layihəsi çərçivəsində yeni istifadəyə verilmiş uşaq bağçasının açılışında da iştirak edib.
Mehriban xanım Əliyevaya gül dəstəsi təqdim edildikdən sonra rəmzi açılışı bildirən lent kəsilib.
Bağçada yaradılmış şəraitlə tanış olan Mehriban xanım Əliyeva daha sonra yeməkxana, oyun və idman zalı, musiqi otağı ilə tanış olub. Azərbaycanın birinci xanımına məlumat verilib ki, 120 yerlik uşaq bağçasında 3-6 yaş arası uşaqlardan ibarət 4 qrup fəaliyyət göstərəcək. 1655 kvadratmetr ərazini əhatə edən uşaq müəssisəsində müasir tələblərə cavab verən bütün şərait yaradılıb.
Yeni mətbəx və yemək ləvazimatları ilə təchiz olunmuş yeməkxanada uşaqların sağlam və düzgün qidalanması təmin olunacaq. Müxtəlif musiqi alətləri ilə təchiz edilmiş otaqda isə balacaların musiqi istedadını kəşf və inkişaf etdirmək üçün əsl imkan var.
Həyətdə qurulmuş uşaq meydançası, gözoxşayan köşklər balacaların maraqlı və şən vaxt keçirmələrinin təminatçısı olacaq. Uşaqların təhlükəsizliyinə nəzarət mərkəzləşdirilmiş kamera sistemi ilə aparılacaq.

Paylaş:

Baxılıb: 1147 dəfə