Yeni Azərbaycan Partiyası ilə Serbiya Demokrat Partiyası arasında Əməkdaşlıq haqqında Anlaşma Memorandumu imzalanıb

Bakı:

17°C

67%

5m/s

AZ RU EN

Ana səhifə / Siyasət / Yeni Azərbaycan Partiyası ilə Serbiya Demokrat Partiyası arasında Əməkdaşlıq haqqında Anlaşma Memorandumu imzalanıb

Yeni Azərbaycan Partiyası ilə Serbiya Demokrat Partiyası arasında Əməkdaşlıq haqqında Anlaşma Memorandumu imzalanıb

23.12.2011 [11:19]

Dünən Yeni Azərbaycan Partiyası (YAP) ilə Serbiya Demokrat Partiyası (SDR) arasında əməkdaşlıq haqqında Anlaşma Memorandumu imzalanıb. Memorandumu Azərbaycan tərəfindən Yeni Azərbaycan Partiyası Sədrinin müavini-İcra katibi, Milli Məclisin deputatı Əli Əhmədov, Serbiya tərəfindən bu ölkənin kənd təsərrüfatı, ticarət, meşəçilik və su təsərrüfatı naziri, SDP Sədrinin müavini Duşan Petroviç imzalayıblar.
Mərasimdən əvvəl keçirilmiş görüşdə Əli Əhmədov bildirib ki, Azərbaycan ilə Serbiya arasında əlaqələr yüksələn xətlə inkişaf edir. Onun sözlərinə görə, Azərbaycanın və Serbiyanın dövlət başçıları arasındakı dostluq əlaqələri bu ölkələr arasındakı münasibətlərin hərtərəfli inkişafı üçün geniş imkanlar açıb: “Qarşılıqlı səfərlər zamanı imzalanmış çoxsaylı sənədlər əməkdaşlığımız üçün möhkəm hüquqi baza yaratmışdır. Siyasi partiyalar arasında münasibətlərin inkişafı da dövlətlərimiz və xalqlarımız arasında əlaqələrin daha da genişlənməsinə xidmət edəcəkdir”, - deyə YAP Sədrinin müavini vurğulayıb.
Əli Əhmədov YAP-ın yaranma tarixi, Azərbaycanın ictimai-siyasi həyatındakı rolu, beynəlxalq əlaqələri barədə qonaqlara ətraflı məlumat verib. Onun sözlərinə görə, Azərbaycanın müasir inkişafı xalqımızın ümummilli lideri Heydər Əliyevin, Prezident İlham Əliyevin və Yeni Azərbaycan Partiyasının siyasəti ilə bağlıdır. O bildirib ki, YAP bir sıra beynəlxalq təşkilatlar və siyasi partiyaların blokları ilə sıx əməkdaşlıq edir. Əli Əhmədov beynəlxalq əlaqələrin nümunəsi kimi Avropa Xalqları Partiyası və Asiya Siyasi Partiyalarının Beynəlxalq Konfransı ilə əməkaşlığı xatırladıb.
Duşan Petroviç onlara göstərilən qonaqpərvərliyə və Bakıda keçirilmiş “Modernləşmə siyasəti: yeni iqtisadi və sosial çağırışlar” mövzusunda beynəlxalq konfransın yüksək səviyyədə təşkilinə görə minnətdarlığını bildirib. Nazir deyib ki, Serbiya regionun ən çox inkişaf etmiş ölkəsi olan Azərbaycan ilə əlaqələrin inkişafında maraqlıdır: “Bu gün iki ölkə arasında münasibətlər daha da möhkəmlənir. Azərbaycan və Serbiya prezidentləri qarşılıqlı səfərlər ediblər. Düşünürəm ki, bu səfərlər xalqlarımız arasında münasibətlərin inkişafında mühüm rol oynayacaq. Eyni zamanda, iki ölkə arasında Hökumətlərarası Komissiya fəaliyyət göstərir və həyatın müxtəlif sahələrində əməkdaşlığın genişlənməsinin təmin edilməsi haqqında vacib qərarlar qəbul edir. Düşünürük ki, Yeni Azərbaycan Partiyası ilə Serbiya Demokrat Partiyası arasında imzalanmış Memorandum xalqlarımız arasında dostluq münasibətlərinin daha da dərinləşməsinə və inkişafına xidmət edəcəkdir”, - deyə Duşan Petroviç qeyd edib.

Paylaş:

Baxılıb: 886 dəfə