Paşinyanın, Makronun canfəşanlığı nəyə xidmət edir?

Bakı:

25 °C

53 %

3 m/s

Əlaqə

AZ RU EN

Ana səhifə / Siyasət / Paşinyanın, Makronun canfəşanlığı nəyə xidmət edir?

Paşinyanın, Makronun canfəşanlığı nəyə xidmət edir?

23.09.2023 [11:25]

MÜBARİZ

Azərbaycanın öz suveren hüquqları daxilində sentyabrın 19-da Qarabağ bölgəsində antiterror tədbirlərinə başlaması və cəmi bir gün ərzində bu tədbirləri uğurla tamamlaması sülhyaratma prosesinin irəliləməsi üçün yeni imkanlar yaradıb. Məğlub Ermənistan bu reallıqları düzgün dəyərləndirərək manipulyasiyalardan əl çəkməli və sülhyaratma prosesi ilə bağlı Azərbaycanın təşəbbüslərini dəstəkləməlidir. Yalnız bu halda qarşılıqlı inam mühitini təmin etmək və regionda çoxdan gözlənilən sülhə və təhlükəsizliyə nail olmaq mümkündür. Cənubi Qafqaz bölgəsi məhz qalib Azərbaycanın sayəsində indi sülhə heç vaxt olmadığı qədər yaxındır. Bununla belə, biz görürük ki, məğlub ölkə, onun xaricdəki havadarları yenə də köhnə amplualarında qalmaqdadırlar və sülh prosesinə maneələr yaratmaq səylərini davam etdirmək istəyirlər.

Paşinyan və onun komandası Azərbaycanın daxili işlərinə qarışmaqdan əl çəkməlidirlər

Qalib Azərbaycanın postmüharibə mərhələsində üçtərəfli Bəyanata və sülh prosesinə sadiq qalmasına rəğmən, məğlub Ermənistan sürüşkən mövqe sərgiləyir. Bu ölkədə üçtərəfli Bəyanatın, müxtəlif platformalarda əldə olunan razılaşmaların şərtlərinin pozulmasına yönəlik cəhdlər həm hakimiyyət dairələrindən, həm də müxalifət qüvvələrindən gəlir. Belə cəhdlər isə sülh prosesinə mənfi təsir göstərir. Baş nazir Praqada, Soçidə, həmçinin daxili auditoriya qarşısında Qarabağ da daxil olmaqla Azərbaycanın ərazi bütövlüyünü tanıdığını, regionda bütün kommunikasiyaların açılmasına tərəfdar olduğunu bəyan edib. Bu kimi açıqlamalarla N.Paşinyan Ermənistan cəmiyyətini reallıqla barışmağa, başqa çıxış yolu olmadığına inandırmağa çalışır. Əslində, forpost ölkə üçün doğru olan da elə budur. Ancaq məğlub ölkənin lideri siyasətində qətiyyətsizdir. O, müxalifətin təpkiləri qarşısında tez geri çəkilir və əvvəl dedikləri sözləri bir növ geri götürür. Müharibənin başa çatmasından ötən üç ilə yaxın dövr ərzində Ermənistan tərəfindən kommunikasiyaların açılması istiqamətində hər hansı bir əməli addımın atılmaması, erməni hərbi birləşmələrinin ərazilərimizdən çıxardılmaması, Laçın-Xankəndi yolu ilə bağlı manipulyasiyalara əl atılması, “humanitar böhran”, “etnik təmizləmə” nağıllarının uydurulması onu təsdiqləyir ki, N.Paşinyanın komandası sülyaratma prosesinə münasibətdə səmimi deyil. Faktlar dəhşət saçır. Sadəcə bir gün davam edən antiterror tədbirlərində erməni hərbi birləşmələrinin 90-dan artıq postu ələ keçirilib, 20 döyüş maşını, 40 artilleriya qurğusu, 30 minaatan, 6 elektromaqnetik döyüş sistemləri və 2 hava hücumundan müdafiə sistemləri zərərsizləşdirilib. Nə üçün Ermənistan Azərbaycan ərazisində hərbi birləşmələr saxlamaqda davam edib? Təxminən 10 min kontingenti olan bu hərbi birləşmələr Ermənistan büdcəsinin vəsaitləri ilə maliyyələşdirilib.

Dəhşətli mina terrorunun davam etdirilməsi postmüharibə dövründə məğlub ölkənin mənfur siyasətindən əl çəkməməsinin daha bir ifadəsidir. Azərbaycanda 2022-ci ilin avqust ayından indiyədək 2021-ci ildə Ermənistanda istehsal edilmiş, ümumilikdə 2,728 mina aşkarlanaraq zərərsizləşdirilib. O cümlədən Azərbaycan-Ermənistan sərhədi boyunca Kəlbəcər və Laçın rayonlarında 1119 mina, Qarabağ İqtisadi Rayonunda isə 1609 mina aşkarlananıb. Ümumilikdə, üçtərəfli Bəyanatın imzalanmasından bugünədək 314 nəfər minaların qurbanı olub.

Qarabağ bölgəsində antiterror tədbirlərinin yekunlaşması və atəşkəsin dayandırılması ilə bağlı razılaşmanın əldə olunması, separatçıların ağ bayraq qaldırmaları, hərbi birləşmələrin tərkisilah edilməsinə start verilməsi fonunda da Ermənistan lideri Nikol Paşinyan və bu ölkənin digər yüksək səviyyəli rəsmiləri yeni reallıqlarla, bütövlükdə sül?yaratma prosesi ilə bir araya sığmayan açıqlamalar verməkdə davam edirlər. N.Paşinyan bu günlərdə hökumətin iclasında yenə də Qarabağda humanitar və hərbi-siyasi vəziyyətin ağır olaraq qalmasından danışıb. O, eyni zamanda, “Qarabağdan olan həmkarları” ilə daim təmasda olduğunu bildirib. Ermənistan lideri həmçinin komandasının “A planının erməniləri Qarabağdan çıxarmaq deyil, onların qorxmadan öz evlərində yaşamaq imkanı əldə etmələri üçün hər şey etmək” olduğunu bildirib.

Qarabağ mövzusunda həmçinin Ermənistanın xarici işlər naziri Ararat Mirzoyan BMT Təhlükəsizlik Şurasında baş tutan müzakirələrdəki çıxışında danışıb. O bildirib ki, “Qarabağın bütün ərazisi qadağan olunmuş kasetli sursatlar da daxil olmaqla, ayrı-seçkilik olmadan atəşə tutulub”. A.Mirzoyan bunun guya Qarabağda etnik təmizləmə aparmaq niyyətini diktə etdiyini diqqət mərkəzinə gətirmək istəyib. “Bu genişmiqyaslı hərbi əməliyyatın nəticəsi bunu nümayiş etdirir: əhali rabitənin olmaması səbəbindən məlumat vermək imkanından məhrumdur, Azərbaycan qoşunları Qarabağda əsas marşrutlara nəzarət edir”.

Bu açıqlamalar Ermənistan rəsmilərinin sülh prosesinə pəl vurmaq cəhdlərini bundan sonra da davam etdirmək niyyətində olduqlarını ortaya qoyur. Azərbaycanın ərazi bütövlüyünü tanıyan Paşinyanın, Mirzoyanın və digərlərinin ölkəmizin bir bölgəsindəki vəziyyətlə bağlı həqiqəti əks etdirməyən fikirlər səsləndirmələri əslində onların daxili işlərimizə qarışmaq anlamına gəlir ki, bu da

qəbuledilməzdir.

E.Makron yenə də özünə yer tapa bilmir

BMT TŞ-də Qarabağla bağlı növbəti dəfə müzakirələr aparılmasının əsas təşəbbüskarı olan Fransa prezidenti Emmanuel Makron Azərbaycanın suveren ərazisində uğurla antiterror tədbirləri keçirməsindən bərk əndişələnib. İndi o, necə deyərlər, rahatlaşa və özünə yer tapa bilmir. Bu narahatlığın ifadəsidir ki, E.Makron yenidən Nikol Paşinyana telefon açıb. Bu dəfə də iki bacı ölkənin liderləri Qarabağdakı vəziyyəti müzakirə ediblər.

Fransa ilə Ermənistanı bir-birindən uzaq məsafə ayırır. Bu ölkənin Cənubi Qafqaz coğrafiyasında hansı marağı ola bilər? Sualın cavabı geniş təhlil tələb edir. Qısaca onu demək mümkündür ki, Fransanın Cənubi Qafqazda, o cümlədən də Azərbaycanla-Ermənistan arasında münasibətlərin tənzimlənməsində marağı xoş niyyətə əsaslanmır. Fransadakı güclü erməni lobbisinin girovluğunda qalan E.Makron ölkəsinin daim Ermənistanın yanında yer aldığını dəfələrlə təkrarlayıb. Yeri gəlmişkən, onun siyasi sifarişləri əsasında Fransa parlamenti bir neçə dəfə Azərbaycan əleyhinə qətnamələr çıxarıb. Eyni zamanda, E.Makron bundan əvvəl də BMT TŞ-də Qarabağla bağlı müzakirələrin aparılmasına nail olub. Fransanın öz nüfuzundan istifadə etməklə BMT TŞ-ni istismar predmetinə çevirməsi bu ölkənin neokolonializm ambisiyalarının təzahürü kimi dəyərləndirilməlidir. Ancaq Fransanın belə cəhdləri əbəsdir. Təsadüfi deyildir ki, E.Makronun bütün səyləri puça çıxıb və TŞ ölkəmiz əleyhinə hər hansı bir sənəd qəbul etməyib. Fransa kimi erməni təəssübkeşləri nə qədər proseslərdən uzaqda dayansalar, Azərbaycanla-Ermənistan arasında sülhyaratma prosesi bir o qədər sürətlə irəliləyər.

Paylaş:

Baxılıb: 665 dəfə