Londonda İngiltərə-Azərbaycan Cəmiyyətinin 2011-ci ildə gördüyü işlər müzakirə olunub

Bakı:

28 °C

44 %

4 m/s

Əlaqə

AZ RU EN

Ana səhifə / Siyasət / Londonda İngiltərə-Azərbaycan Cəmiyyətinin 2011-ci ildə gördüyü işlər müzakirə olunub

Londonda İngiltərə-Azərbaycan Cəmiyyətinin 2011-ci ildə gördüyü işlər müzakirə olunub

20.01.2012 [12:06]

Yanvarın 18-də Londonda İngiltərə-Azərbaycan Cəmiyyətinin (İAC) idarə heyətinin 2011-ci ilin yekunları ilə bağlı iclası keçirilib.
İclasda İngiltərə-Azərbaycan Cəmiyyətinin Azərbaycandan olan həmsədri, professor Nərgiz Paşayeva iştirak edib.
İAC-ın İngiltərədən olan həmsədri Lord Freyzer cəmiyyətin 2011-ci ildəki fəaliyyətindən danışaraq vurğulayıb ki, əvvəlki illərdə olduğu kimi, ötən il də ölkələrimiz arasında bütün sahələrdə əlaqələr inkişaf edib və cəmiyyət bu işə öz töhfəsini verib.
Lord Freyzer uğurlu fəaliyyətinə görə cəmiyyətin Azərbaycandan olan həmsədri Nərgiz Paşayevaya dərin minnətdarlığını bildirib.
Cəmiyyətin fəaliyyətini dəstəkləyənlərə də təşəkkürünü ifadə edən Lord Freyzer Azərbaycan Respublikasının “Dostluq” ordeni ilə təltif olunmasından şərəf hissi duyduğunu vurğulayıb. Rəhbərlik etdiyi cəmiyyətin bundan sonra da ölkələrimiz arasında mədəni-humanitar əlaqələrin genişləndirilməsi istiqamətində səy göstərəcəyini qeyd edən Lord Freyzer Londonda Heydər Əliyev Fondunun, “Baku” jurnalının ingilisdilli versiyasının dəstəyi və təşkilatçılığı ilə “Bakıya uçuş. Müasir Azərbaycan incəsənəti” mövzusunda sərginin keçirilməsini əlamətdar hadisə kimi qiymətləndirib.
İngiltərədən olan həmsədr cəmiyyətin yeni saytının yaradıldığını da diqqətə çatdırıb.
Cəmiyyətin fəxri katibi Kenet Forrest Azərbaycan-İngiltərə əlaqələrinin dostluq zəminində inkişaf etdiyini bildirib və ölkələrimiz arasında münasibətlərin müsbət dinamikasında İAC-ın rolunu vurğulayıb.
Kenet Forrest Azərbaycandan olan həmsədr Nərgiz Paşayevanı və İngiltərədən olan həmsədr Lord Freyzeri yenidən bu vəzifəyə seçməyi təklif edib. Təklif yekdilliklə qəbul olunub.
İAC-ın fəaliyyətindən danışan professor Nərgiz Paşayeva bildirib ki, belə cəmiyyətlər müasir dünyada gündən-günə öz əhəmiyyətini artırır. çünki məhz belə qeyri-hökumət cəmiyyətləri açıq dialoqa hazır olur. Onlar müasir mühitdə bir çox məsələləri həll etməyə qadirdirlər.
Böyük Britaniyanın Azərbaycandakı sabiq səfiri Rocer Tomas ölkəmizin bu gün sürətlə inkişaf etdiyini vurğulayıb. İAC-ın uğurlu fəaliyyətinə toxunan sabiq səfir cəmiyyətin işinin gələcəkdə də yüksək səviyyədə olacağına əminliyini bildirib və onun nüfuzunun daha da artacağını qeyd edib.
Rocer Tomas deyib: “Bu cəmiyyət ölkələrimiz arasında dostluq münasibətlərinin daha da möhkəmlənməsinə təkan verir. Bu böyük əhəmiyyət kəsb edən məsələdir. Bu, cəmiyyət sadəcə insanların bir araya gəlməsinə kömək etmir, həm də İngiltərə ilə Azərbaycan arasında əlaqələrin daha da genişləndirilməsinə xidmət edir”.
Azərbaycanın Böyük Britaniyadakı səfiri Fəxrəddin Qurbanov İAC-ın 2011-ci ildəki fəaliyyətini yüksək qiymətləndirib və cəmiyyətin ölkələrimiz arasında mədəni-humanitar əlaqələrin inkişafına verdiyi töhfələrdən danışıb. İngiltərə ilə Azərbaycan arasında ilk bu cür cəmiyyətin uğurlu fəaliyyət göstərdiyini deyən səfir bundan sonra da qurumun işində nailiyyətlərin əldə olunacağına əminliyini bildirib.
“İAC birinci təşkilatlardandır ki, Azərbaycan-İngiltərə münasibətlərinin inkişafına böyük töhfə verib. Artıq 15 ildir ki, bu cəmiyyət fəaliyyət göstərir. Bu illər ərzində cəmiyyətin böyük xidmətləri olub. Bu cəmiyyət yarandığı ilk gündən Lord Freyzer ona rəhbərlik edir. Cəmiyyətin böyük işinin qiyməti keçən il Azərbaycan Prezidenti İlham Əliyev tərəfindən Lord Freyzerə “Dostluq” ordeninin verilməsi olub”, - deyə diplomat vurğulayıb.
İclasda ötən il görülən işlər müzakirə olunub, 2012-ci ildə qarşıda duran vəzifələrlə bağlı fikir mübadiləsi aparılıb, fəaliyyət planı təsdiqlənib. Bundan əlavə, cəmiyyətin işinin daha da yüksək səviyyədə təşkil olunması istiqamətində təkliflər səsləndirilib.
Sonda İngiltərə-Azərbaycan Cəmiyyətinin və ölkəmizin Londondakı səfirliyinin dəstəyi ilə Kral Musiqi Kollecində təhsil alan beynəlxalq musiqi müsabiqəsinin iştirakçısı, skripka ifaçısı Nigar Mirzəyeva çıxış edib.

Paylaş:

Baxılıb: 1059 dəfə