Ermənistanın ikili oyunu

Bakı:

12 °C

76 %

5 m/s

Əlaqə

AZ RU EN

Ana səhifə / Siyasət / Ermənistanın ikili oyunu

Ermənistanın ikili oyunu

22.02.2024 [10:40]

İrəvan Qərbə mesaj verir: “köhnə çətirin” altına qayıdaram

Ermənistan regionda yaratdığı diskomfort bu ölkənin siyasi qərarsızlığı, gündə bir “çətir” altına girməsi ilə əlaqələndirilir. Kollektiv Təhlükəsizlik Müqaviləsi Təşkilatına (KTMT) üzv olsa da, Fransa və digər siyasi qanadlarla hərbi əlaqələr qurmaq cəhdi, təmsil olunduğu hərbi struktura qarşı təxribatçı davranışları isə birmənalı qarşılanmır. Məsələn, bir müddətdir Ermənistan KTMT-nin tədbirlərinə qatılmır. Xatırladaq ki, ötən ilin yayında Ermənistan Kollektiv Təhlükəsizlik Müqaviləsi Təşkilatının baş katibinin müavini kvotasından da imtina etmişdi. Rəsmi İrəvan ötən il KTMT-nin ölkədə keçirilməsi nəzərdə tutulan hərbi təlimlərini də təxirə salmışdı. Hansı ki, Rusiya Müdafiə Nazirliyi 2023-cü ilin əvvəlində KTMT-nin “Sarsılmaz qardaşlıq - 2023” sülhməramlı təlimlərinin Ermənistanda keçiriləcəyini bəyan etmişdi. Amma baş nazir Nikol Paşinyan keçirdiyi mətbuat konfransında bildirdi ki, İrəvan respublikada KTMT təlimlərinin keçirilməsini məqsədəuyğun hesab etmir. Ardınca da əlavə etdi ki, tərəflər arasında anlaşılmazlıq yaranıb. N. Paşinyan hətta nümayişkəranə şəkildə həmin il noyabrın 23-də Minsk şəhərində keçirilən Kollektiv Təhlükəsizlik Müqaviləsi Təşkilatının sammitinə də qatılmadı. Rəsmi İrəvanın iddiası ondan ibarətdir ki, KTMT Ermənistanın təhlükəsizliyinin təminatında rol oynamır. Ona görə də, təhlükəsizliklə bağlı yeni tərəfdaş axtarışındadırlar.

Əsas “ağrı”...

Qeyd edildiyi kimi, Ermənistanın əsas “ağrısı” qurumun Azərbaycan-Ermənistan məsələsindəki mövqeyindən irəli gəlir. Baş nazir Nikol Paşinyan strukturu məsuliyyət zonasını “dəqiqləşdirməməkdə” günahlandırır. Ermənistan Təhlükəsizlik Şurasının katibi Armen Qriqoryan da yerli mediaya müsahibəsində KTMT-dən heç bir gözləntilərinin olmadığını deyib. O bildirib ki, KTMT-dən Ermənistana heç bir hərbi-texniki yardım təklif olunmayıb - KTMT heç vaxt Ermənistanın sərhədlərini tanımayıb, onun yurisdiksiyasını tanımır. Beləliklə də, rəsmi İrəvan KTMT-dan çıxmasa da, təşkilatda fəaliyyətini “dondurmaq” niyyətində olduğunu büruzə verir. Bu məqsədinə çatmaq üçün isə məhz Rusiyanı və KTMT-nı ittiham edir. Paşinyan hakimiyyətinin bu ittihamlarında siyasi şantaj əlamətləri də kifayət qədər qabarıq şəkildə nəzərə çarpır.

Ermənistan KTMT-də qalacaq...

Paşinyan hakimiyyəti iddia edir ki, ya qurum rəsmi İrəvanın istəklərini yerinə yetirməlidir, ya da Ermənistan bu strukturu tərk edəcək. Bugünlərdə isə məsələ ilə bağlı yeni təfərrüatlar ortaya çıxıb. Belə ki, KTMT-nin baş katibi İmanqali Tasmaqambetovun “International Affairs” jurnalındakı məqaləsində deyilir: “Təşkilat Ermənistan - Azərbaycan sərhədində vəziyyətin monitorinqi üçün sülhməramlı missiya göndərməyə hazır idi, lakin bu işin yekun hissəsində İrəvan Azərbaycanla sülh sazişinin yaxınlaşması ilə əlaqədar müvafiq sənədin gündəlikdən çıxarılmasını xahiş edib”.

İmanqali Tasmaqambetov onu da qeyd edib ki, KTMT-yə üzv ölkələr Ermənistanla müttəfiqlik əlaqələrinin inkişafına diqqət yetirir, İrəvan müttəfiq olaraq qalır və təşkilatda fəaliyyətini davam etdirir. “Eyni zamanda, Ermənistanın təşkilatda işi davam edir, İrəvan KTMT çərçivəsində çoxtərəfli təmaslar aparır. Ermənistan müttəfiq olub və qalır. KTMT Ermənistan Respublikası ilə müttəfiqlik münasibətlərini inkişaf etdirir”, -deyə baş katib vurğulayıb.

Əslində, Paşinyan hakimiyyəti yaxşı anlayır ki, köhnə müttəfiqlərindən uzaqlaşıb Qərbə üz tutmaq Ermənistan üçün baha başa gələ bilər. Ona görə də, İrəvan mümkün qədər ehtiyatlı davranmağa çalışır. Qərb isə Ermənistanın mümkün qədər tez və tam şəkildə təsir dairəsinə salmaqda qərarlıdır.

Fransız dəvəti...

Məsələn Avropa İttifaqı, o cümlədən Fransa Cənubi Qafqaza Ermənistan üzərindən yerləşmək planları qurur. Ermənistana yerləşdirilən “mülki missiya”nın əsl missiyası da məhz bundan ibarətdir. Amma Paşinyan hələ ki iki tərəf arasında “manevr” etməyə çalışır. Onun iki ay əvvəl Sankt-Peterburqda MDB liderlərinin qeyri-rəsmi görüşündə və Avrasiya İqtisadi İttifaqının sammitində iştirakı bir tərəfdən “köhnə axarın” davam etməsinə işarədirsə, Qərbə doğru “isti mesajları” yeni dost axtarışını davam etdirdiyinin göstəricisidir. Hətta Paşinyan bununla Qərbə göstərmək istəyir ki, vədlərinə əməl etməsələr, “köhnə çətirin” altına qayıtmalı olacaq.

Yeri gəlmişkən, Ermənistanın baş naziri Nikol Paşinyan fevralın 22-də Parisə səfərə gedəcək. “L’Humanite” qəzeti bu barədə yazır ki, Paşinyan Fransa müqavimət hərəkatının erməni əsilli döyüşçüsü Misak Manuşyan və arvadı Melinin təkrar dəfn mərasimində iştirak edəcək. Xatırladaq ki, Emmanuel Makron hələ ötən ilin iyulunda Paşinyanı Fransaya dəvət etmişdi. Səfər zamanı yəqin ki, Ermənistanla yeni dostluq əlaqələri də müzakirə ediləcək.

Nardar BAYRAMLI

Paylaş:

Baxılıb: 526 dəfə