Novruza az qaldı...

Bakı:

11 °C

82 %

5 m/s

Əlaqə

AZ RU EN

Ana səhifə / Sosial / Novruza az qaldı...

Novruza az qaldı...

18.03.2026 [08:55]

Bayram süfrəsi neçəyə başa gəlir?

Xalqımız üçün ən vacib bayramlardan olan Novruza sayılı günlər qalıb. Bayram ərəfəsində bazarlarda və marketlərdə canlanma müşahidə olunur. Ailələr bayram süfrəsini bəzəmək üçün ənənəvi nemətlərə üstünlük verirlər.

Novruz süfrəsi necə olmalıdır?

İnanclarımıza görə, süfrəyə düzülən nemətlər nə qədər bol, çeşidli olarsa, il bir o qədər bərəkətli olar.

Qədim zamanlarda belə bir inanc da vardı: Əgər ailə bütün lazımi nemətləri süfrəyə qoyurdusa, bu, həmin ailənin özünütəsdiqindən xəbər verirdi. Novruz bayramında süfrənin əsas özəlliyindən biri də budur ki, süfrəyə şirin yeməklər qoyulmalıdır. Şirniyyatlardan paxlava, şəkərbura, şirin qoğal, badambura və s. saymaq olar. Bundan başqa, qovurğa qovrulur, müxtəlif şərbətlər, milli ickilərə yer verilir. Adətə görə, süfrəyə “s” hərifi ilə başlayan 7 növ ərzaq qoyulur.

Niyə belədir?

Keçmiş zamanlarda insanlar dünyanın 7 təbəqədən ibarət olduğunu hesab edirdilər. Ona görə də ildəyişmə bayramında (Novruzda) 7 cür yemək, 7 cür şirniyyat, 7 cür çərəz... (hətta özbəklər 7 cür ağac çöpünü qırıb süfrəyə qoyurlar) qoymaqla sanki süfrədə bütün kainatın kiçik modelini yaradırdılar. İnanca görə, bunu bacaran ailə, yeni ilə tamlıq, bütövlüklə keçə bilirdi. Su, süd, səməni, sünbül, sucuq, siyənək balığı, süzmə və s. bayram süfrəsinin bəzəyi olur.

Bayram süfrəsinə gözəllik verən aksessuarlardan biri olan xonça çərəzlər, şirniyyatlarla bəzənir, yumurtalar boyanır. Əvvəllər bir gecədə 300-400 yumurta boyayırdılar və uşaqlara paylayırdılar. Çünki yumurta bolluğun, bərəkətin rəmzi idi. Yumurta döyüşdürmək isə xeyrin şər üzərində qələbəsinə işarə idi.

Bayram süfrəsi bəzəyərkən diqqətli olmaq lazımdır: süfrəyə acı, şor, turş nemətlər qoyulmamalıdır. Məsələn, istiot, sirkə, soğan, sumax, sarımsaq və s. Hətta bəzi mənbələr şor qoğalının da qoyulmasını düzgün hesab etmir.

Süfrədə çörək mütləq olmalıdır. Çünki çörək bərəkətin rəmzidir. Novruz süfrəsindən heç nə atılmamalı, yeməklər sona kimi yeyilməlidir.

Bayram süfrəsi neçəyə başa gəlir?

Bazarlarda və mağazalardakı qiymətlər göstərir ki, bu il ailələrin bayram xərci bir qədər də artacaq. Xüsusilə də Novruz süfrəsinin ayrılmaz hissəsi olan çərəzlərdə bu il bahalaşma qeydə alınıb.

Qoz - 6 manat, ləpəsi - 17-25 manat

Fındıq 7 manat, ləpəsi - 20-22 manat

Qovrulmuş fındıq ləpəsi - 23-30 manat

Badam - 14-17 azn

Badam ləpəsi - 22- 24 manat

Şabalıd - 9-12 manat

İydə - 8-7 manat

Xurma - 11-15 manat

İnnab - 8-9 manat

Qaysı - 14-15 manat

Bayram süfrəsinin hazırlanması üçün daha çox pul mal və qoyun ətinin alınmasına, eləcə də kərə yağına gedəcək.

Bayram ərəfəsində dana ətinin bir kiloqramı 17 manata, quzu ətinin bir kiloqramı 20-21 manata, kərə yağının bir kiloqramı isə 20-26 manata satılır.

Digər əsas ərzaq məhsullarının qiymətləri isə aşağıda kimidir:

Turşu xiyar 2-4 manat

Kartof 0,8 qəpik -1-2 manat

Toyuq filesi 4-5 manat

Xama 1-2 manat

Mayonez 2-6 manat

Təzə xiyar 3-3,5 manat

Pomidor 3-3,5 manat

Göyərtilər (1 dəstə) 0,25 manat

Un 1,5 manat

Şokolad 12-22 manat

Balıq 14-20 manat

Düyü 4-5 manat

Alma 1,5-2,5 manat

Mandarin 3-3,5 manat

Banan 3-4 manat

Bazarlarda və marketlərdə bayram xonçaları da satışdadır. Kiçik xonçalar 25 manatdan başlayır, daha böyük və zəngin tərkibli variantlar isə 200-250 manata qədər təklif olunur.

Novruz bayramının əsas simvollarından olan səmənilərin qiyməti də fərqlidir, ölçüsünə, bəzəyinə görə dəyişir.

Beli qırmızılı səməninin orta hesabla birinin qiyməti ən balacası 1 manata, ən böyüyü isə 15 manatdır.

Ümumilikdə, dörd nəfərlik bir ailənin Novruz bayramı süfrəsi üçün orta hesabla 470-500 manat xərc tələb olunur. Ötən il Novruz bayramı ərəfəsində isə bayram süfrəsinin təxmini qiyməti orta hesabla 330-350 manata başa gəlirdi.

Paylaş:

Baxılıb: 311 dəfə