Bakının Səbail rayonunda 60 mindən çox sakin tibbi müayinədən keçib

Bakı:

23 °C

78 %

7 m/s

Əlaqə

AZ RU EN

Ana səhifə / Sosial / Bakının Səbail rayonunda 60 mindən çox sakin tibbi müayinədən keçib

Bakının Səbail rayonunda 60 mindən çox sakin tibbi müayinədən keçib

18.04.2014 [10:19]

Ölkə vətəndaşlarının sağlamlığının qorunması tədbirlərini daim diqqət mərkəzində saxlayan Azərbaycan Prezidenti İlham Əliyevin tapşırıqlarına əsasən, respublikamızda keçirilən əhalinin tibbi müayinəsi tədbirləri Bakının mərkəzi rayonu olan Səbaildə yüksək səviyyədə təşkil olunub.
Bununla əlaqədar Səbail rayon İcra Hakimiyyəti tərəfindən aidiyyəti qurumların nümayəndələrindən ibarət müvafiq komissiya yaradılıb, xüsusi qrafiklər tərtib olunub. Müvafiq qurumların da cəlb olunması ilə rayonda, onun qəsəbə və yaşayış sahələrində tədbirlə bağlı əhali arasında geniş təbliğat işləri aparılıb.
Rayon İcra Hakimiyyətindən AzərTAc-a bildiriblər ki, bu istiqamətdə həyata keçirilən işlər gündəlik nəzarətdə saxlanılır.
Tibbi müayinənin keyfiyyətlə həyata keçirilməsi məqsədi ilə rayondakı 4 poliklinikada müvafiq şərait yaradılıb. Həmçinin yaşayış sahələrində, idarə və təşkilatlarda, eləcə də evlərdə yataq şəraitində müalicə olunan xəstələrin müayinəsi məqsədi ilə səyyar həkim briqadaları da təşkil edilib.
İndiyədək Səbail rayonu üzrə 60319 nəfər sakin tibbi müayinələrdən keçirilib. Müayinələr zamanı daha çox arterial təzyiq, şəkərli diabet, qan, ürək-damar, tənəffüs sistemi və oynaq xəstəlikləri aşkarlanmış xəstələr ambulator, stasionar müalicəyə cəlb olunub və dispanser qeydiyyata götürülüb. Onlara ixtisaslı həkimlər tərəfindən müalicə təyin olunub. Ümumilikdə, 172 nəfər stasionar müalicəyə götürülüb, 8745 nəfərə ambulator müalicə təyin edilib. Poliklinikaların həkimləri rayon sakinləri ilə yanaşı, ərazidə məskunlaşmış məcburi köçkünlərin də tibbi müayinələrini həyata keçirirlər.
Səbail rayonda əhalinin profilaktik tibbi müayinədən keçirildiyi yerlərdən biri də Badamdar qəsəbəsindəki 34 nömrəli şəhər poliklinikasıdır. Qəsəbədə 35 mindən çox əhali yaşayır. Burada, həmçinin 3 minə yaxın məcburi köçkün məskunlaşıb. Onların tibbi müayinələrdən keçirilməsi ilə bağlı qəsəbə nümayəndəliyi, yerli bələdiyyə, qəsəbədəki orta və məktəbəqədər təhsil müəssisələrinin, mədəniyyət evi, kitabxana və digər qurumların kollektivləri, qəsəbə ictimaiyyətinin nümayəndələri tərəfindən təbliğat aparılıb, xəstə, kimsəsiz, tənha vətəndaşların müayinəsi üçün səyyar həkim briqadaları təşkil olunub.
Badamdar qəsəbəsindəki 34 nömrəli şəhər poliklinikasının həkim-cərrahı Şərəf Rəşidov mühüm tədbirlə əlaqədar çalışdığı tibb müəssisəsinin ən müasir avadanlıq, dərman preparatları ilə təchiz olunduğunu deyib. Bildirib ki, poliklinikada yaradılmış səyyar həkim briqadaları qrafik əsasında qəsəbədəki təşkilatlarda, məktəblərdə, məcburi köçkünlərin məskunlaşdıqları ərazilərdə müayinələr aparır, həmçinin yaşlı və xəstə insanlara evlərində xidmət göstərirlər.
Qəsəbə sakinləri dövlətimizin başçısının bu nəcib təşəbbüsünü böyük minnətdarlıqla qarşılayıblar. Onlar poliklinikanın həkim heyətindən, burada yaradılan şəraitdən razılıq ediblər. Müayinədən keçən rayon sakinləri Azərbaycan Respublikasının Prezidenti İlham Əliyevə minnətdarlıqlarını bildirib.
Rayonda əhalinin tibbi müayinəsi tədbirləri davam edir.

Paylaş:

Baxılıb: 1290 dəfə