Səbail rayon gənclərinin toplantısı keçirilib

Bakı:

17 °C

63 %

10 m/s

Əlaqə

AZ RU EN

Ana səhifə / Sosial / Səbail rayon gənclərinin toplantısı keçirilib

Səbail rayon gənclərinin toplantısı keçirilib

24.05.2014 [11:21]

Səbail rayon İcra Hakimiyyətində rayon iqtisadiyyatının bütün zümrələrində - elm, mədəniyyət, təhsil, səhiyyə, biznes və s. sahələrdə, hüquq mühafizə orqanlarında çalışan, ali məktəblərdə təhsil alan gənclərin, həmçinin rayon rəhbərliyi, ağsaqqallar, veteranlar, müxtəlif ictimai birliklərin nümayəndələrinin iştirakı ilə Səbail rayon gənclərinin toplantısı keçirilib.
Rayon İcra Hakimiyyətindən AzərTAc-a bildiriblər ki, Azərbaycan Gənclərinin VII Ümumrespublika Forumu ilə əlaqədar keçirilən tədbir dövlət himnimizin oxunması ilə başlayıb.
Tədbirdə çıxış edən rayon gənclər və idman idarəsinin rəisi Vüqar Mürsəlov bildirib ki, Səbail rayon əhalisinin təqribən 26 faizini gənclər təşkil edir. Qeyd edilib ki, keçən müddət ərzində gənclərimizin ölkənin ictimai-siyasi, iqtisadi və mədəni həyatında fəal iştirakı, onların sosial problemlərinin həlli və hüquqlarının müdafiəsinin təmini, gənclər siyasətinin bütün istiqamətləri üzrə müvafiq dövlət proqramlarının səmərəli həyata keçirilməsi, gənc istedadlara dövlət qayğısının artırılması, elm, təhsil, iqtisadiyyat, mədəniyyət, dövlət idarəçiliyi və digər sahələrdə gənclərin xidmətlərinin qiymətləndirilməsi və bütövlükdə dövlət gənclər siyasətinin həyata keçirilməsi istiqamətində çox böyük işlər görülüb.
Səbail rayon İcra Hakimiyyətinin başçısı Asif Əsgərov ölkə rəhbərliyi tərəfindən gənc nəslə diqqət və qayğının hər zaman ön sırada olduğunu söyləyib. O deyib ki, Ulu öndər Heydər Əliyev Azərbaycan gəncliyini hər mənada güclü görmək istəyirdi. Millətin yaşaması və inkişafı üçün təməl daşı olan gəncliyin möhkəm olması yetişən nəslin sağlam təfəkküründən, düşüncə qabiliyyətindən asılıdır. Ümummilli lider Heydər Əliyev 1994-cü ilin iyulunda Azərbaycanda Gənclər və İdman Nazirliyini yaradıb və gənclərimizi bir araya toplayıb. 1996-cı il fevralın 2-də isə ilk dəfə müstəqil dövlətimizdə Gənclər Forumu keçirilib. Ulu öndərin elə həmin gün imzaladığı Sərəncamla fevralın 2-si Azərbaycanda Gənclər Günü elan edilib.
Gənclərə, gələcək nəslə çox böyük fikir verən, onların problemlərini hər zaman diqqət mərkəzində saxlayan Azərbaycan Prezidenti İlham Əliyev tərəfindən gənclərin problemlərinin həlli üçün mühüm addımlar atılır. 2007-ci ilin “Gənclər ili” elan edilməsi, Azərbaycan Gəncliyi Dövlət Proqramının təsdiqi, Gənclər Fondunun yaradılması, gənclərin sosial müdafiəsi ilə bağlı müxtəlif sərəncamların verilməsi həmin işlərin bir hissəsidir.
Burada hər zaman gənclərə dəstək olan Heydər Əliyev Fondunun və Fondun prezidenti Mehriban Əliyevanın da fəaliyyətini qeyd etmək lazımdır. Fondun Azərbaycanın mədəniyyətinin və tarixinin, ölkədəki nailiyyətlərin dünya miqyasında təbliği və tanınmasında böyük rolu var. Heydər Əliyev Fondunun vitse-prezidenti Leyla Əliyevanın son illərdə gördüyü işlər və həyata keçirdiyi layihələr gənclərimiz tərəfindən böyük rəğbətlə qarşılanır.
A.Əsgərov Azərbaycan, eləcə də Səbail rayon gənclərinin son illərdə əldə etdikləri uğurlardan da danışıb.
Forumda çıxış edən Dövlət İdarəçilik Akademiyasının Tələbə Gənclər Təşkilatının sədri Toğrul Niyazlı, 6 nömrəli tam orta məktəbin müəllimi Arzu Kazımova, Səbail İdman Klubunun məşqçisi Xəyyam Orucov, “Museum İnn” otelinin baş meneceri Akif Əhmədov, Azərbaycan Dövlət İqtisad Universitetinin tələbəsi Murad Musayev, Bakı Şəhər Gənclər və İdman Baş İdarəsinin rəis müavini Aydın Yusifov və başqaları əldə edilən uğurlar, görülən işlər, problemlər və onların həlli istiqamətində nəzərdə tutulan layihələr barədə məlumat veriblər.
Tədbirdə Azərbaycan Gənclərinin VII Ümumrespublika Forumuna Səbail rayonundan 27 nümayəndə seçilib, toplantı iştirakçıları adından rayon gənclərinə müraciət qəbul olunub.
Sonda rayonun ictimai-siyasi həyatında, təhsildə, idmanda fərqlənən bir qrup gəncə İcra Hakimiyyətinin qiymətli hədiyyələri təqdim olunub.

Paylaş:

Baxılıb: 1091 dəfə