Qədim və müasir Naxçıvan yeni kitab-albomda

Bakı:

21 °C

83 %

2 m/s

Əlaqə

AZ RU EN

Ana səhifə / Sosial / Qədim və müasir Naxçıvan yeni kitab-albomda

Qədim və müasir Naxçıvan yeni kitab-albomda

23.10.2014 [10:23]

Naxçıvan Muxtar Respublikasının (MR) yaradılmasının 90 illik yubileyinə həsr olunmuş silsilə tədbirlər, təqdimatlar, sərgilər davam etməkdədir. Keçirilən tədbirlər bizim bu qədim diyarı yaxından tanımağımıza, onu yenidən “kəşf” etməyimizə imkan yaradır. Bu təqdimatların hər birində Azərbaycanın ayrılmaz tərkib hissəsi olan Naxçıvan Muxtar Respublikasının milli dövlətçilik tariximizin, elmi, ədəbi-mədəni irsimizin formalaşmasında, zənginləşməsindəki mühüm rolu xüsusi olaraq diqqətə çatdırılır.
Mədəniyyət və Turizm Nazirliyi tərəfindən hazırlanaraq oktyabrın 22-də M.F.Axundzadə adına Azərbaycan Milli Kitabxanasında təqdim olunan “Naxçıvan Muxtar Respublikası-90” adlı kitab-albom da bu cəhətdən təqdirəlayiqdir.
AzərTAc xəbər verir ki, kitab-albom Prezident İlham Əliyevin “Naxçıvan Muxtar Respublikasının 90 illik yubileyinin keçirilməsi haqqında” 2014-cü il 14 yanvar tarixli Sərəncamının icrasına dair tədbirlər planına əsasən nəşr olunub.
Hökumət nümayəndələrinin, Mili Məclisin deputatlarının, tanınmış elm və mədəniyyət xadimlərinin iştirak etdikləri tədbirdə mədəniyyət və turizm nazirinin birinci müavini Vaqif Əliyev Naxçıvanın muxtariyyəti asanlıqla qazanmadığına, çətin sınaqlardan keçərək gərgin hərbi-siyasi və diplomatik mübarizələr nəticəsində əldə etdiyinə diqqət çəkib.
Vaqif Əliyev deyib: “Naxçıvanın bugünkü inkişaf səviyyəsinə çatması Ulu öndər Heydər Əliyevin adı ilə sıx bağlıdır. Ona görə ki, Naxçıvan Azərbaycan xalqına dünya şöhrətli şəxsiyyət, Ulu öndər Heydər Əliyevi bəxş edib. Ulu öndər hakimiyyətdə olduğu bütün dövrlərdə Naxçıvana böyük diqqət göstərib”.
2018-ci ildə Naxçıvan İslam Mədəniyyətinin Paytaxtı kimi böyük bir missiyanı yerinə yetirəcək ki, bu da qədim diyarın möhtəşəm tədbirlərin keçirildiyi məkanlardan birinə çevrildiyinə bariz nümunədir.
Naxçıvan Muxtar Respublikasının Bakıdakı daimi nümayəndəliyinin rəhbəri Bəxtiyar Əsgərov Prezident İlham Əliyevin müvafiq Sərəncamı ilə qeyd olunan Naxçıvan MR-in 90 illik yubileyi ilə bağlı silsilə tədbirlərin bu qədim diyarın tarixinin öyrənilməsi, müasir inkişafının təbliği baxımından mühüm əhəmiyyət daşıdığını vurğulayaraq deyib: “Naxçıvan Muxtar Respublikası-90” adlı kitab-albom bu silsiləyə böyük töhfədir”.
Şəhərsalma mədəniyyətinin 5 min il yaşının faktlarla sübut edildiyi bu qədim oğuz yurdu Naxçıvan bəşəriyyətin ilkin beşiklərindən hesab olunur deyə, sözə başlayan Azərbaycan Milli Elmlər Akademiyasının (AMEA) Nizami adına Ədəbiyyat İnstitutunun direktoru, AMEA-nın vitse-prezidenti, akademik İsa Həbibbəyli söyləyib ki, buradakı tarixi məkanlardan tapılmış maddi-mədəniyyət nümunələri hər daşı tarixə çevrilən bu qədim Azərbaycan torpağının möhtəşəm keçmişindən xəbər verir.
Naxçıvanda 1200-dən çox tarixi abidə vardır ki, onlardan da 100-ü dünya əhəmiyyətlidir deyən akademikin sözlərinə görə oxucular yeni kitab-albomdan bu qədim diyarla bağlı zəngin məlumatlar əldə edə biləcəklər.
Ümummilli liderin hakimiyyətə yenidən qayıdışı ilə Azərbaycanda, eləcə də Naxçıvanda həyata keçirilən mühüm layihələrdən söz açan Milli Məclisin aqrar siyasət komitəsinin sədri Eldar İbrahimov deyib ki, bu gün Ulu öndərin siyasi kursunu davam etdirən Prezident İlham Əliyev Azərbaycanı, onun ayrılmaz hissəsi olan Naxçıvan Muxtar Respublikasını da yaşadır və inkişaf etdirir.
Azərbaycan Prezidentinin diqqət və qayğısı sayəsində Naxçıvan Muxtar Respublikasının inkişafının 2003-cü ildən sonrakı dövrü Ümummilli liderimiz Heydər Əliyevin quruculuq xəttinin yaradıcı gücünün daha bir əyani ifadəsidir. Bu xəttin davam etdirilməsi blokada şəraitində yaşayan Naxçıvan MR-də dinamik inkişafı təmin edib.
Minilliklərdən boylanan Naxçıvanın tarixi və mədəniyyət abidələri, turizm potensialı, müasir inkişafı, ecazkar təbiətinin əks olunduğu yeni nəşrlə bağlı fikirlərini bölüşən digər natiqlər bu kitab-albomun xarici dillərə tərcümə olunaraq səfirliklərimizə göndərilməsini tövsiyə ediblər.
Təqdimat iştirakçıları sonda “Naxçıvan Muxtar Respublikası-90” kitab sərgisi ilə tanış olublar.

Paylaş:

Baxılıb: 1201 dəfə