Avstriyalı hüquqşünaslar Azərbaycanda səfərdədirlər

Bakı:

15 °C

72 %

10 m/s

Əlaqə

AZ RU EN

Ana səhifə / Sosial / Avstriyalı hüquqşünaslar Azərbaycanda səfərdədirlər

Avstriyalı hüquqşünaslar Azərbaycanda səfərdədirlər

09.10.2015 [10:08]

Avstriyanın Ali, apelyasiya, regional və rayon məhkəmələrinin, Baş Prokurorluğunun və Ədliyyə Nazirliyinin əməkdaşlarından ibarət 40 nəfərlik nümayəndə heyəti ölkəmizə maraq göstərərək səfərə gəlib.
Oktyabrın 8-də ədliyyə naziri, Məhkəmə-Hüquq Şurasının sədri Fikrət Məmmədov nümayəndə heyəti ilə görüşüb.
Ədliyyə Nazirliyinin mətbuat xidmətindən AZƏRTAC-a bildiriblər ki, dövlətlərimiz arasında səmərəli əməkdaşlıq və dostluq münasibətlərinin yüksək səviyyəsini qeyd edən nazir Azərbaycan Prezidenti İlham Əliyevin rəhbərliyi ilə aparılan genişmiqyaslı ədliyyə və məhkəmə islahatları, o cümlədən yeni məhkəmələrin yaradılması, hakimlərin ən şəffaf seçimi və tədrisi, məhkəmə infrastrukturunun müasirləşdirilməsi, elektron məhkəmənin tətbiqi barədə məlumat verib, hüquqi sahədə qarşılıqlı fəaliyyətin daha da dərinləşdirilməsi üçün geniş perspektivlərin olduğunu vurğulayıb.
Hüquqi sahədə əlaqələrin inkişafına böyük önəm verdiyini söyləyən nümayəndə heyətinin rəhbəri xanım Maria Vanke-Çzervenka ölkəmizə səfərindən məmnunluğunu ifadə edib, respublikamızın hərtərəfli dinamik tərəqqisinin şahidi olduğunu söyləyib, məhkəmə-hüquq sistemində aparılan islahatları maraqla qarşılayaraq, qazanılan nailiyyətləri yüksək qiymətləndirib.
Qonaqların nazirlikdə ədliyyə tarixi muzeyi ilə tanışlığı zamanı ədliyyə nazirinin müavini Azər Cəfərov Azərbaycanın məhkəmə-hüquq sisteminin inkişaf mərhələlərindən danışıb, hüquqi sahədə qarşılıqlı fəaliyyətin səmərəsini qeyd edib.
Tədbirdə Avstriyanın Azərbaycandakı səfiri Aksel Vex də iştirak edib.
Səfər çərçivəsində qonaqlar respublikamızda aparılan məhkəmə-hüquq islahatlarına böyük maraq göstəriblər və onlarla Ali Məhkəmədə görüş keçirilib. Eləcə də, nümayəndə heyətinin üzvləri Şəkidə ədliyyə və məhkəmə orqanlarının fəaliyyəti, o cümlədən inşası başa çatmaqda olan möhtəşəm məhkəmə kompleksi ilə tanış olaraq yaradılmış yüksək şəraitdən və qabaqcıl informasiya-kommunikasiya texnologiyalarının geniş tətbiqindən heyranlıqlarını ifadə ediblər. Qonaqlar Bakı şəhəri Yasamal rayon Məhkəməsinin müasir binasına baş çəkərək Azərbaycan Prezidentinin Sərəncamı ilə yaradılan “elektron məhkəmə” informasiya sisteminin sınaq rejimində tətbiqini izləyib və ədalət mühakiməsinin səmərəliliyinin artırılmasına xidmət edən bu texnoloji yenilikləri təqdir ediblər.
Nümayəndə heyəti, həmçinin Baş Prokuror yanında Korrupsiyaya Qarşı Mübarizə Baş İdarəsinin fəaliyyəti, habelə paytaxtımızın tarixi və mədəni abidələri, o cümlədən Qobustan Milli Tarix-Bədii Qoruğu ilə tanış olub.
Səfər zamanı qonaqların Azərbaycan brendi olan “ASAN xidmət”in vətəndaş məmnunluğuna yönələn fəaliyyəti ilə də tanışlığı nəzərdə tutulur.

Paylaş:

Baxılıb: 775 dəfə