Beynəlxalq konfransda terrorizmlə mübarizə sahəsində prokurorların rolu müzakirə edilib

Bakı:

17°C

72%

4m/s

Əlaqə

AZ RU EN

Ana səhifə / Sosial / Beynəlxalq konfransda terrorizmlə mübarizə sahəsində prokurorların rolu müzakirə edilib

Beynəlxalq konfransda terrorizmlə mübarizə sahəsində prokurorların rolu müzakirə edilib

13.11.2015 [10:09]

Noyabrın 9-dan 12-dək Rusiya Baş Prokurorluğunun təşkilatçılığı ilə Soçidə Beynəlxalq Prokurorlar Assosiasiyasının (BPA) “Terrorizm və zorakı ekstremizmə qarşı mübarizə” mövzusunda Mərkəzi və Şərqi Avropa, Mərkəzi Asiya ölkələri üçün 7-ci regional konfransı keçirilib.
Otuzdan artıq ölkənin prokurorluq orqanlarının və beynəlxalq təşkilatların nümayəndələrinin qatıldıqları tədbirdə ölkəmizi baş prokurorun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi, BPA-nın İcraiyyə Komitəsinin üzvü Kamran Əliyev və Baş Prokurorluğun beynəlxalq əlaqələr idarəsinin rəisi Erkin Əlixanovdan ibarət nümayəndə heyəti təmsil edib.
Baş Prokurorluğun mətbuat xidmətindən AZƏRTAC-a bildiriblər ki, Rusiya Federasiyasının baş prokuroru Yuri Çayka və BPA-nın prezidenti Gerhard Yaroş tədbirdə çıxış edərək son dövrdə artma meyilləri müşahidə edilən terrorizmə və ekstremizmə qarşı mübarizədə beynəlxalq əməkdaşlığın və bu prosesdə prokurorların rolunun vacibliyini vurğulayıblar.
Konfransda terrorizm və zorakı ekstremizm ilə mübarizədə yeni çağırışlar, ayrı-ayrı ölkələrin prokurorluq orqanları tərəfindən tətbiq edilən təcrübə və mexanizmlər, bu bəşəri bəlaya qarşı beynəlxalq əməkdaşlıq və digər aktual məsələlər müzakirə olunub.
Tədbirin plenar iclasında çıxış edən baş prokurorun müavini K.Əliyev ölkəmizin qlobal və regional səviyyədə terrorçuluğa qarşı mübarizə sahəsində qəbul edilən bütün beynəlxalq və regional konvensiyalara qoşulduğunu bildirib. Həmin fəaliyyət strategiyasının banisinin xalqımızın Ümummilli lideri Heydər Əliyev olduğunu vurğulayan K.Əliyev Prezident İlham Əliyevin rəhbərliyi ilə Azərbaycan Respublikasının beynəlxalq antiterror koalisiyasının, o cümlədən enerji təhlükəsizliyi və sülhməramlı əməliyyatların həyata keçirilməsində fəal iştirakçılardan birinə çevrildiyini xüsusi qeyd edib.
Bildirilib ki, ötən əsrin sonlarında terrora məruz qalan Azərbaycan ərazilərinin 20 faizi Ermənistan silahlı qüvvələri tərəfindən işğal olunub. Nəzarətdən çıxan həmin ərazilər terrorçular üçün düşərgələrin yerləşdirilməsi, axtarışda olan terrorçulara sığınacaq verilməsi, təlimlərin keçirilməsi, terror aktlarının planlaşdırılması və törədilməsi üçün əlverişli zəmin və şərait yaradır.
Konfransın plenar iclasına sədrlik edən Azərbaycan nümayəndə heyətinin rəhbəri terrorçuluğa qarşı mübarizədə prokurorluğun rolu, ölkəmizdə bu sahədə qəbul edilmiş normativ hüquqi aktlar, milli konsepsiya və praktiki mexanizmlər barədə ətraflı məlumat verib.
Tədbirin sonunda terrorizmə və zorakı ekstremizmə qarşı mübarizədə prokurorluq orqanları tərəfindən beynəlxalq əməkdaşlığın davam etdirilməsi, genişləndirilməsi və bu istiqamətdə bütün lazımi səylərin göstərilməsi qərara alınıb.
Səfər çərçivəsində Azərbaycan nümayəndə heyəti BPA, Rusiya, Çin, Səudiyyə Ərəbistanı, Qazaxıstan, Ukrayna və digər ölkələrin, eləcə də beynəlxalq təşkilatların nümayəndə heyətlərinin rəhbərləri ilə görüşlər keçirərək ikitərəfli əməkdaşlığın inkişafına dair müzakirələr aparıb.

Paylaş:

Baxılıb: 709 dəfə