Nardaranlı məktəblilər Multikulturalizm Mərkəzində olublar

Bakı:

16°C

77%

0m/s

Əlaqə

AZ RU EN

Ana səhifə / Sosial / Nardaranlı məktəblilər Multikulturalizm Mərkəzində olublar

Nardaranlı məktəblilər Multikulturalizm Mərkəzində olublar

30.01.2016 [10:31]

Yanvarın 29-da Nardaran məktəbliləri və ziyalıları Bakı Beynəlxalq Multikulturalizm Mərkəzində (BBMM) olublar.
Mərkəzdən AZƏRTAC-a bildiriblər ki, Azərbaycan Respublikasının millətlərarası, multikulturalizm və dini məsələlər üzrə Dövlət müşaviri, BBMM-in Himayəçilik Şurasının sədri, akademik Kamal Abdullayev indiyədək Bakı Beynəlxalq Multikulturalizm Mərkəzində müxtəlif etnik qrupların nümayəndələrinin, fərqli dinlərin daşıyıcılarının qonaq olduqlarını bildirərək deyib: “Onlar hamısı Azərbaycanda olanda burada aparılan quruculuq işlərinə heyranlıqlarını bildiriblər. O qonaqlardan bəziləri əvvəllər də Azərbaycanda olduqlarından müqayisə etmək imkanları var. Bütün bunlar xalqımızın canında-qanında olan yaratmaq həvəsi və Prezident İlham Əliyevin bu yaratmaq prosesinə rəvac verməsi nəticəsində mümkün olur”.
Azərbaycan ədəbiyyatında multikultural dəyərlərin öz ifadəsini tapdığını qeyd edən dövlət müşaviri deyib: “Nizamidən başlayaraq Cavidə qədər Azərbaycan ədəbiyyatı eşq üstündə köklənib. Bu ədəbiyyat yaşadığı bütün ictimai-siyasi dönəmlərdə irqindən, dinindən, dilindən asılı olmadan bütün bəşəriyyəti sevib və sevir. Eyni zamanda, bu ədəbiyyatın sahibi olan Azərbaycan xalqı digər mədəniyyətlərdə, dillərdə, tarixlərdə müsbət dəyərlər axtarıb tapan bir xalq kimi öz əvəzsiz mənəvi-əxlaqi töhfəsini ümumbəşəri dəyərlər xəzinəsinə səxavətlə daxil edir. Hüseyn Cavid “Qız məktəbində” şeirində Gülbahar adlı balaca bir qızcığazın dili ilə “Anam, babam, müəlliməm, bir də bütün insanlar” deyərək dünyanın bütün insanlarını sevdirirdi. Mən hesab edirəm ki, Gülbaharın sonda dediyi bu sözlər ümumilikdə bizim xalqımızın daxili simasını üzə çıxaran sözlərdir. Azərbaycan müxtəlif xalqların və etnik qrupların dinc, dostluq, qardaşlıq şəraitində yaşadığı, sevinci və kədəri birgə bölüşdüyü bir məkandır. Burada yaşayan bütün xalqlar və etnik qruplar Azərbaycanı öz ortaq vətənlərinə çevirə biliblər”.
Kamal Abdullayev Prezident İlham Əliyevin Sərəncamı ilə 2016-cı ilin ölkəmizdə “Multikulturalizm ili” elan olunması ilə əlaqədar görüləcək işlərdən, Azərbaycandakı tolerant və multikultural mühitdən, Nardaranda Bilik Evinin açılacağından, “Qardaşlaşmış məktəblər” layihəsi çərçivəsində Nardaran məktəblilərinin iştirakından söz açıb.
Nardaran məktəbliləri görüşdə bədii-musiqili kompozisiya təqdim ediblər.
Məktəblilər və ziyalılar görüşlə bağlı təəssüratlarını bölüşərək dövlət qurumlarında belə tədbirlərin təşkilinin böyük əhəmiyyət daşıdığını vurğulayıblar.
Belə görüşlərin qarşılıqlı şəkildə öyrənmək baxımından çox vacib olduğunu vurğulayan Kamal Abdullayev deyib: “Belə görüşlərdə hər dəfə əmin oluram ki, Azərbaycanda işıqlı gənclər yetişir. İnanıram ki, belə tədbirlər ölkəmizin gözəl guşələrindən olan Nardaran kimi bölgələrimizdə Azərbaycan naminə mənəviyyatımızın, mədəniyyətimizin, dilimizin, ədəbiyyatımızın inkişafına öz töhfəsini verəcək. Bu tədbirlər, görüşlər birdəfəlik xarakter daşımır. Bu görüş ilə bir növ gələcək tədbirlərə lağım atdıq. Belə tədbirlər həm Nardaranda davam edəcək, həm Bakı Beynəlxalq Multikulturalizm Mərkəzində vaxtaşırı görüşlər təşkil olunacaq, həm də biz nardaranlı şagirdləri Azərbaycanın müxtəlif bölgələrinə dəvət edəcəyik. Güman edirəm ki, hər dəfə də Azərbaycan naminə faydalı işlərə başlayacağıq”.

Paylaş:

Baxılıb: 542 dəfə