Məktəb direktoru işləmək istəyənlərin 493-ü müsahibə mərhələsinə keçib

Bakı:

27 °C

66 %

4 m/s

Əlaqə

AZ RU EN

Ana səhifə / Sosial / Məktəb direktoru işləmək istəyənlərin 493-ü müsahibə mərhələsinə keçib

Məktəb direktoru işləmək istəyənlərin 493-ü müsahibə mərhələsinə keçib

20.04.2016 [10:09]

Aprelin 19-da Təhsil Nazirliyində məktəb direktorlarının işə qəbulu imtahanı və respublika fənn olimpiadalarının final mərhələsinin nəticələri ilə bağlı mətbuat konfransı keçirilib.
AZƏRTAC xəbər verir ki, tədbirdə nazirliyin təhsilin inkişafı proqramları şöbəsinin müdiri Emin Əmrullayev fizika, kimya, riyaziyyat, biologiya və informatika fənləri üzrə respublika fənn olimpiadalarının nəticələri barədə məlumat verib. Bildirilib ki, nəticələrə əsasən, 16 nəfər birinci, 33 nəfər ikinci, 54 nəfər üçüncü yeri tutub. Naxçıvan Muxtar Respublikası şagirdlərinin nəticələri və informatika fənni üzrə ümumi nəticələr aprelin 19-da elan olunacaq.
Qeyd edilib ki, artıq iki ildir nazirlik tərəfindən olimpiadalar yeni qaydalar əsasında keçirilir. Respublika fənn olimpiadalarının birinci - rayon (şəhər) mərhələsi yanvarın 17-də olub. Bu mərhələdə riyaziyyat, fizika, kimya, biologiya, informatika, tarix, coğrafiya, Azərbaycan dili və ədəbiyyat fənləri üzrə 27.500 nəfər IX-XI sinif şagirdi iştirak edib. Olimpiadanın yarımfinal turunda 4.500-dək şagird bilik və bacarığını nümayiş etdirib. Qeyd edilib ki, ötən həftə fizika, kimya, biologiya, riyaziyyat və informatika üzrə olimpiadaların final mərhələsi keçirilib. Dəqiq fənlər üzrə bu mərhələdə 271 şagird iştirak edib.
Azərbaycan dili və ədəbiyyat, coğrafiya və tarix fənləri üzrə respublika fənn olimpiadalarının final mərhələsi aprelin 22-dən 24-dək fizika, riyaziyyat və informatika təmayüllü liseydə keçiriləcək. Bu fənlər üzrə 415 şagird bilik və bacarığını nümayiş etdirəcək. Vurğulanıb ki, aşağı yaş qrupları üzrə keçirilən fənn olimpiadalarında iştirakçıların nəticələri uğurlu olub.
Sonra nazirliyin insan resursları şöbəsi müdirinin müavini Eşqi Bağırov bu sistemə daxil olan ümumi təhsil müəssisələrinə direktor vəzifəsinə işə qəbul ilə bağlı keçirilən imtahanlar barədə məlumat verib. Bildirilib ki, bu il martın sonlarında direktorların işə qəbulu ilə bağlı yeni qaydalar təsdiqlənib. Təhsil Nazirliyi sisteminə daxil olan ümumi təhsil müəssisələrinə direktor vəzifəsinə işə qəbul ilə bağlı keçirilən test imtahanının nəticələri məlum olub. Müsabiqənin üçüncü mərhələsi aprelin 15-dən 17-dək Azərbaycan Dövlət İqtisad Universitetində keçirilib. Məktəb direktoru olmaq istəyən namizədlərin üçüncü mərhələdə - imtahanda iştirakı prosesi tam elektronlaşdırılıb. Bütün proseslər xüsusi proqram təminatı vasitəsilə həyata keçirilib. Hər namizədə 110 dəqiqə vaxt verilib. Bu vaxtın 90 dəqiqəsi sual-cavab, qalan 20 dəqiqəsi isə esse yazılması üçün nəzərdə tutulub.
Qeyd edilib ki, elektron ərizəsi təsdiqlənən 2.260 nəfərdən 1.591-i imtahanda iştirak edib, onlardan 493-ü müsahibə mərhələsində iştirak hüququ qazanıb. Müsahibə mərhələsində isə namizədlərin dünyagörüşü, peşəkarlığı, bilik və bacarıqları qiymətləndiriləcək.

Paylaş:

Baxılıb: 801 dəfə