“Bakcell”ə yeni baş icraçı direktor təyin olunub

Bakı:

12 °C

50 %

5 m/s

Əlaqə

AZ RU EN

Ana səhifə / Sosial / “Bakcell”ə yeni baş icraçı direktor təyin olunub

“Bakcell”ə yeni baş icraçı direktor təyin olunub

21.05.2016 [10:27]

Azərbaycanın ilk mobil operatoru və aparıcı mobil internet provayderi olan “Bakcell” şirkətinə yeni baş icraçı direktor təyin olunub. Bu münasibətlə təşkil olunan tədbirdə Nikolai Bekers KİV nümayəndələrinə təqdim olunub. Bildirilib ki, telekommunikasiya sahəsində bir sıra rəhbər vəzifələrdə çalışmış cənab Bekers “Bakcell”ə gəlməzdən əvvəl Rumıniyada Almaniyanın “Deutsche Telekom” telekommunikasiya qrupunun baş icraçı direktoru vəzifəsində çalışıb. Bu sahədə 20 illik zəngin beynəlxalq təcrübəyə malik olan cənab Bekers həmçinin “T-Systems Fransa” şirkətinin prezidenti, “Makedonski Telecom” şirkətinin baş icraçı direktoru, “Deutsche Telecom France SAS” şirkətinin prezidenti vəzifələrində işləyib və İndoneziya, Malayziya, Sinqapur və Filippin kimi ölkələrdə telekommunikasiya sənayesi üzrə müxtəlif vəzifələrdə çalışıb. O, yeni layihələrin həyata keçirilməsi, biznesin inkişaf etdirilməsi, internet və mobil rabitə xidmətləri göstərən şirkət və müəssisələrin yenidən qurulması və strategiyanın planlaşdırılması mərhələsindən, bazara çıxış strategiyasının hazırlanması və korporativ mədəniyyətdə müsbət dəyişikliklərin həyata keçirilməsinə qədər müxtəlif sahələrdə uğurlu fəaliyyətinə görə fərqlənib.
Cənab Bekers INSEAD biznes məktəbinin və Köln Universitetinin MBA (Biznesin İdarə Edilməsi üzrə magistr) diplomuna sahibdir.
“Son zamanlar dünyada yaşanan çətin iqtisadi vəziyyət Azərbaycandan da yan keçməyib. Telekommunikasiya sahəsi Azərbaycan iqtisadiyyatında əhəmiyyətli yer tutur və şübhəsiz ki, mövcud iqtisadi durum bu biznes sahəsinin qarşısında da çətin və mürəkkəb vəzifələr qoyur. Buna baxmayaraq, “Bakcell” ölkənin telekommunikasiya bazarında olduqca güclü mövqeyə sahibdir və mən inanıram ki, biz öz şəbəkəmizə və təqdim etdiyimiz yeni xidmətlərə investisiya qoyuluşlarını davam etdirərək, bu çətinliklərin öhdəsindən gələcək və “Bakcell” şirkətinin peşəkar və səmimi işçi heyəti ilə birlikdə daha böyük və parlaq nəticələrə nail olacağıq”, - deyə Nikolai Bekers bildirib.
Tədbirdə həmçinin uşaqlar üçün internetdən istifadənin daha təhlükəsiz olmasını təmin edən yeni internet paketlərinin də təqdimatı keçirilib. Qeyd olunub ki, “Bakcell” şirkətinin təklif etdiyi bu yeni internet paketləri və “Enginet” şirkətinin təklif etdiyi “İnternet Filtrasiya Xidməti” sayəsində “Bakcell” abunəçiləri öz uşaqlarının internetdən təhlükəsiz istifadə etməsini təmin edə biləcəklər.
Bildirilib ki, “Enginet” şirkəti tərəfindən istifadə edilən “Websense” filtrasiya sistemi tərkibində uşaqlar üçün zərərli informasiya daşıyan 90 tematik qrup üzrə 18 milyon veb-səhifəyə çıxışı məhdudlaşdırır. Təhlükəsiz internet paketlərini alan “Bakcell” müştəriləri daxil olduqları veb səhifələri filtrasiya edərək, öz uşaqlarını bir sıra zərərli məzmunlu (çılpaqlıq və seksual məzmun, cinsi tərbiyə, narkotiklər, qumar oyunları, davakar və ekstremist fəaliyyət, zorakılıq və s.) məlumatlardan qoruyacaq.
“Əslində, düzgün istifadə olunduğu halda internet uşaqların inkişafı üçün çox faydalıdır və bu gün o, təhsil sisteminin olduqca mühüm bir tərkib hissəsidir. Bununla belə, biz valideynlər uşaqlarımızın internetdən necə istifadə etmələrinə hər an nəzarət edə bilmirik. Bizim təklif etdiyimiz yeni paketlər də məhz bu problemin həllinə yönəlib. İnanırıq ki, öz uşaqlarının internetdə yalnız təhlükəsiz məzmuna baxmasını istəyən valideynlər üçün bu təklif olduqca cəlbedici olacaq”, - deyə “Bakcell”in baş marketinq və satış direktoru Fedja Hadziç bildirib.
Səlim LOĞMANOĞLU

Paylaş:

Baxılıb: 715 dəfə