Ölkəmizdə dövlət-din münasibətlərinin tənzimlənməsi üçün kifayət qədər təkmil qanunvericilik bazası mövcuddur

Bakı:

18 °C

68 %

6 m/s

AZ RU EN

Ana səhifə / Sosial / Ölkəmizdə dövlət-din münasibətlərinin tənzimlənməsi üçün kifayət qədər təkmil qanunvericilik bazası mövcuddur

Ölkəmizdə dövlət-din münasibətlərinin tənzimlənməsi üçün kifayət qədər təkmil qanunvericilik bazası mövcuddur

13.06.2009 [08:27]

Dünən Yeni Azərbaycan Partiyasının mərkəzi qərargahında Dini Qurumlarla İş üzrə Dövlət Komitəsinin sədri Hidayət Orucov (DQİDK) mətbuat konfransı keçirib. ölkədəki dini durumun sabitliyindən danışan komitə sədri, həmçinin, vurğulayıb ki, Azərbaycanda dövlət-din münasibətlərinin tənzimlənməsi üçün kifayət qədər təkmil qanunvericilik bazası mövcuddur. Onun sözlərinə görə, bu baza zərərli dini təriqətlərin ölkədə yayılmasının qarşısını almağa imkan verir: “Ulu öndər Heydər Əliyevin əsasını qoyduğu məqsədyönlü siyasət nəticəsində ölkəmizdə insan hüquqlarının qorunmasına dair qanunvericilik bazası beynəlxalq hüquq normalarına uyğunlaşdırılıb. Din, etiqad azadlığı ilə bağlı hüquqi-normativ aktlara riayət olunmasına nəzarət, eləcə də dini abidələrimizin bərpası və qorunması sahəsində mövcud olan işlək sistem dövlət-din münasibətləri ən yüksək səviyyədə formalaşmasına şərait yaradır”.
H.Orucov onu da qeyd edib ki, Ulu öndərin siyasi kursunun Prezident İlham Əliyev tərəfindən uğurlu davam etdirilməsi nəticəsində Azərbaycanda tolerantlıq mühiti qorunub saxlanılmaqdadır.
Zəngin tarixə malik dini abidələrimizin bərpası istiqamətində görülən işlərdən danışan H.Orucov Prezident İlham Əliyevin bilavasitə diqqət və qayğısı ilə Bibiheybət, Təzəpir, Əjdərbəy və digər məscidlərdə böyük quruculuq və bərpa işlərinin aparıldığını xatırladıb. Eyni zamanda, milli-mənəvi dəyərlərimizin qorunması, tarixi-mədəni abidələrimizin bərpası istiqamətində Heydər Əliyev Fondunun həyata keçirdiyi məqsədyönlü layihələr haqqında da söz açan H.Orucov, Fondun maliyyə dəstəyi ilə Əzizbəyov rayonunun Binə qəsəbəsində Möhsin Səlim və İmam Rza məscidlərində, həmçinin, Mərdəkan qəsəbəsində Pirhəsən ziyarətgahında, Gəncə şəhərində Şah Abbas və Həzrət Zeynəb məscidlərində yenidənqurma və bərpa işlərinin başa çatdırıldığını bildirib.
Komitənin din sahəsində dövlət siyasətinin həyata keçirilməsi, dini etiqad azadlığı prinsiplərinin qorunması, dini dözümlülük ənənələrinin möhkəmləndirilməsi, eləcə də dövlət qurumları ilə icmalar arasında qarşılıqlı etimad mühitinin yaradılması məqsədilə apardığı ardıcıl tədbirlərdən danışan H.Orucov cəmiyyətin maarifləndirilməsi üçün görülən işlərin həcminin və miqyasının xeyli genişləndiyini də diqqətə çatdırıb. Komitə rəhbəri DQİDK-nın Mərkəzi Aparatında və ölkənin bütün şəhər və rayonlarında “Prezident seçkisi-2008: dindarlar seçici kimi”, “Heydər Əliyev və milli-mənəvi dəyərlərimiz”, “Qeyri-ənənəvi dinlər və təriqətlər”, “çağdaş Azərbaycan cəmiyyəti: mövcud dini problemlər”, “Azərbaycan Konstitusiyasına edilən əlavə və dəyişikliklər dindarların gözü ilə” aktual mövzularda ümumilikdə 260-a yaxın seminar-treninq keçirildiyini vurğulayıb.
Azərbaycan əhalisinin 96 faizinin müsəlmanlardan ibarət olduğunu bildirən H.Orucov DQİDK-da qeydiyyatdan keçən dini qurumların sayının 534-ə çatdığını deyib. Onlardan 157-sinin son iki ildə qeydiyyata alındığını, bu icmalardan 156-nın İslam, 1-nin isə Sumqayıt şəhər “Kübar” qeyri-İslam təmayüllü yəhudilər icması olduğunu söyləyib.
Qeyri-qanuni yollarla dini ədəbiyyatın ölkəyə idxalının və yayılmasının qarşısının alınması istiqamətində görülən işlərdən danışan H.Orucov son iki ildə ekspertizaya təqdim olunan dini kitabların sırasında zərərli dini ədəbiyyatların azaldığını söyləyib.
Prezident İlham Əliyevin 29 may 2009-cu ildə “Dini etiqad azadlığı haqqında” Azərbaycan Respublikasının Qanununa əlavələr və dəyişikliklər edilməsi barədə Azərbaycan Respublikasının Qanununun tətbiq edilməsi haqqında imzaladığı Fərmanın dini etiqad azadlığının tam təmin olunmasına, dövlət-din münasibətlərinin daha yüksək səviyyədə tənzimlənməsinə və dözümlülük mühitinin daha da möhkəmləndirilməsinə müsbət təsir göstərəcəyini söyləyən H.Orucov mətbuatda yer alan və ictimaiyyəti narahat edən bir sıra məsələlərə də aydınlıq gətirib.
TURANƏ

Paylaş:

Baxılıb: 1712 dəfə