Altı rayonun məktəbliləri “Qızılgüllər diyarı”nda

Bakı:

24 °C

68 %

3 m/s

Əlaqə

AZ RU EN

Ana səhifə / Sosial / Altı rayonun məktəbliləri “Qızılgüllər diyarı”nda

Altı rayonun məktəbliləri “Qızılgüllər diyarı”nda

14.11.2017 [10:16]

“Ölkəmizi tanıyaq” devizi ilə keçirilən maarifləndirici tur-aksiya çərçivəsində Qəbələ-Şəki-Zaqatala marşrutu üzrə ekskursiyaya çıxan Kəlbəcər, Laçın, Xocalı, Xocavənd, Saatlı və Sabirabad rayonlarının məktəbliləri noyabrın 12-də Zaqatala rayonuna gəliblər.
AZƏRTAC xəbər verir ki, tur-aksiya iştirakçıları Zaqatala şəhərindəki Heydər Əliyev Mərkəzində rayonun rəhbər işçiləri tərəfindən mehribanlıqla qarşılanıblar.
Rayon İcra Hakimiyyəti başçısının müavini Vəfa Süleymanova məktəblilərə Zaqatalanın tarixi, coğrafi mövqeyi, iqtisadiyyatı, mədəniyyəti və turizm potensialı barədə məlumat verib. Bildirilib ki, Böyük Qafqaz sıra dağlarının cənub yamaclarında yerləşən, 127 min nəfərə yaxın əhalisi olan Zaqatala rayonunda 20-dən çox xalqın nümayəndəsi uzun illərdir dostluq və qardaşlıq şəraitində yaşayır.
Diqqətə çatdırılıb ki, rayonun iqtisadiyyatında tütünçülük, meyvəçilik, o cümlədən fındıqçılıq, baramaçılıq, gülçülük mühüm yer tutur. Dövlətimizin başçısının ənənəvi sahələrin inkişaf etdirilməsi ilə bağlı verdiyi tapşırıqlar Zaqatala rayonunda da uğurla icra olunur. Rayonda illik istehsal gücü 3500 ton olan tütün emalı zavodu, həmçinin tütün istehsalı və emalı məntəqəsi fəaliyyət göstərir.
Bildirilib ki, son illər Zaqatalada yeni fındıq bağlarının salınmasına böyük diqqət göstərilir. Fındıqçılıq kənd əhalisinin əsas məşğuliyyət sahələrindən biri hesab olunur. Son illər fındıq bağlarının ümumi sahəsi artırılaraq 17 min hektara çatdırılıb. Ənənəvi sahələrdən olan gülçülüyün inkişaf etdirilməsi üçün rayon ərazisində 107 hektar sahədə yeni gül plantasiyası salınıb. Hazırda həmin ərazidə qızılgül yağı istehsalı müəssisəsinin tikintisi davam etdirilir.
Sonra məktəblilər Heydər Əliyev Mərkəzi ilə tanış olublar. Məlumat verilib ki, Mərkəzdə müxtəlif təyinatlı bölmələr fəaliyyət göstərir. Binanın birinci mərtəbəsindəki ekspozisiya zalında Ulu öndərin zəngin həyat yolu və çoxşaxəli fəaliyyətinin bütün dövrləri barədə ətraflı məlumat almaq mümkündür. Binada, həmçinin akt və konfrans zalları, elektron kitabxana, kinozal, müxtəlif dərnək otaqları, fotostudiya, poliqrafiya emalatxanası və digər otaqlar yerləşir. Mərkəzdə fəaliyyət göstərən rəqs, rəsm, gitara, gənc fotoqraf, dekorativ tikmə, xalçaçılıq və toxuculuq dərnəklərində hər gün xeyli sayda yeniyetmə və gənc məşğul olur.
Məktəblilər dərnək otaqlarında yaradılan şəraitlə tanış olublar.
Tur-aksiya iştirakçıları Ümummilli lider Heydər Əliyevin adını daşıyan mədəniyyət və istirahət parkını ziyarət edib, dahi şəxsiyyətin abidəsi önündə xatirə şəkilləri çəkdiriblər. Bildirilib ki, 1947-ci ildə salınan parkın ərazisi 13 hektardır. Burada 27 ağac növü var. Park rayon əhalisinin, eləcə də qonaqların ən sevimli istirahət yeridir.
Rayon Tarix-Diyarşünaslıq Muzeyi ilə tanışlıq zamanı diqqətə çatdırılıb ki, 1967-ci ildə yaradılan muzeydə 16 minə yaxın eksponat nümayiş etdirilir.
Zaqatalaya səfər çərçivəsində məktəblilər fındıq emalı zavodunda da olub, istehsal prosesi ilə maraqlanıblar. Məlumat verilib ki, zavodda istehsal olunan fındıq ləpəsi əsasən Rusiya, Almaniya, İtaliya və digər Avropa ölkələrinə ixrac olunur. Məktəblilərin diqqətinə çatdırılıb ki, Azərbaycanda fındıq istehsalının böyük bir hissəsi Zaqatala rayonunun payına düşür.
Tur-aksiya iştirakçıları “Qızılgüllər diyarı” Zaqataladan zəngin təəssüratlarla ayrılıblar.

Paylaş:

Baxılıb: 544 dəfə