Xəzər rayonunda “Vətənin müdafiəsinə hazıram” mövzusunda tədbir keçirilib

Bakı:

21 °C

43 %

3 m/s

Əlaqə

AZ RU EN

Ana səhifə / Sosial / Xəzər rayonunda “Vətənin müdafiəsinə hazıram” mövzusunda tədbir keçirilib

Xəzər rayonunda “Vətənin müdafiəsinə hazıram” mövzusunda tədbir keçirilib

23.12.2017 [09:41]

Səfərbərlik və Hərbi Xidmətə Çağırış üzrə Dövlət Xidməti Azərbaycan Respublikası vətəndaşlarının hərbi vətənpərvərlik ruhunda tərbiyəsi, yeniyetmə və gənclərdə vətəndaşlıq hisslərinin yüksəldilməsi, onların ölkəmizin ərazi bütövlüyü uğrunda mübarizəyə hazırlıq ruhunda yetişmələri istiqamətində mütəmadi olaraq ictimai tədbirlər təşkil edir.
AZƏRTAC xəbər verir ki, Xidmətin 2017-ci il üçün fəaliyyət planına əsasən, “Vətənin müdafiəsinə hazıram” mövzusunda növbəti tədbir dekabrın 22-də Xəzər Rayon İcra Hakimiyyəti ilə birgə keçirilib.
Dövlət himninin səsləndirilməsi ilə başlayan tədbirdə Azərbaycan Respublikasının ərazi bütövlüyü və suverenliyi uğrunda şəhid olmuş Vətən övladlarının xatirəsi bir dəqiqəlik sükutla yad edilib.
Sonra Xidmətin fəaliyyətinə həsr edilən slayd nümayiş olunub.
Xəzər rayon İcra Hakimiyyəti başçısının birinci müavini Vaqif Həsənov çıxışında gənclərin hərbi vətənpərvərlik ruhunda tərbiyəsində belə tədbirlərin əhəmiyyətini qeyd edib. Bildirib ki, Prezident, Ali Baş Komandan İlham Əliyevin diqqət və qayğısı nəticəsində Azərbaycan Silahlı Qüvvələri bu gün dünyanın ən güclü orduları sırasındadır.
Ordu quruculuğu sahəsində qazanılan uğurlardan danışan Vaqif Həsənov Prezident, Ali Baş Komandan İlham Əliyevin rəhbərliyi ilə bu istiqamətdə həyata keçirilən islahatlardan bəhs edib. Vətəni qorumağın müqəddəs və məsuliyyətli vəzifə olduğunu vurğulayan natiq düşməndən qat-qat güclü olan ordumuzun doğma torpaqlarımızın keşiyində ayıq-sayıq dayandığını, işğal altındakı ərazilərimizi hər an azad etməyə hazır olduğunu bildirib. Qeyd edib ki, güclü Azərbaycan Ordusu istənilən döyüş tapşırığını, hücum əməliyyatını yerinə yetirməyə qadirdir, şəxsi heyətin döyüş ruhu yüksəkdir. Ordumuz ən müasir silah və sursatlarla, zirehli texnikalarla, zenit-raket qurğuları, hərbi hava qüvvələri və s. vasitələrlə təchiz olunub. Bütün bunlar Azərbaycan Prezidenti, Ali Baş Komandan İlham Əliyevin ordu quruculuğuna göstərdiyi diqqət və qayğının nəticəsində mümkün olub.
Səfərbərlik və Hərbi Xidmətə Çağırış üzrə Dövlət Xidmətinin şöbə rəisi, polkovnik Rasim Şirinov bildirib ki, xidmət tərəfindən gənclərin vətənpərvərlik ruhunda tərbiyəsi ilə bağlı silsilə tədbirlərin keçirilməsi ənənə halını alıb. Xidmət əsası Ulu öndər Heydər Əliyev tərəfindən qoyulmuş ordu quruculuğu prosesində yaxından iştirak edir, səfərbərlik və səfərbərlik hazırlığı, Silahlı Qüvvələrin çağırışçılarla komplektləşdirilməsi, gənc nəslin hərbi vətənpərvərlik ruhunda tərbiyəsi işində fəal rol oynayır. Ümummilli lider Heydər Əliyevin ordu quruculuğu sahəsində misilsiz xidmətlərindən danışan Rasim Şirinov qeyd edib ki, bu gün hərbi sahədə islahatlar uğurla reallaşdırılır. Məhz bu sahədə həyata keçirilən islahatlar nəticəsində bu gün Azərbaycan Silahlı Qüvvələri regionun ən qüdrətli ordusu statusunu qazanıb və ötən ilin aprel ayında düşmən təxribatının qarşısının alınması zamanı bunu sübut edib.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü Emin Həsənli və digər çıxış edənlər “Vətənin müdafiəsinə hazıram” mövzusunda keçirilən tədbirin əhəmiyyətindən və Dövlət Xidmətinin gənclərin vətənpərvərlik ruhunda tərbiyəsi ilə bağlı gördüyü işlərdən danışıblar. Qeyd olunub ki, bu cür tədbirlərin keçirilməsində məqsəd güclü ordu quruculuğu prosesinin əhəmiyyətini ictimaiyyətə çatdırmaq və gənc nəsli milli dövlətçilik ruhunda tərbiyə etməkdir.
Mərasimdə çağırışaqədərki hazırlıq rəhbəri, şəhid ailələrinin üzvləri, veteranlar, eləcə də çağırışaqədərki hazırlıq fənni üzrə yüksək nailiyyət göstərən şagirdlər mükafatlandırılıblar.
Sonda vətənpərvərlik mahnılarının mahir ifaçısı Şəmistan Əlizamanlı və Xəzər rayonunun müxtəlif məktəblərinin şagirdləri konsert proqramı ilə çıxış ediblər.

Paylaş:

Baxılıb: 465 dəfə