9 saylı Binəqədi II seçki dairəsi dairə seçki komissiyasında ixtisaslaşdırılmış kurslar keçirilir

Bakı:

31 °C

37 %

4 m/s

Əlaqə

AZ RU EN

Ana səhifə / Sosial / 9 saylı Binəqədi II seçki dairəsi dairə seçki komissiyasında ixtisaslaşdırılmış kurslar keçirilir

9 saylı Binəqədi II seçki dairəsi dairə seçki komissiyasında ixtisaslaşdırılmış kurslar keçirilir

20.02.2018 [10:04]

Fevralın 19-da 9 saylı Binəqədi II seçki dairəsi dairə seçki komissiyasının katibləri, üzvləri və məntəqə seçki komissiyalarının sədrləri üçün seçki hüququ üzrə üçgünlük ixtisaslaşdırılmış kurslara başlanılıb.
AZƏRTAC xəbər verir ki, kurslar Azərbaycan Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”na əsasən keçirilir.
Binəqədi II seçki dairəsi dairə seçki komissiyasında keçirilən kursların ilk günündə 50 nəfər iştirak edib. Kursları dairə seçki komissiyasının sədri Həsən Bayramov açaraq deyib ki, Azərbaycan Respublikasının müstəqil dövlət quruculuğu prosesinin ictimai həyatımıza gətirdiyi bir çox mühüm yeniliklərdən biri də mükəmməl seçki sisteminin formalaşmasıdır. Respublikada peşəkarlığı ilə seçilən institusional seçki qurumu formalaşıb, mükəmməl hüquqi-normativ baza yaradılıb, peşəkar beynəlxalq seçki təşkilatları ilə qarşılıqlı əməkdaşlıq sayəsində nümunəvi seçki prosesinin təmin edilməsi baxımından zəngin təcrübə əldə edilib. Mərkəzi Seçki Komissiyasının təqvim planına əsasən prezident seçkilərinin yüksək səviyyədə təşkili üçün seçki kampaniyasına start verib. Bu məqsədlə dairə seçki komissiyalarının sədrləri üçün seminarlar, kurslar təşkil edilib.
Kursların birinci günündə Binəqədi Rayon Polis İdarəsinin şöbə rəisi, polis polkovnik-leytenantı Elman Seyidov “Seçici siyahılarının təkmilləşdirilməsi, rəsmi seçki sənədlərinin daşınması və saxlanılmasının təhlükəsizliyinin təmin edilməsi, habelə asayişin qorunmasında Daxili İşlər Nazirliyi orqanlarının rolu”, Binəqədi Rayon Məhkəməsinin hakimi Abas Rzayevin “Seçki hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüququnun qorunması mexanizmləri” mövzularında məruzələri dinlənilib.
Çıxışlarda bildirilib ki, Mərkəzi Seçki Komissiyasının fəaliyyətində maarifləndirmə işinin təşkili mühüm yer tutur. Seçici siyahıları çox mühüm seçki sənədi olmaqla ilboyu fasiləsiz işlənilir, yenilənir, seçki komissiyaları tərəfindən ictimailəşdirilir. Binəqədi rayonundakı seçki məntəqələrində hazırlıq işləri MSK-nın təlimatları üzrə aparılır.
Qeyd edilib ki, ölkəmizdə demokratik seçkilərin keçirilməsi üçün hər cür şərait yaradılıb. Artıq Binəqədi rayonu üzrə seçkilərə hazırlıqla bağlı işlərə başlanılıb. Aparılan hazırlıq işləri deməyə əsas verir ki, seçkilər yüksək səviyyədə keçiriləcək. Məntəqələrin maddi-texniki təchizatında heç bir problem yoxdur.
İxtisaslaşdırılmış kurslarda seçkilərə hazırlıq prosesində dairə və məntəqə seçki komissiyalarının üzərinə düşən vəzifələrdən danışılıb. Bildirilib ki, qanunvericiliyə əsasən seçki günü məntəqələrdə görülən işlərin, səsvermə prosesi haqqında məlumatların cəmiyyətə çatdırılması üçün yerli və beynəlxalq müşahidəçilərin, KİV-lərin fəaliyyətinə qanunvericiliyə uyğun qaydada hər cür şərait yaradılacaq.

Paylaş:

Baxılıb: 573 dəfə