Aslan Əli oğlu Aslanov

Bakı:

26 °C

62 %

14 m/s

Əlaqə

AZ RU EN

Ana səhifə / Sosial / Aslan Əli oğlu Aslanov

Aslan Əli oğlu Aslanov

25.08.2018 [09:29]

Yeni Azərbaycan Partiyası Siyasi Şurasının üzvü Aslan Əli oğlu Aslanov uzun sürən xəstəlikdən sonra avqustun 22-dən 23-nə keçən gecə vəfat etmişdir.
Aslan Əli oğlu Aslanov 31 dekabr 1961-ci ildə Şəmkir rayonunun Əliyaqublu kəndində anadan olmuşdur. Orta məktəbi bitirdikdən sonra Azərbaycan Kənd Təsərrüfatı İnstitutunun (indiki Azərbaycan Dövlət Aqrar Universiteti) meyvə-tərəvəzçilik fakültəsinə daxil olmuşdur. Ali məktəbi müvəffəqiyyətlə bitirən Aslan Aslanov əmək fəaliyyətinə 1982-ci ildə Şəmkir rayonu şərabçılıq zavodunda başlamışdır. 1983-cü ildən 1993-cü ilə qədər isə Azərbaycan Kənd Təsərrüfatı İnstitutunda laborant, baş müəllim, dosent vəzifələrində çalışmış, bu müddətdə ixtisası üzrə dissertasiya işi müdafiə edərək biologiya elmləri namizədi elmi dərəcəsi almışdır.
1993-cü ildə Azərbaycan Respublikası Prezidentinin Sərəncamı ilə Aslan Aslanov Şəmkir rayon İcra Hakimiyyətinin başçısı vəzifəsinə təyin olunmuş və 2005-ci ilə qədər bu vəzifədə çalışmışdır. O, bu illər ərzində rəhbərlik etdiyi rayonun sosial-iqtisadi inkişafında əlindən gələni əsirgəməmişdir.
Aslan Aslanov 2005-2013-cü illərdə kənd təsərrüfatı nazirinin müavini vəzifəsində işləmiş, respublikamızda aqrar sahənin inkişafına özünün çoxillik iş təcrübəsi ilə töhfələr vermişdir.
Aslan Aslanov 1990-cı illərin əvvəllərində ölkədə mövcud olan mürəkkəb ictimai-siyasi proseslərə münasibətdə əsl vətəndaşlıq mövqeyi nümayiş etdirmişdir. Aslan Aslanovu ictimaiyyətə daha yaxından tanıdan cəhətlərdən biri də onun həmin dövrdə bir vətəndaş olaraq Azərbaycanın üzləşdiyi ciddi problemlərə görə narahatlıq keçirməsi və problemlərdən qurtulmaq üçün Ümummilli lider Heydər Əliyevin Azərbaycanda siyasi hakimiyyətə qayıtması uğrunda aparılan mübarizəyə qoşulması idi. O zaman respublikamızın bir çox vətənpərvər ziyalısı kimi, Aslan Aslanov da Vətənin düşdüyü çətin durumdan yeganə xilas yolunu Ulu öndər Heydər Əliyevin Azərbaycanda yenidən siyasi hakimiyyətə gəlməsində görürdü. 1993-cü ilin iyun ayında Ulu öndərimiz xalqın tələbi ilə hakimiyyətə qayıtdıqdan sonra ölkəmizin milyonlarla vətəndaşı kimi, Aslan Aslanov da Heydər Əliyevin siyasətini birmənalı olaraq dəstəkləmişdir. Aslan Aslanov həyat və fəaliyyəti dövründə hər zaman Ulu öndər Heydər Əliyevin ideyalarına sadiq qalmış, bu ideyaların təbliğində və həyata keçirilməsində fəal iştirak etmişdir.
Azərbaycan dövləti tərəfindən Gürcüstanda yaşayan soydaşlarımızın həyatı, tarix və mədəniyyətimizlə bağlı tədbirlərin uğurla həyata keçirilməsində də Aslan Aslanovun özünəməxsus rolu olmuşdur. O, Gürcüstan Respublikasının yerli hakimiyyət nümayəndələri ilə uğurla əməkdaşlıq əlaqələri quraraq qonşu ölkədə yaşayan azərbaycanlıların sosial qayğılarının aradan qaldırılması, təhsil problemlərinin həlli, Gürcüstanda yaşamış ədiblərimizə və ictimai xadimlərimizə abidələrin qoyulması, azərbaycanlıların inteqrasiyasının dərinləşməsi kimi bir çox məsələlərdə mühüm işlər görmüşdür. Onun bu istiqamətdə fəaliyyəti yüksək qiymətləndirilmiş və Aslan Aslanov Gürcüstan Respublikasının “Sədaqət” ordeni ilə təltif edilmişdir.
O, Yeni Azərbaycan Partiyasının Siyasi Şurasının üzvü kimi respublikamızın ictimai-siyasi həyatında aktiv iştirak etmişdir. Məhz bu fəallığına görə 2017-ci ilin noyabr ayında Azərbaycan Respublikası Prezidentinin Sərəncamı ilə “Tərəqqi” medalı ilə təltif edilmişdir.
Aslan Aslanovun xatirəsi onu tanıyanların qəlbində əbədi yaşayacaq.
Allah rəhmət eləsin!
Yeni Azərbaycan Partiyası

Paylaş:

Baxılıb: 1620 dəfə