Hazırkı şəraitdə pandemiyaya qarşı mübarizə hər kəsin gündəlik həyat tərzinə çevrilməlidir

Bakı:

16 °C

82 %

3 m/s

Əlaqə

AZ RU EN

Ana səhifə / Sosial / Hazırkı şəraitdə pandemiyaya qarşı mübarizə hər kəsin gündəlik həyat tərzinə çevrilməlidir

Hazırkı şəraitdə pandemiyaya qarşı mübarizə hər kəsin gündəlik həyat tərzinə çevrilməlidir

02.06.2020 [09:26]

Hər bir şəxs sosial məsuliyyətdən irəli gələrək özünü, yaxınlarını və digər cəmiyyət üzvlərini qorumaq üçün mövcud sanitar-gigiyenik qayda və tələblərə ciddi riayət etməli, başqalarını da bu fəaliyyətə dəvət etməlidir
Azərbaycan yeni növ koronavirus (COVID-19) infeksiyasına qarşı səmərəli mübarizə aparan nümunəvi ölkələr sırasında yer alır. Azərbaycan dövləti ölkə ərazisində COVİD-19-a ilk yoluxma faktı qeydə alındıqdan etibarən təhlükəli xəstəliyin daha geniş miqyasda yayılmasının qarşısının alınması və insanların həyatının qorunması üçün bütün zəruri tədbirləri həyata keçirir. Məhz bunun nəticəsində ölkəmizdə pandemiya ilə əlaqədar məsələləri ciddi nəzarətdə saxlamaq, virusun geniş yayılmasının qarşısını almaq və insanların həyatını maksimum şəkildə qorumaq mümkün olub. Qeyd edək ki, xüsusi karantin rejimi dövründə virusa yoluxma hallarının sayı minimuma endirilib, ölkəmizdə ölüm halları çox aşağı səviyyədə olub, xüsusi rejimli xəstəxanalarda müalicə olunaraq sağalanların sayı yeni yoluxma hallarının sayını kəskin üstələyib.
Pandemiyaya qarşı mübarizədə ictimai nəzarət və ictimai qınaq vacib şərtdir
Məlum olduğu kimi, ölkəmizdə pandemiyaya qarşı mübarizədə müşahidə edilən müsbət dinamika nəzərə alınaraq aprelin 27-dən karantin rejiminin mərhələlərlə yumşaldılmasına başlanılıb. Təəssüf doğuran haldır ki, xüsusi karantin rejimi yumşaldıldıqdan və müəyyən qadağalar aradan qaldırılandan sonra respublika ərazisində yeni yoluxma hallarının sayında artım müşahidə olunur. Son günlərin statistikası təsdiqləyir ki, respublikamızda pandemiyaya qarşı mübarizədə ilk mərhələdə əldə edilmiş müsbət nəticəni qoruyub saxlamaq mümkün olmayıb. İndiki şəraitdə narahatlıq yaradan əsas məsələ vətəndaşların nizam-intizamı gözləməmələri ilə bağlıdır. Təəssüf doğuran haldır ki, bir sıra vətəndaşlarımızın məsuliyyətsiz davranışı virusa yoluxma riskini artırır. Karantin qaydalarının yumşaldılması heç də pandemiyanın başa çatması anlamına gəlmir.
Hazırkı dövrdə pandemiya ilə səmərəli mübarizə bilavasitə vətəndaşların davranışı və məsələyə məsuliyyətlə yanaşmasından, eləcə də fəaliyyətinə icazə verilən sahələrdə rəhbər şəxslərin karantin rejimi qaydalarına riayət etmələrindən birbaşa asılıdır. İctimai yerlərdə, iaşə obyektlərində xəstəlikdən qorunmaq üçün qaydalar işlənilib hazırlanıb. Həmin obyektlərin sahibləri, vətəndaşlar bu qaydalara mütləq qaydada əməl etməlidirlər. Hər bir şəxs sosial məsuliyyətdən irəli gələrək özünü, yaxınlarını və digər cəmiyyət üzvlərini qorumaq üçün mövcud sanitar-gigiyenik qayda və tələblərə ciddi riayət etməli, başqalarını da belə fəaliyyətə çağırmalıdır.
Bütövlükdə, hazırda ictimai nəzarət və ictimai qınaq vacib şərtdir. Xəstəliklə mübarizə tədbirlərinə, karantin rejimi qaydalarını pozanlara qarşı hamı səfərbər olmalıdır. Ümumiyyətlə, pandemiya vəziyyəti hələ də davam etdiyindən və COVID-19 infeksiyasının müalicəsi üçün zəruri dərman preparatı, eyni zamanda, bu xəstəliyə qarşı peyvənd tapılmadığından virusla mübarizə hər kəsin gündəlik həyat tərzinə çevrilməlidir.
Sanitar-epidemioloji qaydalara əməl etməyənlərə qarşı müvafiq cəza tədbirləri görüləcək
Uzun müddətdir ki, ayrı-ayrı ölkələrdə müəyyənləşdirilən qaydaların pozulmasına, xüsusilə də tibbi maskadan və digər fərdi qoruyucu vasitələrdən istifadə etməməyə görə yüksək məbləğdə cərimələr, hətta həbs cəzasi da tətbiq olunur. Respublikamızda da belə sərt cəza tədbirlərinə əl atılması qaçılmaz zərurətə çevrilib. Başqsa sözlə, pandemiya şəraitində ayrı-ayrı vətəndaşların müəyyənləşdirilən qaydaları gözləməmələri, maska taxmamaları və bu kimi digər səbəblərdən də virusa yoluxma hallarının artması respublikamızda da müvafiq cəza tədbirlərinin görülməsini labüd edir.
Artıq Azərbaycanda müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər tərəfindən həmin tələblərin pozulmasının qarşısının alınmamasına görə cərimələr müəyyənləşdirilib. Bütövlükdə isə, hazırkı şəraitdə üçün hər bir şəxs vətəndaş məsuliyyəti nümayiş etdirməli, sanitar-epidemioloji qaydalara ciddi riayət etməlidir.
Mübariz ABDULLAYEV

Paylaş:

Baxılıb: 318 dəfə