“İrəli” İctimai Birliyi “Marş irəli” layihəsinə start verib

Bakı:

28 °C

54 %

10 m/s

Əlaqə

AZ RU EN

Ana səhifə / Sosial / “İrəli” İctimai Birliyi “Marş irəli” layihəsinə start verib

“İrəli” İctimai Birliyi “Marş irəli” layihəsinə start verib

28.07.2021 [16:36]

Azərbaycan Respublikasının Gənclər Fondunun dəstəyi, “İrəli” İctimai Birliyinin təşkilatçılığı ilə həyata keçirilən “Marş irəli” layihəsinin üçüncü mövsümünə start verilib.

AZƏRTAC-ın bölgə müxbiri xəbər verir ki, layihənin məqsədi Azərbaycan gəncliyinin hərbi vətənpərvərlik ruhunun, Vətənə sədaqət məfkurəsinin gücləndirilməsi, onların fiziki davamlılığının artırılması, sağlam düşüncəli, rəqabətə davamlı gəncliyin inkişafına xidmət etməkdir. “Marş irəli” layihəsi 2021-ci il üçün Azərbaycanın Gənclər paytaxtı seçilmiş Göygöl rayonunda reallaşdırılır.

Əvvəlcə iştirakçılar Göygöl rayonundakı Şəhidlər xiyabanını ziyarət edərək, ölkəmizin ərazi bütövlüyü uğrunda canından keçən şəhidlərimizin məzarı önünə gül dəstələri düzüblər.

Azərbaycan Respublikasının Dövlət Himninin səslənməsi ilə başlayan tədbirdə Vətən uğrunda canından keçmiş şəhidlərin əziz xatirəsi bir dəqiqəlik sükutla yad edilib, layihə iştirakçılarının andiçmə mərasimi olub.

Tədbirdə “İrəli” İctimai Birliyinin sədri Şahin Rəhmanlı, Göygöl Rayon İcra Hakimiyyətinin nümayəndəsi, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi, hərbi qulluqçular, Vətən müharibəsinin iştirakçıları, o cümlədən qazi Mahir Məmmədov, rayon gənclər və idman idarəsinin rəisi iştirak ediblər.

“İrəli” İctimai Birliyinin sədri Şahin Rəhmanlı çıxış edərək bildirib ki, hərbi simulyasiya formatında keçirilən layihənin indiyədək iki mövsümü uğurla həyata keçirilib. Layihənin birinci mövsümü Ağdam, ikinci mövsümü isə Goranboy rayonunda reallaşdırılıb. O, layihədə ümumilikdə 400-ə yaxın gəncin iştirak etdiyini diqqətə çatdırıb.

Həmçinin 44 günlük Vətən müharibəsində “İrəli” gənclərinin həm ön, həm də arxa cəbhədə xüsusi fəallıq göstərdikləri qeyd olunub. Bildirilib ki, həmin gənclərin arasında vaxtilə “Marş irəli” layihəsində iştirak edənlər də var. Bu da layihənin gənclər üçün əhəmiyyətini bir daha göstərir. Belə layihələr təşkilat tərəfindən bundan sonra da həyata keçiriləcək.

Qeyd edək ki, açıq hava şəraitində, düşərgə formatında keçirilən hərbi simulyasiya xarakterli layihə çərçivəsində yeddi gün müddətində ekstremal şəraitdə mübarizə aparacaq 100 gənc bir sıra sosial və idman fəaliyyətlərinə qatılacaq, müxtəlif mövzularda maarifləndirici təlim sessiyalarında iştirak edəcək. Gənclər layihə çərçivəsində fiziki dözümlülüyünü artıracaq, motivasiya xarakterli görüş, seminar və simulyasiya oyunlarında bilik və bacarıqlarını inkişaf etdirəcəklər. Həmçinin layihə müddətində hərbi hissəyə səfər və digər maraqlı tədbirlər də nəzərdə tutulub.

Paylaş:

Baxılıb: 716 dəfə